Elektronnyja tarhi pa prodažy ziamielnaha ŭčastka, jaki naležyć ksiandzu Hienrychu Akałatoviču ŭ vioscy Novaja Myš Baranavickaha rajona, nie adbylisia. Jany byli pryznačanyja na 24 lutaha, adnak aŭkcyjon zaviaršyŭsia ničym z pryčyny adsutnaści ŭdzielnikaŭ — nichto nie zachacieŭ kuplać ziamlu śviatara, piša Katolik.life.
Hety nievialiki ŭčastak — ziamla baćkoŭ śviatara, jakaja znachodzicca niepadalok ad baćkoŭskaha domu, — ciapier źjaŭlajecca aryštavanaj majomaściu i vystaŭlaŭsia na prodaž «u košt pahašeńnia zapazyčanaści pa vykanaŭčaj vytvorčaści».
Taksama viernikam viadoma, što pad aryšt trapiŭ i mikraaŭtobus, jaki naležyć nie śviataru, a parafii.
Jak raniej paviedamlałasia, pavodle abvinavačvańnia ŭ «zdradzie dziaržavie» akramia pazbaŭleńnia voli terminam na 11 hadoŭ ksiandza Akałatoviča abaviazali vypłacić nibyta pryčynienuju dziaržavie škodu na sumu 1 miljon 700 tysiač rubloŭ — heta 500 tysiač jeŭra.
Jaho vypuścili na svabodu, adnak abaviazak vypłaty vielizarnaj sumy nie źniali. Raniej u košt pahašeńnia zapazyčanaści byŭ pradadzieny asabisty aŭtamabil ksiandza — 20‑hadovy Volkswagen.
Jašče adno aryštavanaje aŭto — mikraaŭtobus toj ža marki i takoha ž uzrostu, jaki farmalna zarehistravany na byłoha probašča, adnak źjaŭlajecca ŭłasnaściu parafii. Vierahodna, jaho taksama pasprabujuć pradać z aŭkcyjonu. Z-za aryštu parafija nie moža karystacca aŭtamabilem, tamu jon prastojvaje ŭžo bolš za dva hady.
Baćkoŭski dom ksiandza na tarhi pakul nie vystaŭlali.
Sam śviatar pa-raniejšamu znachodzicca ŭ Rymie, kudy jaho vyvieźli razam z ajcom Andžejem Juchnievičam adrazu paśla vyzvaleńnia. Abodva ksiandzy praciahvajuć adnaŭlacca paśla doŭhaha źniavoleńnia. Ich dalejšy los pakul zastajecca niavyznačanym.
U ksiandza Hienrycha Akałatoviča aryštoŭvajuć i pradajuć majomaść
Što adbyvajecca z vyzvalenymi katalickimi śviatarami i čamu jany maŭčać
Ksiandzy Akałatovič i Juchnievič praviali ŭ Vatykanie śviatuju imšu
Ejsmant: Dvuch katalickich śviataroŭ pamiłavali pa prośbie Papy Lva XIV
Biez telefanavańniaŭ i listoŭ: što viadoma pra asudžanaha na 11 hadoŭ śviatara Akałatoviča
«My dajom Štatam toje, što jany chočuć». Rasijski kanał apublikavaŭ videa, jakoje nazyvajuć zapisam Ryžankova schavanaj kamieraj u mašynie14
Kamientary