Kim Čžu E rehularna źjaŭlajecca na važnych mierapryjemstvach z baćkam, a ciapier jašče i atrymała vysokuju pasadu ŭ struktury, jakaja kuryruje jadzierny patencyjał krainy.
Fota: KCNA
Pavodle paviedamleńniaŭ paŭdniovakarejskich ŚMI sa spasyłkaj na ŭradavyja krynicy, kiraŭnik KNDR Kim Čen Yn pryznačyŭ svaju 13‑hadovuju dačku Kim Čžu E na kiraŭničuju pasadu va Upraŭleńni rakietnych sił.
Mahčyma, Kim Čžu E pastupova rychtujuć da roli ŭ kiraŭnictvie Karejskaj narodnaj armii: jaje znajomiać z dakładami hienierałaŭ, a ŭ asobnych vypadkach jana nibyta addaje rasparadžeńni zamiest aficyjnaha kiraŭnika ŭpraŭleńnia.
Ličycca, što Kim Čžu E naradziłasia ŭ kancy 2012 — pačatku 2013 hoda: ciaham 2012 hoda jaje maci Li Sol Čžu nie źjaŭlałasia na publicy i nie zhadvałasia ŭ paŭnočnakarejskich ŚMI, što paźniej źviazali ź jaje ciažarnaściu.
Imia Čžu E stała viadomym dziakujučy raspoviedam amierykanskaha baskietbalista Denisa Rodmana, jaki padtrymlivaŭ blizkija adnosiny ź siamjoj Kimaŭ. U vieraśni 2013 hoda jon zajaviŭ, što trymaŭ Čžu E na rukach.
Pieršaje publičnaje źjaŭleńnie Kim Čžu E adbyłosia ŭ listapadzie 2022 hoda ŭ 10‑hadovym uzroście, kali jana supravadžała svajho baćku padčas zapusku mižkantynientalnaj balistyčnaj rakiety «Chvason-17».
Dziaržaŭnyja ŚMI spačatku nazyvali jaje «lubimaj dačkoj» Kim Čen Yna, ale paźniej pačali charaktaryzavać jak «pavažanuju dačku».
Paśla dziaŭčyna stała rehularna supravadžać baćku na roznych važnych mierapryjemstvach.
U lutym 2023 hoda jana naviedała spartyŭnyja spabornictvy: hulniu ŭ futboł i pieraciahvańnie kanata. U abodvuch vypadkach pieramahła kamanda Ministerstva abarony: u futbole jany abyšli pradstaŭnikoŭ Kabmina ź likam 3:1, u pieraciahvańni kanata — 2:0. Čžu E nazirała za spabornictvami razam ź ministram abarony Kan Sun Namam i členam Prezidyuma Palitbiuro CK Pracoŭnaj partyi Karei Čo Jon Vonam, a taksama členami ŭrada i supracoŭniki inšych ministerstvaŭ.
Tady ž Radio Free Asia paviedamiła, što ŭłady KNDR prymušajuć dziaŭčat i žančyn, jakija nosiać imia Čžu E, mianiać imiony, bo takoje ž imia nosić 10‑hadovaja dačka kiraŭnika krainy.
Źmianić imia treba było nie paźniej čym za tydzień. Ciapier imia Čžu E nibyta zareziervavanaje dla asob «najvyšejšaj hodnaści», u pieralik jakich, vierahodna, uvachodzić spadkajemnica siamiejstva Kimaŭ.
U sakaviku 2023 hoda dziaŭčynu pabačyli ŭ kurtcy za 2800 dalaraŭ ad Dior. Jana z baćkam prysutničała na zapusku čarhovaj rakiety «Chvason-17», zdolnaj dasiahać ZŠA.
A sioleta 16 lutaha jana prysutničała na adkryćci ŭ Pchieńjanie vulicy ŭ honar zahinułych u Kurskaj vobłaści paŭnočnakarejskich vajskoŭcaŭ.
U Nacyjanalnaj słužbie raźviedki Paŭdniovaj Karei raniej zaznačali, što pa-raniejšamu razhladajuć roznyja varyjanty płanaŭ Pchieńjana pakinuć pasadu ŭ spadčynu (krainaj kiruje ŭžo treciaje pakaleńnie Kimaŭ pačynajučy z 1950 hoda). Paŭnočnakarejskim hramadzianam z naradžeńnia pryščaplajuć dumku pra toje, što ŭ žyłach Kimaŭ ciače ledź nie boskaja kroŭ i kiravać krainaj im nakanavana źvierchu.
Całkam mahčyma, što Kim Čen Yn zachoča praciahnuć hetuju tradycyju.
Što praŭda, u Kim Čen Yna jość starejšy syn Čen Čžu, jon 2010 hoda naradžeńnia, ale pra jaho mała viadoma. Na fotach z aficyjnych mierapryjemstvach jaho nie bačna, mahčyma, jon, jak i baćka ŭ maładości, vučycca ŭ Zachodniaj Jeŭropie.
Ciapier čytajuć
Mižnarodny kryminalny sud pačaŭ rasśledavańnie złačynstvaŭ, ździejśnienych režymam Łukašenki20
Kamientary