«Treba pryniać najstražejšyja miery!» U Salihorsku piensijanierka paskardziłasia na tyktokieraŭ, jakija zdymajuć tancy ŭ parku
U Salihorsku ŭžo niekalki hadoŭ ludzi stałaha ŭzrostu kožnuju niadzielu źbirajucca ŭ miascovym Parku čatyroch stychij, kab patančyć, sustrecca ź siabrami i pryjemna pravieści viečar. Hetyja tancavalnyja sustrečy stali dobraj haradskoj tradycyjaj i navat nabirajuć papularnaść u TikTok. Ale apošni fakt, jak akazałasia, daloka nie ŭsim daspadoby.
Dniami ministr kultury Marat Markaŭ pravodziŭ u Salihorsku sustreču z haradžanami, padčas jakoj adna pažyłaja žančyna paskardziłasia jamu na toje, što błohiery aktyŭna zdymajuć tancy, vystaŭlajuć ich u tyktok i heta, maŭlaŭ, mnohich ad mierapryjemstva adpužvaje, bo jany nie chočuć, kab ich bačyli ŭ internecie.
«Naš tyktok prosta źziaje salihorskaj zdymkaj. Ni vyjści na vulicu, ni ŭ aŭtobusie nie prajechać — ničoha», — narakaje jana.
Žančyna śćviardžaje, što ŭ miascovych orhanach ułady joj skazali, što zrabić ničoha nie mohuć, ale ŭ minskim parku Čaluskincaŭ jana, maŭlaŭ, była i tam pračytała, što na tancavalnaj placoŭcy zdymki zabaronienyja. Tamu jana prosić Marata Markava, kab «i ŭ našym Salihorsku zdymki spynili».
«Kali źviartajucca da ludziej — miljon raz adno i toje samaje. Adkaz — nie chadzi. Niekatoryja havorać — nie chočacie zdymacca, to siadzicie doma. Čałavieka 78 hadoŭ pakryŭdzili, nazvali nieadekvatnaj, kali jana źviarnułasia, kab jaje nie zdymali. Chiba heta viečar adpačynku? Čamu ludzi starejšaha ŭzrostu, jakija arhanizoŭvali hety viečar, ciapier nie mohuć z-za zdymak chadzić na hety viečar?
Niejak treba najstražejšyja miery pryniać adnosna našych błohieraŭ!» — zaklikaje žančyna.
Markaŭ byŭ zaśpiety pytańniem źnianacku i nie byŭ hatovy niešta na heta pradmietna adkazvać. Jamu na dapamohu pryjšoŭ miascovy čynoŭnik, jaki adznačyŭ, što «kožny čałaviek choča mieć svaju chvilinu słavy», i toje, što ludzi chočuć pakazać žycharoŭ Salihorska — heta narmalna. U kožnym razie, maŭlaŭ, heta pytańnie ŭnutranaje i nad im pavinna dumać kiraŭnictva rajona.
Vykładzienaje ŭ tyktok videa, na jakim žančyna zadaje svajo pytańnie, vyklikała aktyŭnaje abmierkavańnie — bolš za tysiaču kamientaroŭ. Mierkavańni padzialilisia — adnyja padtrymlivajuć žančynu, ale bolšaść usio ž ličyć, što ad videa bolš karyści, čym škody:
«Kamu jany zaminajuć, nie chočaš — nie hladzi. Ja z zadavalnieńniem hladžu. Usio cyvilizavana, prystojna, nieadekvatnych nie vidać. Umiejcie radavacca razam ź ludźmi».
«Na sto pracentaŭ pravilna, mnohija ludzi nie chočuć, kab ich hladzieŭ uvieś śviet, a chočuć pryjści i patancavać spakojna dla siabie… U nas u horadzie taksama pastajanna svarki praz hetyja zdymki… Mnohija ŭžo na takija tancy nie chodziać tolki praz heta…»
«Vielmi pryjemna hladzieć, usie takija ŭbranyja, enierhičnyja. Nastroj padymajecca. Padabajecca hladzieć, jak tancuje Nataša. Chto prosta špacyruje pa parku, navat nie traplajuć u kadr».
«Chaj jedzie na daču i tam zdymać nie buduć. Naš Salihorsk hladzić uvieś śviet. I pišucca dobryja vodhuki. Maje siabry z Hiermanii taksama byli nieadnojčy na tancach, byli vielmi zadavolenyja».
«Što značyć: «Nie chočacca zdymacca — siadzicie doma???» Heta majo prava — siadzieć doma ci naviedvać tancavalnyja placoŭki, tyja ž placoŭki adpačynku. Ale nikomu nie dadziena prava zdymać mianie tolki tamu, što kamuści hetaha chočacca. I daloka nie ja adna takoj dumki z majho asiarodździa. A žančynie reśpiekt i pavaha za heta pytańnie. Chočacca spadziavacca, što ministr kultury hetaje pytańnie voźmie na zamietku i vyrašyć jaho stanoŭča (adnosna zadadzienaha pytańnia)».
«Zabaranić, moža, i nie treba, ale zabiaśpiečyć ludziam, jakija nie žadajuć traplać u abjektyŭ kamier čužych telefonaŭ, peŭnuju «biaśpieku». Heta nienarmalna, kali čałaviek kaža «nie zdymajcie mianie», a čuje ŭ adkaz abrazy i prapanovy «nie chadzić» ci «siadzieć doma».
«Vašy tancy ŭ Salihorsku — heta etałon pryhažości. Ludzi pryhožyja. Ubory hodnyja. Na vašy tancy hladziš — žyć chočacca».
«U Homieli tancplacoŭku padzialili na dźvie častki: na adnoj zdymajuć, a na druhoj — nie. Tamu prablem niama. Usio možna vyrašyć».
U Biełarusi množacca placoŭki dla tancaŭ na śviežym pavietry — pahladzicie, jak adpalvajuć razam moładź i piensijaniery ŭ Sierabrancy
Biełaruska ŭładkavałasia ŭ kandytarskuju kramu. Ale vyśvietliłasia, što za naviedvańnie tualeta joj treba płacić
«Darahija, viesialiciesia, hulajcie i kuraleście. Niachaj na staraść u vas budzie zapas dobrych pieražyvańniaŭ». Apošni hod Śviatłany Kurs — u jaje dopisach
Ciapier čytajuć
Dziaržbiaśpieka Litvy: «Naš dom» Karač štučna stvaraje ŭmovy, kab biełarusy, što nie adpaviadajuć kryteryjam mižnarodnaj abarony, atrymlivali VNŽ u Litvie4747
Dziaržbiaśpieka Litvy: «Naš dom» Karač štučna stvaraje ŭmovy, kab biełarusy, što nie adpaviadajuć kryteryjam mižnarodnaj abarony, atrymlivali VNŽ u Litvie47
«Ludzi kamientavali, što salmanieła ŭvajšła ŭ čat». Biełarus pajechaŭ pracavać u Kremnijevuju dalinu — i staŭ kulinarnym błohieram na 28 miljardaŭ prahladaŭ1010
Kamientary