U kanadskaj Albiercie zaviaršyłasia hałasavańnie na papiarednim refierendumie ab niezaležnaści. Kali stanuć viadomyja vyniki?

Na hałasavańnie było vyniesiena pytańnie nie pra adździaleńnie Albierty ad Kanady, a pra toje, ci treba pravodzić z hetaj nahody novy refierendum, piša Bi-bi-si.

Poŭnyja vyniki refierendumu mohuć stać viadomyja tolki praz dvoje sutak paśla zakryćcia vybarčych učastkaŭ.

Heta źviazana z tym, što miljony biuleteniaŭ buduć padličvać uručnuju, a na kožnym vybarčym učastku pracujuć čatyry hrupy padliku hałasoŭ, u kožnaj ź jakich pa dva čałavieki. Kožnaja takaja hrupa moža apracavać tolki kala 400 biuleteniaŭ za hadzinu.

Ekzitpoły na hetym refierendumie nie pravodziacca, adnak kanadskija ŚMI ŭ peŭny momant mohuć sprahnazavać vyniki hałasavańnia na padstavie ŭžo atrymanych aficyjnych danych.

Kanadskaja viaščalnaja karparacyja CBC News abiacaje, što taki prahnoz budzie zrobleny «jak tolki tendencyja stanie vidavočnaj».

Pytańnie ab niezaležnaści — adno ź dziesiaci, na jakija žychary bahataj na naftu i haz Albierty adkazvajuć padčas hetaha refierendumu. Astatnija datyčacca pieravažna koła paŭnamoctvaŭ miascovych uładaŭ. Pry hetym vyniki refierendumu nie buduć mieć abaviazkovaj jurydyčnaj siły.

Pytańnie ab niezaležnaści premjer-ministr Albierty Daniel Śmit uklučyła ŭ biuleteń u mai hetaha hoda, adhuknuŭšysia na pietycyju, pad jakoj prychilniki adździaleńnia sabrali kala 300 tys. podpisaŭ.

Vybarčaja kamisija paviedamlaje, što spačatku padličyć biuleteni, jakija datyčacca pytańnia ab niezaležnaści, i tolki paśla hetaha — pa astatnich pytańniach.

Što pakazvajuć apytańni?

Apytańni hramadskaj dumki śviedčać, što pieravažnaja bolšaść nasielnictva Albierty vystupała suprać niezaležnaści: sacyjołahi paviedamlali, što adździaleńnie ad Kanady padtrymlivajuć mienš za 25% žycharoŭ. Adnak refierendum staŭ važniejšaj palityčnaj padziejaj u Kanadzie: pra jaho havaryli viadučyja palityki krainy, u Albiercie prachodzili mitynhi i demanstracyi.

Premjer-ministr Kanady Mark Karni, jaki vyras u Albiercie, zaklikaŭ žycharoŭ pravincyi vystupić suprać adździaleńnia. Jon taksama vykazvaŭ hatoŭnaść źmianić Kanstytucyju Kanady, kab dać hetaj terytoryi bolš paŭnamoctvaŭ, choć i zaklikaŭ hałasavać suprać prapanavanych na refierendumie papravak.

Pytańnie ab praviadzieńni refierendumu ŭklučana ŭ biuleteń pad numaram 10, a astatnija datyčacca ŭzmacnieńnia kantrolu nad mihracyjaj i pašyreńnia aŭtanomii Albierty. Dla apošniaha nieabchodna źmianić Asnoŭny zakon krainy.

«Kab usim było zrazumieła: u Kanstytucyju možna ŭnosić papraŭki, ale dla hetaha nieabchodny sapraŭdny kansensus adnosna taho, što mienavita treba źmianić i ź jakich elemientaŭ pavinna składacca reforma, — skazaŭ Karni. — Ci hatovy ja razhledzieć kanstytucyjnuju reformu? Tak, hatovy, pry ŭmovie, što spačatku buduć zakładzieny asnovy dla dasiahnieńnia kansensusu».

Što kažuć prychilniki i praciŭniki adździaleńnia?

Albierta — hałoŭnaja nafta– i hazazdabyŭnaja pravincyja Kanady: na jaje prypadaje kala 80% naftazdabyčy ŭ krainie. Pry hetym syraja nafta — hałoŭny artykuł kanadskaha ekspartu: letaś jana pryniesła 142 młrd kanadskich dalaraŭ (100 młrd dalaraŭ ZŠA).

Raźmieščanaja na zachadzie Kanady Albierta nie maje vychadu da akijana, i bolšaja častka jaje nafty ekspartujecca na naftapierapracoŭčyja zavody ŭ ZŠA.

Prychilniki niezaležnaści skardziacca, što pravincyja addaje zanadta šmat hrošaj centralnamu ŭradu i zanadta mała atrymlivaje naŭzamien. Jany nahadvajuć, što pa abjomie zapasaŭ nafty Albierta zajmaje čaćviortaje miesca ŭ śviecie paśla Vieniesueły, Saudaŭskaj Aravii i Irana.

Akramia taho, Libieralnaja partyja, jakaja kiruje Kanadaj apošnija dziesiać hadoŭ, na ich dumku, nadaje zanadta šmat uvahi baraćbie sa źmianieńniem klimatu i tarmozić raźvićcio naftahazavaha siektara Albierty.

Adnak praciŭniki niezaležnaści, siarod jakich i premjer-ministr Albierty Daniel Śmit, śćviardžajuć, što ŭ vypadku adździaleńnia ad Kanady pravincyi daviadziecca štohod tracić na stvareńnie novaj dziaržavy ad 50 da 170 młrd kanadskich dołaraŭ (35—120 młrd dołaraŭ ZŠA) na praciahu pieršych piaci hadoŭ.

Niezaležnaj Albiercie daviałosia b stvarać usie dziaržaŭnyja ŭstanovy — ad padatkovaj słužby da Ministerstva zamiežnych spraŭ i Ministerstva abarony, raspracoŭvać i prymać ułasnuju kanstytucyju, budavać svaju sudovuju sistemu, a taksama dzialić z Kanadaj fiederalnuju majomaść, u tym liku nacyjanalnyja parki i vajskovyja bazy. Akramia taho, jak papiaredžvajuć praciŭniki adździaleńnia, Albiercie daviałosia b uziać na siabie praparcyjanalnuju dolu dziaržaŭnaha doŭhu Kanady.

Akramia taho, pavodle prahnozaŭ praciŭnikaŭ niezaležnaści, praz palityčnuju niestabilnaść pravincyja moža stracić miljardy inviestycyj i častku źniešniaha handlu.

• 0
• 0
• 0
• 1
• 0
• 0
• 0
• 0