U Mastach pradali rasijaninu stohadovy asabniak ź vialikim parkam
U Mastach z druhoj sproby pradali niezvyčajny łot — dvuchpaviarchovy asabniak 1928 hoda pabudovy razam z tenisnym kortam i vialikim parkam. Novym uładalnikam byłoj siadziby ŭ redkim u nas zakapanskim styli staŭ kupiec z Rasii, jakomu ŭsia hetaja pryhažość abyšłasia ŭ $78 300 pa aktualnym kursie Nacyjanalnaha banka, piša Domovita.by.
Pieršapačatkova byłuju siadzibu na vulicy Janki Kupały, 62 u Mastach sprabavali pradać u žniŭni hetaha hoda. Na pieršych tarhach pačatkovaja cana składała 345 782,35 rubla, ale zajavak na łot nie pastupiła.
Da druhoha aŭkcyjonu pačatkovuju canu ŭrezali prykładna na 45%, paśla čaho budynak adrazu znajšoŭ kupca. Baraćby na pavyšeńnie hetym razam nie było, bo na tarhi zarehistravaŭsia ŭsiaho adzin udzielnik. Pa praviłach aŭkcyjonu ŭ takoj situacyi łot addajuć adzinamu pretendentu z dadatkam u 5% da startavaj cany. Vynikovy ček skłaŭ 235 681,26 biełaruskich rubloŭ, što roŭniajecca $78 305. Kupcom staŭ hramadzianin Rasijskaj Fiederacyi, jaki jak fizasoba nabyŭ nieruchomaść, kab raźvivać tut ahraekaturyzm.
Sam budynak vyhladaje vielmi atmaśfierna i zusim nie padobny da typovaj zabudovy. Hety kamienny dom z mansardaj i terasaj pabudavali ŭ 1928 hodzie, jašče za polskaj uładaj. Architektura spałučaje ŭ sabie zakapanski styl i elemienty nieabaroka, a hałoŭny ŭvachod upryhožvajuć kłasičnyja kałony i fihurny franton.
Niahledziačy na amal viekavy ŭzrost, pabudova na 271,7 kvadrata vydatna zachavałasia i nie patrabuje kapitalnaha ramontu. Tut mocny bietonny padmurak, ścieny ź silikatnaj cehły, draŭlanyja pierakryćci i stalovy dach. Usie bazavyja vyhody daŭno padviedzienyja ŭnutr: pracujuć elektryčnaść, vadapravod i miascovaja kanalizacyja.
Historyja ŭ hetych miaścin jašče bolš daŭniaja. Raniej tut znachodziłasia vioska Małyja Ściapaniški, jakaja zhadvałasia ŭ chronikach Vialikaha Kniastva Litoŭskaha jašče ŭ 1557 hodzie. Naprykancy XIX stahodździa miascovymi majontkami vałodali Alaksandr Favorski i Ździsłaŭ Kałantaj, a ŭ 1920‑ch hadach tut vyras ciapierašni siadzibny dom z parkam i sadam.
Pry savieckaj uładzie ŭ byłym panskim asabniaku pracavała zvyčajnaja škoła. Paźniej kompleks pierajšoŭ na bałans Mastoŭskaha ŽKH, tam adkryli papularnuju ahrasiadzibu «Javar», a ŭ 2014 hodzie — spartyŭny kłub «Kamunalnik». Ad bazy adpačynku ŭnutry zastalisia abstalavanaja kuchnia, haścioŭnia z kaminam, zała-transformier dla bankietaŭ na pieršym paviersie i prastornyja spalni z sanvuzłami na druhim.
Pryjemnym bonusam da samoha asabniaka stała vielizarnaja ŭparadkavanaja terytoryja. Pieramožca tarhoŭ atrymaŭ u arendu na 50 hadoŭ nadzieł płoščaj kala 170 sotak. Razam z domam novamu haspadaru pierajšli dźvie majsterni, altanka, navies, kałodziež i navat tenisny kort. Uzdoŭž ściežak dla špacyraŭ zachavalisia raznyja draŭlanyja łaŭki i skulptury, jakija ŭ svoj čas zrabiŭ miascovy majstar Viktar Jepačancaŭ. Pa ŭmovach ździełki ŭ novaha ŭładalnika jość roŭna hod, kab zapuścić prajekt u pracu, pry hetym pry žadańni profil abjekta dazvolena mianiać ad hatela da spartyŭnaha abo handlovaha centra.
U Niaśvižy z bujnoj źnižkaj pradali dvuchpaviarchovy histaryčny asabniak
Katedž u zakrytym pasiołku kala Minskaha mora kupili za 4,45 miljona dalaraŭ
Staruju kamianicu kala ratušy ŭ Mahilovie rychtavali dla haradskoha muzieja. Ciapier tam robiać ofis rasijskaha pasolstva na čale z byłym ministram «ŁNR»
Ciapier čytajuć
Trahiedyja z 30‑hadovaj doktarkaj sa Starobina — pajšła vydalać zub mudraści i pamierła16
Kamientary