«U 2015‑m vyjhraŭ $10 tysiač». Biełarusy ŭzhadvajuć, jak i kolki vyjhravali ŭ łatarei

«Tata ŭsio žyćcio hulaŭ u «Supierłato» i «Vaša łato», dzieści ŭ 2012 hodzie vyjhraŭ 25 miljonaŭ. I paśla denaminacyi adzin raz — tysiaču rubloŭ. Hulaje i dahetul», — napisała dziaŭčyna i vykłała fota z tym samym siertyfikatam na 25 miljonaŭ niedenaminavanych rubloŭ. Pa stanie na 2012 hod heta było kala $3000.

Inšaja karystalnica pryhadała, što hadoŭ 17 tamu vyjhrała ŭ łatareju $500. Na vyjhranyja hrošy jana nabyła dva mabilnyja telefony dla siabie i maci, a taksama pierakleiła špalery ŭ pakoi.

Viasielnyja łatarei

Adrazu niekalki čałaviek napisali, što zamiest kvietak na viasielle prasili haściej daryć im łatarejnyja bilety. U vyniku z usich biletaŭ u maładych atrymałasia ŭsiaho 6 rubloŭ vyjhryšu.

«My na viasielle taksama prasili bilety, taksama nifiha nie vyjhrali kaštoŭnaha», — napisała žančyna.

«U nas taksama na viasielle prynieśli kvitkoŭ 50, i ź ich vyjšła kala 10 rubloŭ u ahulnaj kolkaści», — zhadała inšaja.

Jašče adna karystalnica napisała, što z 30 biletaŭ, padoranych na viasielle, vyjhryšnymi byli tolki try, i ŭ kožnym ź ich vyjhryš byŭ roŭny koštu bileta.

«Nam z mužam na viasielle šmat biletaŭ padaryli. Tak atrymałasia, što ŭsie byli vyjhryšnyja — praŭda, sumy nievialikija, ale ŭsio adno pryjemna», — padzialiłasia jašče adna žančyna.

Pavialičyć

Ale nie ŭsie historyi z padoranymi łatarejnymi biletami mieli ścipłyja vyniki. Adzin z kamientataraŭ napisaŭ, što atrymaŭ davoli bujny vyjhryš ad takoha padarunka.

«U 2015‑m vyjhraŭ $10 tysiač u pieraliku. Ja hety bilet vioz u ofis «Supierłato», spakavaŭšy ŭ try fajliki, nie daj boh padrapać. Darečy, u łatareju nie vieryŭ, bilet na dzień narodzinaŭ padaryli», — zhadaŭ mužčyna.

Trapić u televizar było nie mienš pryjemna

Dla inšych samym zapaminalnym momantam było, kali jany ci ich baćki traplali ŭ studyju.

«Mamie ŭ hetym «televizary» trojčy vypała «binha». Jeździli na hulniu, tam viadučyja padkazvali, jak hulać, kab nie syści ź minimalnym pryzam. U 2018 hodzie vyjhrali 1000 rubloŭ», — padzialiłasia jašče adna karystalnica.

«Małaja była. Kali trojčy było napisana słova «skarb», tady jedzieš u studyju na šou. Pajechała ja z chrosnaj. I ŭ kancy tam vynosili nibyta zołata, uzvažvali i tym, chto byŭ, razdavali hrošy. Karaciej, pomniu, 700 000 [niedenaminavanych] rubloŭ vydali nam na ruki», — pryhadała vypadak ź dziacinstva inšaja.

Adna z kamientatarak uzhadała, jak niekali joj trapiŭsia «skarb» i jana razam z mužam pajechała ŭ Minsk na efir.

«Ja nie trapiła ŭ trojku tych, chto hrob zołata, ale ŭsim astatnim, «niehrabunam», padzialili hrošy. Apraŭdali pajezdku z Baranavičaŭ da Minska i kupili na reštu kuchonny kambajn. Dahetul bulbu pad draniki na im robim», — napisała jana.

Niekatoryja traplali ŭ miascovyja haziety

«My z mamaj u 2010‑m taksama vyjhrali $1111 u pieraliku. Nas fatahrafavali, i ŭ haziecie našy tvary zaśviacilisia z hetaj nahody», — napisała dziaŭčyna i dadała, što toj vyjhryš vielmi dapamoh joj tady z apłataj navučańnia va ŭniviersitecie.

Vyjhravali nie tolki hrošy

Adna dziaŭčyna napisała, što jaje dzied niekali vyjhraŭ u łatareju mašynu, i dadała skrynšot pravierki bileta ŭ internecie.

Pavialičyć

Suma vyjhryšu skłała 29 900 rubloŭ — aŭtamabil Nissan Terrano.

Adna z kamientatarak napisała, što sama vyjhravała tolki nievialikija sumy, a jaje stryječny brat niekali vyjhraŭ VW Tiguan.

Inšy karystalnik pryhadaŭ, jak praviarali bilety ŭ časy, kali internet byŭ jašče nie vielmi raźvity.

«Pamiataju, jak na pošcie ci ŭ «Biełarusbanku» lažali papki ź infarmacyjaj pra vyjhryšnyja bilety paśla rozyhryšu. Na toj čas internet jašče mała ŭ kaho byŭ, i kali prapuściŭ efir, možna było tak pravieryć svoj bilet».

• 3
• 1
• 0
• 1
• 0
• 0
• 0
• 0