U Hiermanii i Niderłandach zafiksavali samy nizki za ŭsiu historyju nazirańniaŭ uzrovień vady ŭ race Rejn. Pryčynaj stała praciahłaja zasucha, jakaja zakranuła značnuju častku Jeŭropy, paviedamlaje Bi-bi-si.
Pavodle źviestak manitorynhu, naprykancy lipienia nizki ŭzrovień vady adznačaŭsia na 44% vymiaralnych stancyj na Rejnie i na 78% stancyj na Dunai. Na ŭčastku kala horada Kaŭb sudnachodnaja hłybinia źniziłasia da 25 santymietraŭ — heta paŭtaryła antyrekord 2018 hoda.
Takoje abmialeńnie surjozna ŭskładniaje račnyja hruzapieravozki. Kab sudny mahli praciahvać ruch, ich davodzicca mienš zahružać abo raźmiarkoŭvać hruzy pamiž niekalkimi sudnami. Heta moža pryvieści da padaražańnia transpartnych pieravozak i prablem z pastaŭkami.
Padobnaja situacyja nazirajecca i na inšych bujnych jeŭrapiejskich rekach. Na Dunai ŭ Sierbii i Rumynii ŭzrovień vady staŭ samym nizkim za apošnija try dziesiacihodździ. U Vienhryi z-za deficytu vady była spyniena praca adzinaj atamnaj elektrastancyi.
U Italii raka Po taksama dasiahnuła histaryčna nizkaha ŭzroŭniu. Ułady abviaścili vysokuju niebiaśpieku ŭ dalinie raki i papiaredzili pra mahčymyja pieraboi ź pitnoj vadoj. Prasoŭvańnie salonaj marskoj vady ŭ vuście Po pahražaje ekasistemam i stvaraje ciažkaści dla sielskaj haspadarki.
Sinoptyki prahnazujuć, što novaja chvala śpioki praciahniecca jašče jak minimum tydzień, a ŭ mnohich krainach Centralnaj i Paŭdniovaj Jeŭropy tempieratura pavietra pieravysić +40 °C. Pavodle Jeŭrapiejskaj absiervatoryi zasuchi, situacyja ŭ mnohich rehijonach kantynienta zastajecca krytyčnaj i praciahvaje paharšacca.
Ciapier čytajuć
Hieroj Biełarusi Maryna Vasileŭskaja naradziła dačku ad kasmanaŭta Aleha Navickaha12
Kamientary