U Hiermanii sioleta nakapali stolki bulby, što musiać razdavać jaje zadarma

Niahledziačy na toje, što bulba — adzin z samych papularnych praduktaŭ u krainie (u siarednim kožny žychar Hiermanii źjadaje kala 63 kiłahramaŭ na hod, a zamarožanaj bulby dla smažańnia spažyvajecca kala 330 tysiač ton štohod), sioletniaja prapanova značna pieravysiła popyt.

Častku ŭradžaju vykarystali na dabračynnyja mety. Niešta adpravili va Ukrainu jak humanitarnuju dapamohu, niekalki ton pieradali Bierlinskamu zaaparku dla kormu žyvioł. Najlepšaj jakaściu bulbu atrymali stałoŭki dla biazdomnych, dziciačyja sadki, škoły, cerkvy i niekamiercyjnyja arhanizacyi.

U Bierlinie źjavilisia abjavy ź infarmacyjaj pra miescy i čas biaspłatnaj razdačy. Haradžanam prapanavali prosta pryjści sa svajoj taraj — miaškom, viadrom abo torbaj na kołcach. Usiaho ŭ stalicy naličvajecca 174 takija punkty.

Ideju pravieści akcyju pad nazvaj «4000 ton» — mienavita stolki skłali liški — u śniežni 2025 hoda prapanavaŭ fiermier z-pad Lajpcyha. Inicyjatyvu padtrymali adna ź bierlinskich haziet i ekałahičny niekamiercyjny prajekt, źviazany z pošukavikam Ecosia.

Mnohija žychary Bierlina pryznajucca, što spačatku nie pavieryli ŭ takuju ščodruju prapanovu. Niekatoryja dumali, što fota hor bulby — vynik pracy niejrasietak, a sama navina — vydumka. Ale chutka praz sacsietki raspaŭsiudziłasia paćviardžeńnie, što razdača sapraŭdnaja.

U vyniku navat u mocnyja marazy horad ažyviŭsia: ludzi z zaplečnikami, starymi torbami i vazkami išli pa bulbu, dapamahali adno adnamu nieści ciažkija miachi i abmieńvalisia chatnimi receptami.

ŚMI taksama zhadali histaryčny fakt: u XVIII stahodździ pruski karol Frydrych II vydaŭ tak zvany «bulbiany ŭkaz», jaki abaviazvaŭ žycharoŭ vyroščvać bulbu i ŭžyvać jaje ŭ ježu, niahledziačy na pieršapačatkovy niedavier da hetaha praduktu.

Ź ciaham času bulba nastolki ŭkaraniłasia ŭ niamieckaj kultury, što niemcy praciahvajuć źjadać jaje ŭ vialikaj kolkaści, navat niahledziačy na parady dyjetołahaŭ abmiežavać vuhlavody. U 2017 hodzie byłaja kanclerka Hiermanii Anhieła Mierkiel navat padzialiłasia svaim receptam bulbianoha supu, adznačyŭšy, što zaŭsiody taŭče bulbu ŭručnuju, a nie z dapamohaj kuchonnaj techniki.

Adnak nie ŭsie ŭ zachapleńni ad biaspłatnaj razdačy. Šerah fiermieraŭ ličać, što sielskaja haspadarka vychodzić z-pad kantrolu, a praca ahraryjaŭ abiasceńvajecca. Ekałahičnyja aktyvisty paraŭnoŭvajuć ciapierašnija fota składoŭ, zapoŭnienych niepatrebnaj bulbaj, ź situacyjaj 1970‑ch hadoŭ, kali ŭ Jeŭropie praź dziaržaŭnyja zakupki ŭźnikli vielizarnyja liški małaka i masła, jakija nie było dzie zachoŭvać.

• 6
• 0
• 0
• 0
• 2
• 0
• 0
• 0