Juraś Ziankovič usurjoz dyskutavaŭ z pravakataram Cieracham, viadomym jak Ludažor. Navošta?

Juryj Cierach publikuje kałonki i «niejrakomiksy» (komiksy na palityčnyja temy, stvoranyja štučnym intelektam) u haziecie «SB. Biełaruś siehodnia». A taksama viadzie ahresiŭny telehram-kanał «Ludažory», dzie palivajuć brudam apazicyjnych palitykaŭ, niezaležnych dziejačoŭ hramadstva i kultury, Ukrainu i Zachad. Jak pravakatar, Cierach taksama raniej rabiŭ ukidy ŭ miedyja.

Razam z prapahandystkaj Ludmiłaj Hładkaj dy karykaturystam Aleham Karpovičam jon vypuściŭ u 2022 hodzie knihu «Vyvarat miaciažu» — zhadvajecca ŭ joj i Ziankovič.

Dyskusija Cieracha i Ziankoviča vyjšła na novastvoranym YouTube-kanale PlusMinus (tam ciapier 26 padpisčykaŭ). Maderataram byŭ błohier Maks Morysan. Da parazumieńnia nie pryjšli: Cierach pierakanany, što dziaržava zasłužana karaje niazhodnych z uładaj. A tym, chto choča viarnucca z emihracyi, paraiŭ źviartacca ŭ kamisiju pa viartańni.

Z ulikam asoby Cieracha ŭźnikaje całkam łahičnaje pytańnie: dyk a navošta marhinalnaha prapahandysta na dyskusiju klikać?

«Naša Niva» spytała pra dziŭnuju razmovu ŭ Jurasia Ziankoviča. Toj patłumačyŭ, što jaho paklikaŭ pradziusar kanała.

— Prapanova nakont kankretnaj razmovy ź Ludažoram była jahonaja. Ja skazaŭ, što hatovy razmaŭlać z kim zaŭhodna, bo nie bajusia vostraj dyskusii. Nakolki ja viedaju, toje samaje skazaŭ Ludažor. Tamu vyrašana było piłotnuju prahramu zrabić z nami dvuma.

Juraś dadaje, što byŭ znajomy ź Ludažoram da padziej 2020 hoda, ale zavočna.

— Jon u 2020 hodzie pačaŭ aktyŭna tapić za Łukašenku napiaredadni vybaraŭ. Ja da jaho źviarnuŭsia z pytańniem, čamu, i čym jamu Łukašenka taki darahi. Jon mnie tady raspavioŭ, što jaho ad «bečebešnikaŭ» adšturchnuŭ kanflikt vakoł Kurapataŭ, kali jon jechaŭ byŭ u «Pajedzim pajadzim», i tam narvaŭsia na chamskija ahresiŭnyja pavodziny pikietoŭščykaŭ. Pakolki z hetym kanfliktam ja źviazany jašče z 2017 hodu — i dahetul liču, što prablema była vysmaktanaja z palca i štučna razdźmutaja, — to ŭ hetym u mianie było razumieńnie i spačuvańnie da jaho.

Prynamsi čałaviek zdoleŭ rastłumačyć svaju pazicyju ščyra i praŭdapadobna. Dakładna ŭ jaho vypadku heta nie pra hrošy i nie pra niejkija administratyŭnyja prefierencyi — finansava i biznesova ŭ jaho było ŭsio dobra i biez palityki. Dumaju, što navat lepš było biez palityki, bo palityka ŭ lubym biznesie zaminaje (što za pradprymalnictva ŭ Cieracha, nieviadoma — NN).

Voś z taho času, jak raspavioŭ Ziankovič, jon pieryjadyčna pierapisvajecca, a časam i stelefanoŭvajecca ź Cieracham.

— Jašče ja zaŭvažyŭ, što za čatyry hady, kali Ludažor pisaŭ pra našu spravu, jon ni razu nie zrabiŭ nieetyčnaha vypadu ŭ moj adras i ni razu nie abraziŭ. Jon pisaŭ pa faktach. Heta taksama dla mianie vyrazny sihnał, što čałaviek nie źmiešvaje asabistyja adnosiny z palitykaj. Vielmi važna ŭmieć zachoŭvać čałaviečyja adnosiny navat va ŭmovach vostrych palityčnych kanfliktaŭ. Na žal, siarod dziejačaŭ apazicyi šmat ludziej hetaha nie ŭmiejuć, źmiešvajučy asabistaje z palityčnym. Tym bolš niečakana było sustreć takoje z boku łukašysta.

Na pytańnie, ci zadavoleny jon vynikami dyskusii, Juraś adkazvaje:

— Nie na 100%, bo možna było kančatkova zahnać Ludažora ŭ kut i prymusić jaho pryznać niapravilnaść spasyłak na zakon, kali sam zakon złačynny. Ale liču, što ŭ asnoŭnym mnie ŭdałosia abvierhnuć jahonuju arhumientacyju, pakazać (jahonymi ž słovami), što sudy padpisvajuć usio, što im prynosiać, i (znoŭ-taki jahonymi ž słovami) pakazać, što łukašyzm nastolki słaby, što baicca prostych słoŭ. Režym, jaki baicca słoŭ, nie vytrymaje navat minimalnych aktyŭnych dziejańniaŭ. Heta rośpis u słabaści i razumieńni taho, što padtrymki ŭ hramadstvie niama.

U fejsbuku Ziankoviča napisaŭ pra debaty: «Niekatoryja apazicyjnyja asoby ŭžo dušu źjeli svaimi prośbami «davajcie kruhły stoł», «treba razmaŭlać», «treba pačuć druhi bok», «biez dyjałohu ničoha nie atrymajecca». (…) Dyk voś, my vyrašyli zmadelavać dla vas realny kruhły stoł z machrovym pradstaŭnikom režymu. Voś vam dyjałoh. Hladzicie sami, jak vyhladaje «druhi bok», ź jakim nam prydziecca mieć spravu. (…) Kali vam zdajecca, što «realny kruhły stoł» musiŭ by vyhladać inakš, dyk u mianie dla vas inšaha režymu niama. Heta i jość ichniaja narmalnaść, ichniaja łohika».

Nahadajem, u 2022 hodzie padobnyja debaty praviali pamiž prapahandystam Ryhoram Azaronkam, błohieram Juryjem Cieracham, žurnalistam Dzianisam Dudzinskim i byłym bajpołaŭcam Aleham Talerčykam. Arhanizavaŭ anłajn-sustreču tady jutub-kanał «Płatforma 375» (tam vychodzili i inšyja dyskusii). Vioŭ debaty žurnalist Kirył Paźniak. U vieraśni 2025 hoda jaho aryštavali, a jaho kanał pryznali «ekstremisckim farmiravańniem». Aryštavali i jaho 20‑hadovuju dačku Janinu.

• 6
• 3
• 0
• 16
• 0
• 0
• 0
• 0