Jak 35‑hadovaja Natali Charp stała lubimaj asistentkaj Donalda Trampa

U apošnija hady mała chto z atačeńnia prezidenta ZŠA Donalda Trampa źjaŭlaŭsia pobač ź im tak ža časta, jak jaho asistentka, 35‑hadovaja Natali Charp, piša VVS. 

Natali Charp — adna z daŭnich i samych addanych pamočnic Trampa.

Na hetym tydni jana znoŭ apynułasia ŭ centry ŭvahi praz zajavy apanienta Trampa, sienatara-demakrata ad Džordžyi Džona Osafa. Palityk abrynuŭsia na Trampa z novaj porcyjaj krytyki i zhadaŭ Natali Charp u svajoj pramovie, jakaja šyroka razyšłasia ŭ sacsietkach.

Krytykujučy prezidenta, Osaf zajaviŭ:

«Jon [Tramp] nie choča vykonvać svaju pracu. Jon choča budavać svaju balnuju zału i padarožničać z Natali na ich, sudziačy z usiaho, zusim biezabaronnym latučym pałacy, padaravanym emiram Katara».

Sienatar mieŭ na ŭvazie novy prezidencki samalot Air Force One («Bort numar adzin»), a taksama paviedamleńni žurnalistaŭ pra toje, što Charp, imavierna, razam z Trampam lacieła sakretnym rejsam z Turcyi paśla samitu NATA.

Raniej amierykanskaja presa raspaviała, što Tramp, vylatajučy z Ankary ŭ pačatku lipienia, vykarystaŭ furhon dla bartavoha charčavańnia, kab niezaŭvažna pierasieści z «Borta numar adzin» na «Bort numar dva». Palot sakretnym rejsam, jak paviedamlali ŚMI, byŭ źviazany ź mierkavanaj pahrozaj z boku Irana.

Ankałahičnaje zachvorvańnie i niezvyčajny šlach u Bieły dom

Natali Charp naradziłasia ŭ Kalifornii ŭ chryścijanskaj siamji, jakaja prytrymlivajecca kansiervatyŭnych pohladaŭ. Jaje šlach u Bieły dom možna nazvać nietypovym.

Jana stała viadomaja dziakujučy tamu, što prypisała Trampu ratavańnie svajho žyćcia.

U svaju pieršuju kadencyju Tramp damohsia pryniaćcia Zakona pra prava na ekśpierymientalnaje lačeńnie, jaki daŭ pacyjentam bolš šyroki dostup da ekśpierymientalnych mietadaŭ lačeńnia. Charp tady zmahła skarystacca hetaj mahčymaściu i prajści lačeńnie ad raku kostak z dapamohaj ekśpierymientalnych mietadaŭ, bo tradycyjnaja chimijaterapija ŭ jaje vypadku nie dała stanoŭčych vynikaŭ.

«Kali chimijaterapija, jakaja była dastupnaja, nie dała vyniku, nichto nie chacieŭ mianie brać dla ŭdziełu ŭ kliničnych vyprabavańniach […] Jany nie dali mnie prava pasprabavać ekśpierymientalnyja mietady lačeńnia, spadar prezident. Vy dali, i biez vas ja b pamierła, čakajučy ich dazvołu», — skazała jana na Nacyjanalnym źjeździe Respublikanskaj partyi 2020 hoda.

Paśla mierapryjemstva Tramp skazaŭ, što Natali Charp svaim źjaŭleńniem «azaryła teleekran tak, jak mała chto» z tych, kaho jon bačyŭ.

Natali Charp, jakaja šmat raspaviadała pra svoj dośvied lačeńnia i vykazvała ŭdziačnaść Trampu, chutka zapomnili ŭ kryle MAGA («Vierniem Amierycy byłuju vielič» — Make America Great Again) Respublikanskaj partyi.

Pavialičyć

Nieŭzabavie jana ŭvajšła ŭ kansultatyŭnuju radu štaba padčas pieradvybarčaj kampanii Trampa 2020 hoda.

«Najbolšaja prychilnica Trampa»

Paśla paražeńnia Trampa na vybarach 2020 hoda Charp uładkavałasia viadučaj na pravakansiervatyŭny navinavy kabielny telekanał One America News Network (OAN).

Tam jana stała viadomaja jak addanaja abaronca Donalda Trampa, jakaja da taho ž śćviardžała, što jon nibyta pieramoh na vybarach 2020 hoda.

Jana pakinuła telekanał u 2022 hodzie, kab dałučycca da nastupnaj prezidenckaj kampanii Trampa.

Bolšaść źviestak pra staŭleńnie Trampa da Charp — z ananimnych krynic, jakija zhadvajuć u svaich knihach takija žurnalisty jak Mehi Chabierman, Džonatan Svon abo Majkł Volf. Pra asabistaje žyćcio Natali Charp amal ničoha nieviadoma.

Jaje brat Prestan Charp u intervju CNN tłumačyŭ niezvyčajnuju addanaść svajoj siastry Trampu tym, što ciapierašni prezident uvasablaje ŭ sabie ŭsio toje, što ich maci vučyła pavažać u žyćci.

«Tamu ja dumaju, što mienavita adtul, sumlenna kažučy, i biarecca jaje zachapleńnie Trampam», — skazaŭ Prestan Charp.

Jon dadaŭ, što Charp ź junych hadoŭ była apantanaja idejaj pracavać u Biełym domie i pisała listy papiarednim prezidentam, uklučajučy Džordža Buša-małodšaha padčas vajny ŭ Iraku.

U intervju CNN brat Charp skazaŭ, što jaje «mara ŭ rešcie rešt ažyćciaviłasia», kali jana patrapiła ŭ Bieły dom, i što jaho siastra była «najbolšaj prychilnicaj Trampa, tamu, vierahodna, jana jamu i padabajecca».

«Jana pryhožaja, u jaje dobry charaktar. Jana dumaje, što jon vyratavaŭ joj žyćcio, tak što čałaviek, u dačynieńni da jakoha adčuvajuć takuju ŭdziačnaść, musić, adčuvaje siabie vielmi dobra», — skazaŭ jon.

Aficyjnaja pasada Charp u Biełym domie — vykanaŭčy asistent prezidenta, heta pasada nie nastolki vysokaha ŭzroŭniu, jakaja praduhledžvaje kiravańnie łahistykaj, płanavańniem, patokam kamunikacyi.

Adnak, vyhladaje, Charp nadała hetaj roli novaje značeńnie, i jaje aŭtarytet značna vyšejšy, čym u jaje papiarednic, takich jak Madlen Viesterchut u pieršaj administracyi Trampa.

Jaki ŭpłyŭ na Trampa maje Natali Charp

Kali na hetym tydni reparciorka CNN Krysten Chołms spytała Trampa pra kamientary Osafa, prezident ZŠA abrynuŭsia na jaje z krytykaj. «Vy pavodzicie siabie vielmi niepavažliva… Fejkavyja naviny, vy — fejkavyja naviny […] Vy — falšyvaja žurnalistka i paviedamlajecie fejkavyja naviny», — tak adreahavaŭ Tramp na pytańnie žurnalistki.

Bieły dom paźniej na svajoj aficyjnaj staroncy ŭ X apublikavaŭ videazapis razmovy Trampa z žurnalistkaj, abvinavaciŭšy jaje ŭ tym, što jana vykarystała «tanny» i hruby pryjom u svajoj pracy.

«Adnojčy vašy dzieci daviedajucca pra vaša ahidnaje i biesčałaviečnaje pytańnie. Im budzie niepryjemna i soramna bačyć, jak adzin z baćkoŭ prajaŭlaje takoje biessardečnaść», — havaryłasia ŭ inšym poście, jaki byŭ adrasavany Chołms.

Pamočnica Trampa Natali Charp amal nieadłučna znachodzicca pobač z prezidentam Donaldam Trampam padčas jaho druhoha terminu.

Reparciory ŭ Biełym domie časta bačać jaje ŭsiaho ŭ niekalkich krokach ad Trampa ŭ Avalnym kabiniecie abo na borcie Air Force One padčas mnohich jaho ŭnutranych i mižnarodnych pajezdak.

«Jana zaŭsiody pobač. Litaralna zaŭsiody», — paviedamiła Bi-bi-si krynica, blizkaja da Biełaha doma.

Pavialičyć

Siarod nabližanych da Biełaha doma i pradstaŭnikoŭ presy jaje časta nazyvajuć «žyvym pryntaram», bo jaje časta bačać z partatyŭnym pryntaram, jaki joj patrebny dla taho, kab razdrukoŭvać Trampu na papiery artykuły i paviedamleńni z sacyjalnych sietak — pakolki jon addaje pieravahu čytańniu publikacyj na papiery.

Heta aznačaje, što Charp, vierahodna, vałodaje vialikimi mahčymaściami, kab kantralavać, jakuju mienavita infarmacyju i jakija paviedamleńni atrymlivaje Tramp, adznačaje inšaja krynica, znajomaja z pracaj Biełaha doma.

Inšyja ananimnyja krynicy apisvali jaje amierykanskim ŚMI jak «bramnika» i «lubimuju cacku» prezidenta.

Charp taksama vystupaje ŭ roli svajho rodu sakratara Trampa ŭ sacyjalnych sietkach: jana publikuje paviedamleńni ŭ jaho akaŭncie Truth Social ad jaho imia.

Na adnym ź videa, jakoje šyroka razyšłosia ŭ sacsietkach paśla kamientaroŭ Osafa, Charp zafiksavanaja ŭ toj momant, kali nabiraje tekst dla sacsietak pad dyktoŭku Trampa, jaki sočyć za vystupleńniem Kamały Charys u 2024 hodzie.

Na fonie niadaŭniaj uvahi da Charp Bieły dom zajaviŭ, što jana źjaŭlajecca «davieranym i kaštoŭnym» členam kamandy, choć sam Tramp redka kazaŭ pra jaje pierad telekamierami.

Osaf byŭ adnym z mnohich krytykaŭ Trampa, jakija adznačyli, što Charp, jak paviedamlajecca, znachodziłasia na borcie samalota, na jakim prezident vylecieŭ z Turcyi paśla taho, jak ZŠA nibyta atrymali infarmacyju pra pahrozu z boku Irana.

Kali žurnalistku Mehi Chabierman, jakaja šmat pisała i praciahvaje pisać pra prezidenctva Trampa, padčas intervju spytali, čamu Tramp, vylatajučy z Turcyi sakretnym rejsam, uziaŭ Charp z saboj na «Bort numar dva», jana adkazała: «Tamu što jana dla jaho, kali možna tak vykazacca, jak soska-pustyška, jak lubimaja ciopłaja koŭdračka, lubimaja cacka — adnym słovam, toje, što stvaraje adčuvańnie kamfortu i spakoju».

Chabierman i Džonatan Svon u 2024 hodzie paviedamili ŭ publikacyi ŭ New York Times, što Charp nibyta napisała ŭ liście Trampu: «Vy — usio, što maje dla mianie značeńnie».

• 0
• 0
• 0
• 0
• 1
• 0
• 0
• 0