Kitaj stvoryć «Vialikuju zialonuju ścianu» z hryboŭ. I inšuju — z bambuku

Dehradacyja ŭradlivych ziamiel na poŭnačy Kitaja — vyklik, ź jakim kraina zmahajecca ŭžo bolš za paŭstahodździa. Praźmierny vypas žyvioły, vysiakańnie lasoŭ i hłabalnaje paciapleńnie pryviali da taho, što vielizarnyja terytoryi pačali pieratvaracca ŭ pustyniu. Kab spynić hety praces, jašče ŭ 1970‑ch hadach była zapuščana maštabnaja prahrama «Try poŭnačy», viadomaja va ŭsim śviecie jak «Vialikaja zialonaja ściana».

Dziesiacihodździami navukoŭcy vykarystoŭvali roznyja sposaby ŭtajmavańnia piaskoŭ. Jak raskazvaje South Cina Morning Post, samym papularnym mietadam byli sałamianyja sietki, jakija ŭkładvalisia na dziuny. Adnak sałoma — materyjał nietryvały, jana zhnivaje za dva-try hady.

Płastykavyja barjery, jakija sprabavali vykarystoŭvać paźniej, choć i byli tryvałymi, stvarali ekałahičnuju pahrozu, bo hety štučny materyjał patrabuje vielmi šmat času dla poŭnaha raskładańnia. Navat vysadka niekatorych vidaŭ kustoŭ i dreŭ akazałasia prablemnaj, bo pyłok mnohich ź ich spravakavaŭ usplosk alerhičnych zachvorvańniaŭ u miascovych žycharoŭ.

Sučasnyja patrabavańni da ekałohii i ekanomiki prymusili kitajskich daśledčykaŭ šukać bolš efiektyŭnuju alternatyvu. Vybar upaŭ na bambuk — adnu z samych chutkarosłych raślin na płaniecie. Kitaj vałodaje vielizarnymi resursami hetaj kultury, što robić jaje vykarystańnie tannym i dastupnym.

Novaja stratehija, zamacavanaja ŭ dziaržaŭnym płanie da 2030 hoda, pryniatym u lipieni hetaha hoda, praduhledžvaje zamienu płastyku i sałomy na bijaraskładalnyja vyraby z bambuku. Navukoŭcy raspracavali technałohiju placieńnia ź jaho tryvałych kvadratnych kanstrukcyj dla fiksacyi ruchomych piaskoŭ i vysokich viertykalnych barjeraŭ. Akramia taho, z bambukavaha vałakna stvarajucca śpiecyjalnyja jomistaści dla zboru i ŭtrymańnia daždžavoj vady, što krytyčna važna ŭ zasušlivym klimacie.

Pavodle acenak śpiecyjalistaŭ, bambukavyja barjery majuć šerah biassprečnych pieravah. U adroźnieńnie ad sałomy jany značna bolš daŭhaviečnyja i mohuć vykonvać svaju achoŭnuju funkcyju ad 3 da 10 hadoŭ. U paraŭnańni z płastykavymi barjerami bambukavyja źjaŭlajucca adnaŭlalnymi, bijaraskładalnymi i ŭstojlivymi ŭździejańnia soniečnaha śviatła.

Akramia taho, prymianieńnie bambuku zabiaśpiečvaje istotnuju ekanomiju, dazvalajučy źnizić ahulnyja vydatki na baraćbu z apustyńvańniem bolš čym na 20%.

Novaje rašeńnie ŭžo było pratestavana ŭ pravincyi Cynchaj i aŭtanomnym rajonie Unutranaja Manholija. Daśledčyki ličać, što bambukavyja kanstrukcyi ŭ budučyni mohuć zamianić jak sałamianyja, tak i płastykavyja barjery i mohuć być adaptavanyja pad roznyja typy hlebaŭ i klimatyčnyja ŭmovy.

Vykarystańnie bambuku — nie adzinaje rašeńnie, jakoje razhladajuć kitajskija navukoŭcy. Siarod inšych pierśpiektyŭnych mietadaŭ —vyroščvańnie ŭ piasčanych rajonach jadomych hryboŭ. Heta dapamoža nie tolki strymać pustyniu, ale i ŭzbahacić źbiadniełuju hlebu arhaničnymi rečyvami.

• 6
• 0
• 0
• 0
• 0
• 0
• 0
• 0