Cichanoŭski: Jutub vypłaciŭ mnie amal $40 tysiač rekłamnaha dachodu, naličanaha jašče za 2020 hod

Były palitviazień Siarhiej Cichanoŭski adreahavaŭ na publikacyju «Našaj Nivy» pra adznačańnie im u Łos-Andželesie dnia naradžeńnia. Jaho aburyła toje, što ŭ zahałoŭku prysutničała słovazłučeńnie «z razmacham».

Jak śćviardžaje Cichanoŭski, asabista jon patraciŭ na hety viečar usiaho $130 — na haziroŭku i niekalki plašak ałkaholu. Pamiaškańnie jamu dapamahli arhanizavać siabry, jakija taksama prynieśli niekalki tartoŭ i jabłyki. Śviatkavańnie prachodziła ŭ zvyčajny budny dzień, a sabrałasia na jaho kala 50 čałaviek. Tamu nijakaha razmachu, maŭlaŭ, nie było. 

Adnak hetaja situacyja stała dla Cichanoŭskaha nahodaj, kab parazvažać uvohule pra hrošy i finansavańnie. 

«Ja nie atrymlivaju hrantaŭ na svoj kanał i nikoli ich nie atrymlivaŭ. Pry hetym praca niekatorych ludziej na maim kanale apłačvałasia za košt hrantavaha finansavańnia, ahulny abjom jakoha składaŭ €10 000 na miesiac, heta značyć €120 000 na hod. Siońnia niekatoryja ź ich kažuć, što heta byŭ vyklučna «zarobak», zamoŭčvajučy krynicu hetaha finansavańnia i adnačasova raskazvajučy aŭdytoryi pra toje, jakija hranty nibyta atrymaŭ ja», — piša Cichanoŭski.

«I kali ŭžo ŭźnikła pytańnie, adkul u mianie hrošy na žyćcio ŭ ZŠA i na toj samy nievierahodny «razmach» za $130, adkažu adkryta.

Niadaŭna YouTube vypłaciŭ mnie trochi mienš za $40 000 rekłamnaha dachodu, naličanaha jašče za 2020 hod. Akramia taho, paśla majho vyzvaleńnia mnie dapamahali pradstaŭniki biełaruskaj dyjaspary i biznesu — ludzi, jakija ceniać toje, što ja zrabiŭ. Ja im za hetuju dapamohu ščyra ŭdziačny», — praciahvaje jon svaju finansavuju spravazdaču.

A paśla taho rezka krytykuje ŚMI i błohieraŭ, jakija «atrymlivajuć finansavańnie ad jeŭrapiejskich i inšych zachodnich arhanizacyj», ale, na jaho dumku, nie rupiacca pra «zachavańnie chacia b bazavych žurnalisckich standartaŭ». Tamu ŭ Siarhieja Cichanoŭskaha saśpieła ideja sabrać pabolš takich faktaŭ i pasłać ich «zachodnim partnioram», kab tyja «ŭličvali jakaść i adkaznaść atrymalnikaŭ pry pryniaćci rašeńniaŭ pra dalejšaje finansavańnie».

Adnamu takuju zadaču paciahnuć ciažka, tamu Cichanoŭski prosić padtrymki svajoj inicyjatyvy ŭ hramadskaści, zaklikajučy jaje źbirać i vysyłać jamu «fakty, spasyłki i dokazy». Kali ž ich naźbirajecca ŭdostal, to tady ŭ płanach «sistematyzavać i pieradać tym arhanizacyjam, jakija prymajuć rašeńni pra finansavańnie», a «kali budzie patreba — možna budzie abmierkavać i kalektyŭny zvarot ci pietycyju».

• 16
• 4
• 8
• 21
• 3
• 0
• 1
• 0