«Pipiec… A padciracca čekam?» Biełarusy abmiarkoŭvajuć kviest z naviedvańniem prybiralni na vakzale ŭ Dokšycach
Pasažyry mižharodnich aŭtobusaŭ aburanyja absurdnaj sistemaj dostupu da prybiralni na aŭtastancyi ŭ Dokšycach. Pra situacyju ŭ Threads raspaviała adna z padarožnic, paśla čaho historyja padniała chvalu abmierkavańnia servisu na biełaruskich aŭtavakzałach, piša BGmedia.
«Jak tudy trapić?»
Biełaruska raspaviała pra niezvyčajnuju sistemu apłaty tualeta na aŭtastancyi ŭ Dokšycach. Svaimi ŭražańniami jana padzialiłasia ŭ Threads.
Pavodle jaje słoŭ, tualet na aŭtastancyi płatny — naviedvańnie kaštuje až 1 rubiel 10 kapiejek. Ale prablema, śćviardžaje žančyna, nie stolki ŭ samoj płacie, kolki ŭ tym, jak trapić unutr.
Spačatku pasažyru treba źviarnucca ŭ kasu aŭtastancyi i apłacić naviedvańnie. Paśla hetaha jamu vydajuć kluč ad mužčynskaha ci žanočaha tualeta. Ček za takuju apłatu, jak śćviardžaje aŭtarka publikacyi, jana nie atrymała.
Dla čałavieka, jaki padarožničaje rejsavym aŭtobusam i maje ŭsiaho niekalki chvilin na prypynku, takaja pracedura pieratvarajecca ŭ sapraŭdnuju honku.
«Pakolki Dokšycy stajać na takoj trasie, dzie pierasiakajucca mnohija maršruty, to ŭ kasie źbirajecca čarha pa kluč u mužčynski i žanočy tualet», — raspaviała biełaruska.
Pavodle jaje słoŭ, adny pasažyry złujucca, bo bajacca spaźnicca na aŭtobus, inšyja śmiajucca z absurdnaści situacyi.
«Chto złujecca, što nie paśpieje, bo ŭ mnohich stajanka piać chvilin, chto śmiajecca, bačačy absurd situacyi», — napisała jana.
Aŭtastancyja ŭ Dokšycach absłuhoŭvaje mižharodnija maršruty. U aktualnych raskładach praź jaje prachodziać, u pryvatnaści, rejsy ŭ Minsk i inšyja harady.
«Heta ździek ź ludziej»
Historyja chutka vyklikała reakcyju karystalnikaŭ. Bolšaść ubačyła ŭ joj zusim nie śmiešnuju prablemu.
«Prosta aniekdot jakiści. I było b śmiešna, ale nie śmiešna, bo ździek ź ludziej».
«Kapiec… A padciracca čekam?»
«Kaniečnie. Sama situacyja absurdnaja ŭ 2026 hodzie. Navat kali tualet płatny, možna ž zrabić apłatu kartkaj, kab ludzi nie biehali pa stancyi i nie šukali, jak apłacić».
«Ja naohuł nie razumieju, jak u naš čas isnuje taki absurd. Heta ž žyćciova nieabchodna».
Miarkujučy z kamientaroŭ, Dokšycy — nie adzinaje miesca, dzie pasažyru davodzicca spačatku iści ŭ kasu, a ŭžo potym šukać tualet.
Adna z karystalnic raspaviała, što padobnaja situacyja isnuje ŭ Kruhłym. Tam za tualet taksama treba zapłacić u kasie aŭtavakzała, atrymać kluč, skarystacca tualetam, a potym viarnuć kluč. Roźnica tolki ŭ canie — pavodle jaje słoŭ, naviedvańnie kaštuje 20 kapiejek.
Pry hetym jość jašče adna prablema: tualet pracuje pa hrafiku samoj aŭtastancyi. Paśla 17:00 u budni pasažyram davodzicca šukać inšaje miesca.
«A paśla 17:00 čakajcie maršrutku na dvary, i dzie tualet znajści ŭ centry horada — taksama zahadka», — napisała žančyna.
Inšyja ŭdzielniki abmierkavańnia pryznalisia, što sutykalisia z padobnymi situacyjami i na inšych aŭtastancyjach.
Padobnaja historyja ŭspłyła i ŭ Niaśvižy. Adna z pasažyrak raspaviadała, što tualet na aŭtastancyi ŭžo byŭ začynieny a 18:00. U vodhukach pra aŭtastancyju Niaśviža taksama sustrakajucca zaŭvahi z nahody tualeta: karystalniki pišuć, što jon płatny i ŭ niekatorych vypadkach raźličycca možna tolki hatoŭkaj.
Padobnyja skarhi hučać i ŭ dačynieńni da inšych biełaruskich aŭtastancyj.
Naprykład, u 2025 hodzie karystalniki Threads abmiarkoŭvali stan aŭtastancyi ŭ Pastavach. Budynak vyhladaŭ nastolki zakinutym, što ŭ niekatorych uźnikała pytańnie, ci pracuje jon naohuł. Miascovyja žychary pryznavalisia, što im niajomka za adzin ź pieršych abjektaŭ, jaki bačać tyja, chto pryjazdžaje ŭ horad.
«Mnie za naš pastaŭski aŭtavakzał soramna. Heta hańba horada!» — napisaŭ adzin z kamientataraŭ.
U kamientarach žychary inšych haradoŭ Viciebskaj vobłaści raili źviarnuć uvahu i na svaje aŭtastancyi:
«Vy ŭ Miory jašče zajdzicie».
«Vy Hłybocki nie bačyli!»
«U Vierchniadźvinsku nie byli?»
Kamientary