Rasijanie sapraŭdy stali čaściej kuplać nieruchomaść u Biełarusi? Voś što raskazvajuć ryełtary
Kali raniej dola zamiežnikaŭ siarod pakupnikoŭ kvater zaŭždy była mizernaj, to apošnim časam nazirajecca peŭny rost. Pierš za ŭsio za košt rasijan.
Popyt vyras, ale nakolki?
Pa vynikach sakavika 2026 hoda, kožnuju 10‑iu kvateru ŭ Minsku nabyli hramadzianie Rasii. Dla paraŭnańnia, u 2019‑m na dolu rasijan prychodziłasia kala 1,5% ździełak, a ŭ 2021‑m — 3%, tamu rost sapraŭdy zaŭvažny.
Kiraŭnik departamienta raźvićcia sietki i mižrehijanalnych ździełak ryełtarskaj kampanii «Pavierchi» Volha Pałoŭnikava ŭ kamientary RIA «Navinam» u mai hetaha hoda kazała, što popyt rasijan na kuplu žylla ŭ Minsku vyras za hod na 10—15%.
Dola rasijan u ahulnym abjomie ździełak z žyłoj nieruchomaściu ŭ Minsku, pa jaje słovach, ciapier aceńvajecca ŭ 8—10%, tady jak hod tamu pakazčyk byŭ na ŭzroŭni 2—3%.
Pry hetym, pa słovach śpiecyjalistki, kolkaść prahladaŭ abjaŭ ab prodažy abo arendzie nieruchomaści ŭ Biełarusi ŭ pieršym kvartale 2026 hoda vyrasła ŭ 2‑3 razy ŭ paraŭnańni z anałahičnym pieryjadam minułaha hoda.
Siarod inšych uskosnych prykmiet rostu popytu z boku rasijan možna nazvać toj fakt, što z kanca maja bank BiełVEB zapuściŭ dla hramadzian Rasii servis pa bieznajaŭnym pieravodzie hrošaj dla kupli nieruchomaści ŭ Biełarusi.
Aproč taho, u internecie možna navat znajści sajt rasijskaha ryełtarskaha ahienctva, jakoje prapanuje svaim klijentam kuplu elitnaj nieruchomaści ŭ Biełarusi. Jak dla pražyvańnia, tak i dla inviestavańnia z prybytkovaściu ŭ 15%.
Nie ŭsio tak adnaznačna
Mierkavańni ž biełaruskich ryełtaraŭ adnosna popytu z boku rasijan roznyja. Adzin sa śpiecyjalistaŭ adznačyŭ, što nie skazaŭ by, što rasijan cikavić vyklučna darahoje žyllo premium-kłasa. Bolšaść zapytaŭ, jakija dachodziać da jaho, adnosiacca da biudžetnaha siehmienta.
Tamu vysnovu, što rasijanie ŭpłyvajuć tolki na košt žytła ŭ premium-siehmiencie, jon ličyć pamyłkovaj.
Inšy ryełtar naohuł nazyvaje ŭpłyŭ rasijan na biełaruski rynak pierabolšvańniem. Maŭlaŭ, z 50—70 ździełak štohod tolki 1—3 — z pakupnikami z Rasii.
Taksama śpiecyjalist adznačyŭ, što siarod rasijan ciapier jość stabilny zapyt na kuplu viaskovych chat za 2—3 tysiačy dalaraŭ, kab možna było aformić biełaruski DNŽ.
Čaściej za ŭsio rasijanie robiać heta ź dźviuch pryčyn. Pieršaja — kab mieć biełaruskija dakumienty i niejki kutok, kudy možna ŭciačy ŭ vypadku paharšeńnia vajennaj situacyi. Druhaja — kab kuplać aŭtamabili na biełaruskich numarach i tym samym abychodzić nieabchodnaść płacić šaleny ŭtylzbor za mašyny z ruchavikom, mahutniejšym za 160 k.s.
Cikavić rasijanaŭ nieruchomaść nie tolki ŭ Minsku, ale i ŭ inšych haradach Biełarusi. Pierš za ŭsio ŭ Hrodnie i Breście.
Rasijanie ruchajucca maksimalna na Zachad
Ryełtar z Hrodna kaža, što kolkaść pakupnikoŭ z Rasii navat u samyja lepšyja miesiacy nie pieravyšała 10%, tamu jon nie ličyć, što jany niejak mohuć upłyvać na rost cen na miascovym rynku. Tym bolš, što rasijanie čas ad času nabyvali kvatery ŭ Hrodnie i da 2022 hoda.
Sa słoŭ śpiecyjalista, sapraŭdy adčuvalny rost popytu naziraŭsia tolki ŭ kancy 2022 hoda, kali ŭ Rasii abjavili mabilizacyju. Maŭlaŭ, tady sapraŭdy byŭ nievialiki pieryjad, kali rasijan siarod pakupnikoŭ było adnosna šmat.
Taksama, pa nazirańniach ryełtara, na popyt moža ŭpłyvać vysoki košt nieruchomaści. Bo rasijanie ź nieabmiežavanaj kolkaściu hrošaj — heta chutčej stereatyp, choć časam sapraŭdy byvaje, što jany nabyvajuć darahija abjekty.
Bolšaść ža razhladaje zvyčajnyja siaredniestatystyčnyja kvatery, bo sapraŭdy bahatyja ludzi z Rasii imknucca nabyvać nieruchomaść usio ž nie ŭ Biełarusi.
Ryełtar kaža, što choć popyt i padros, kuplajuć kvatery rasijanie nie vielmi aktyŭna, a jak kurs rasijskaha rubla pačaŭ prasiadać, to nieruchomaść u Biełarusi dla ich taksama padaražeła.
Padobnuju karcinu apisvaje brescki ryełtar, jaki adznačaje peŭny rost cikavaści z boku rasijan, ale praz vysoki košt (Brest — samy darahi abłasny centr) mnohija ŭ vyniku ničoha tak i nie nabyvajuć.
Upłyŭ z boku zamiežnych pakupnikoŭ jon nazyvaje minimalnym.
Atrymlivajecca, što popyt z boku rasijan sapraŭdy padros, ale ryełtary sychodziacca na dumcy, što nie nastolki mocna, kab možna było kazać, što nieruchomaść u Biełarusi daražeje mienavita praz pakupnikoŭ z Rasii.
Što da ahulnych ličbaŭ, to na ich sapraŭdy mahli paŭpłyvać ździełki ź niedarahimi abjektami, jakija kuplajuć rasijanie dla afarmleńnia DNŽ.
Da taho ž, kala 3% prodažaŭ prychodziłasia na rasijan i ŭ 2021-m, kali nie było nijakaha ŭpłyvu na rynak ad vajny. Taksama treba ŭličvać, što častka hramadzian Rasii, jakaja kuplaje nieruchomaść, — heta ludzi, jakija daŭno ci navat usio žyćcio žyvuć u Biełarusi.
Ciapier čytajuć
Jamu vybili čatyry zuby, a paśla vykinuli z krainy. Ciapier byłoha palitviaźnia aryštavali ŭ Łatvii z šaściu mihrantami ŭ mašynie4
Kamientary