«Kab rabić rečy, u jakich ja słaby». Stvaralnik Linux patłumačyŭ, čamu lubić ŠI i jaki mienavita

«Napraŭdu, mnie vielmi padabajecca vykarystoŭvać ŠI», — adznačyŭ jon u razmovie sa svaim siabram i kiraŭnikom Ericsson Dzirkam Chondełam.

Ale adrazu ahavaryŭsia, što treba «vielmi aściarožna vykarystoŭvać ŠI, kali robiš niešta realnaje i važnaje». Choć pryznaŭ, što tak było nie zaŭsiody i raniej jon staviŭsia da ŠI-prahramavańnia skieptyčna.

Jon dadaŭ, što nie vielmi šmat piša kodaŭ dla jadra.

«Kali ščyra, ja nie asabliva zajmajusia napisańniem kodaŭ dla jadra. Ja miejntejnier. Jadro Linux — heta prajekt, dzie realnuju pracu robiać inšyja ludzi, a ja vystupaju punktam zboru. Ale ja ŭsio jašče atrymlivaju vielizarnaje zadavalnieńnie ad prahramavańnia.

Ja miarkuju, što ŠI — heta vydatny instrumient, kali vykarystoŭvać jaho pravilna i stavicca da jaho mienavita jak da instrumienta, i dla mianie kodzić ź im našmat pryjemniej», — skazaŭ Torvalds.

Jon dadaŭ, što pačaŭ prahramavać pryblizna ŭ 1981 hodzie, kali kampjutary i prahramy, ź jakimi možna było paraŭnać svaje prahramy, byli našmat praściejšyja. Siońnia, pavodle jaho słoŭ, usio inakš.

«Płanka ŭ raspracoŭcy PZ padniałasia nastolki vysoka, što ciažka bačyć u svaich ułasnych nievialikich namahańniach choć niešta vartaje, tamu što ty zvyk da ŭsich hetych adpaliravanych, prafiesijnych prahram. …

Mnohija naśmichajucca z vajb-kodzinhu, ale ja liču, što heta vydatny sposab znajści radaść u prahramavańni. Heta daje tabie pačućcio, što ty robiš niešta značnaje. Heta dazvalaje navičkam u prahramavańni rabić rečy, jakim inakš było b vielmi ciažka dać rady», — praciahnuŭ Torvalds.

Jon dadaŭ, što jamu padabajecca pohlad na ŠI jak na «ŭvachodny narkotyk». Jon raskazaŭ pra svoj pet-prajekt — hitarnuju piedal.

«I ja razumieŭ, što rablu. U mianie byŭ karystalnicki interfiejs, jaki ja sam napisaŭ na C, jon pracavaŭ na mikrakantrolery i vyvodziŭsia na hety maleńki ekran, i ja padumaŭ: «Heta prosta hłupstva. Vonkava vyhladaje jak niešta z 80-ch». Ja chacieŭ, kab heta vyhladała sučasna. Ale ja nie pišu na Java. Ja zajmajusia jadrami», — padzialiŭsia Torvalds.

«Tamu ja vykarystoŭvaju ŠI, kab rabić rečy, u jakich ja słaby», — dadaŭ jon.

Torvalds užo prymianiaje ŠI ŭ pracy nad jadrom Linux: niadaŭniuju ekśpierymientalnuju halinu dla aptymizacyi pamiaci jon pisaŭ z dapamohaj Claude Code. U supravadžalnym liście da patča jon paviedamiŭ, što kod, testy i pieršy čarnavik dakumientacyi byli zroblenyja ŠI-pamočnikam pad jaho kantrolem.

Pry hetym Torvalds pryznaje, što ŭ ŠI-instrumientaŭ jość i advarotny bok. Naprykład, miejntejnieraŭ zavalvajuć sumnieŭnymi bah-repartami i paviarchoŭnymi praŭkami.

• 6
• 0
• 0
• 0
• 0
• 0
• 0
• 0