U vieraśni Polšča dała mižnarodnuju abaronu 24 hramadzianam Biełarusi

Jak vynikaje sa spravazdačy Upraŭleńnia pa spravach zamiežnikaŭ, 21 čałaviek atrymaŭ status biežanca, jašče troje — status dadatkovaj abarony. U mižnarodnaj abaronie admovili 52 hramadzianam Biełarusi, a razhlad 12 spraŭ byŭ prypynieny, piša Reform.news.

Usiaho za vierasień upraŭleńnie razhledzieła 88 spraŭ hramadzian Biełarusi.

U paraŭnańni sa žniŭniem kolkaść stanoŭčych rašeńniaŭ źmienšyłasia. Tady ich było 36, a kolkaść admoŭ zastałasia prykładna na tym ža ŭzroŭni.

U lipieni mižnarodnuju abaronu atrymali tolki 14 biełarusaŭ, u toj čas jak 82 čałavieki atrymali admoŭnyja rašeńni.

U červieni stanoŭčyja rašeńni vynieśli ŭ dačynieńni da 25 čałaviek, a ŭ mižnarodnaj abaronie admovili 52 hramadzianam Biełarusi.

Usiaho z pačatku hoda Upraŭleńnie pa spravach zamiežnikaŭ vyniesła rašeńni pa 1098 spravach biełaruskich zajaŭnikaŭ, jakija prosiać prytułku. U studzieni — vieraśni status biežanca atrymali 302 hramadzianiny Biełarusi, dadatkovuju abaronu — 380 čałaviek, 266 biełarusam admovili ŭ mižnarodnaj abaronie, a razhlad 150 spraŭ spynili.

Na 1 kastryčnika ŭpraŭleńnie praciahvała razhladać 3212 spraŭ biełarusaŭ, u tym liku 2914 — u pieršaj instancyi i 289 — u druhoj. Za vierasień kolkaść spraŭ u pieršaj instancyi skaraciłasia na 40, a ŭ druhoj — vyrasła na 31. Ahulnaja kolkaść spraŭ biełarusaŭ, jakija razhladaje ŭpraŭleńnie, za vierasień nie źmianiłasia.

Dakumienty, jakija dajuć prava na znachodžańnie ŭ Polščy, na 1 kastryčnika mieli 129,83 tysiačy hramadzian Biełarusi. Za žnivień ich kolkaść skaraciłasia na 1589 čałaviek. Heta moža być źviazana sa skančeńniem terminu dziejańnia vidaŭ na žycharstva i praciahłymi pracedurami ich razhladu.

Na 1 kastryčnika biełarusy ŭ Polščy mieli:

• 74 573 časovyja dazvoły na žycharstva;
• 41 152 pastajannyja dazvoły na žycharstva;
• 9748 statusaŭ dadatkovaj abarony;
• 2700 statusaŭ doŭhaterminovych rezidentaŭ ES;
• 1272 statusy biežanca;
• 210 čałaviek znachodzilisia ŭ krainie na ŭmovach časovaj abarony;
• 176 čałaviek mieli inšyja statusy (to-bok ahułam — 129 831 čałaviek).

Za vierasień Upraŭleńnie pa spravach zamiežnikaŭ vyniesła 1868 stanoŭčych rašeńniaŭ pa vydačy časovych dazvołaŭ na žycharstva, 281 — pa vydačy pastajannych dazvołaŭ na žycharstva i 108 — pa nadańni statusu doŭhaterminovaha rezidenta ES.

U vieraśni ŭpraŭleńnie admoviła ŭ vydačy časovaha dazvołu na žycharstva 147 zajaŭnikam ź Biełarusi, u vydačy pastajannaha dazvołu na žycharstva — 102, a ŭ nadańni statusu doŭhaterminovaha rezidenta ES — 17 hramadzianam Biełarusi.

Z pačatku hoda časovyja dazvoły na žycharstva atrymali 17 480 biełarusaŭ, pastajannyja — 2759, a status doŭhaterminovaha rezidenta ES — 810 hramadzian Biełarusi.

Sioleta ŭpraŭleńnie taksama vydała hramadzianam Biełarusi 5680 polskich prajaznych dakumientaŭ. Ich možna atrymać u sproščanym paradku, kali zakančvajecca termin dziejańnia biełaruskaha pašparta, a viarnucca na radzimu dla jaho zamieny pa roznych pryčynach niemahčyma.

Upraŭleńnie prahnazuje, što pa vynikach hoda kolkaść vydadzienych prajaznych dakumientaŭ moža pieravysić 7,5 tysiačy.

• 0
• 0
• 0
• 0
• 0
• 0
• 0
• 0