У верасні Польшча дала міжнародную абарону 24 грамадзянам Беларусі

Як вынікае са справаздачы Упраўлення па справах замежнікаў, 21 чалавек атрымаў статус бежанца, яшчэ трое — статус дадатковай абароны. У міжнароднай абароне адмовілі 52 грамадзянам Беларусі, а разгляд 12 спраў быў прыпынены, піша Reform.news.

Усяго за верасень упраўленне разгледзела 88 спраў грамадзян Беларусі.

У параўнанні са жніўнем колькасць станоўчых рашэнняў зменшылася. Тады іх было 36, а колькасць адмоў засталася прыкладна на тым жа ўзроўні.

У ліпені міжнародную абарону атрымалі толькі 14 беларусаў, у той час як 82 чалавекі атрымалі адмоўныя рашэнні.

У чэрвені станоўчыя рашэнні вынеслі ў дачыненні да 25 чалавек, а ў міжнароднай абароне адмовілі 52 грамадзянам Беларусі.

Усяго з пачатку года Упраўленне па справах замежнікаў вынесла рашэнні па 1098 справах беларускіх заяўнікаў, якія просяць прытулку. У студзені — верасні статус бежанца атрымалі 302 грамадзяніны Беларусі, дадатковую абарону — 380 чалавек, 266 беларусам адмовілі ў міжнароднай абароне, а разгляд 150 спраў спынілі.

На 1 кастрычніка ўпраўленне працягвала разглядаць 3212 спраў беларусаў, у тым ліку 2914 — у першай інстанцыі і 289 — у другой. За верасень колькасць спраў у першай інстанцыі скарацілася на 40, а ў другой — вырасла на 31. Агульная колькасць спраў беларусаў, якія разглядае ўпраўленне, за верасень не змянілася.

Дакументы, якія даюць права на знаходжанне ў Польшчы, на 1 кастрычніка мелі 129,83 тысячы грамадзян Беларусі. За жнівень іх колькасць скарацілася на 1589 чалавек. Гэта можа быць звязана са сканчэннем тэрміну дзеяння відаў на жыхарства і працяглымі працэдурамі іх разгляду.

На 1 кастрычніка беларусы ў Польшчы мелі:

• 74 573 часовыя дазволы на жыхарства;
• 41 152 пастаянныя дазволы на жыхарства;
• 9748 статусаў дадатковай абароны;
• 2700 статусаў доўгатэрміновых рэзідэнтаў ЕС;
• 1272 статусы бежанца;
• 210 чалавек знаходзіліся ў краіне на ўмовах часовай абароны;
• 176 чалавек мелі іншыя статусы (то-бок агулам — 129 831 чалавек).

За верасень Упраўленне па справах замежнікаў вынесла 1868 станоўчых рашэнняў па выдачы часовых дазволаў на жыхарства, 281 — па выдачы пастаянных дазволаў на жыхарства і 108 — па наданні статусу доўгатэрміновага рэзідэнта ЕС.

У верасні ўпраўленне адмовіла ў выдачы часовага дазволу на жыхарства 147 заяўнікам з Беларусі, у выдачы пастаяннага дазволу на жыхарства — 102, а ў наданні статусу доўгатэрміновага рэзідэнта ЕС — 17 грамадзянам Беларусі.

З пачатку года часовыя дазволы на жыхарства атрымалі 17 480 беларусаў, пастаянныя — 2759, а статус доўгатэрміновага рэзідэнта ЕС — 810 грамадзян Беларусі.

Сёлета ўпраўленне таксама выдала грамадзянам Беларусі 5680 польскіх праязных дакументаў. Іх можна атрымаць у спрошчаным парадку, калі заканчваецца тэрмін дзеяння беларускага пашпарта, а вярнуцца на радзіму для яго замены па розных прычынах немагчыма.

Упраўленне прагназуе, што па выніках года колькасць выдадзеных праязных дакументаў можа перавысіць 7,5 тысячы.

• 0
• 0
• 0
• 0
• 0
• 0
• 0
• 0