Zatrymanaha ŭ Hruzii biełarusa vysłali ŭ Armieniju, dzie jaho taksama zatrymali
Leŭ Michiejeŭ znachodzicca ŭ vyšuku na zapyt biełaruskich uładaŭ.
Zatrymany ranicaj 25 vieraśnia ŭ Hruzii hramadzianin Biełarusi Leŭ Michiejeŭ vyviezieny na miažu z Armienijaj i zaraz znachodzicca ŭžo na armianskim baku, dzie taksama zatrymany, bo znachodzicca ŭ vyšuku na zapyt biełaruskich uładaŭ. Pra heta sam palituciakač, jaki z 2021 hoda čakaŭ prytułku, raspavioŭ «Pozirku».
«Ja sprabavaŭ siońnia ździejśnić standartnuju praceduru zamieny ID-karty. Ja zahadzia pakłapaciŭsia pra heta i praktyčna za miesiac pačaŭ praceduru. Pryjechaŭ u Departamient mihracyi (u vioscy Martkopi, kala 30 km ad stalicy krainy Tbilisi.) i napisaŭ zajavu. U mianie jaje pryniali z fotazdymkam i skazali praz dva tydni pryjazdžać pa rašeńnie, jak heta zvyčajna było», — skazaŭ Michiejeŭ.
Kali minuła dva tydni, jon pryjechaŭ znoŭ, ale scenar byŭ niečakanym: «Mianie zapuskajuć, sadziać u kresła, i doŭha ničoha nie adbyvajecca. Narešcie źjaŭlajucca supracoŭniki, kažuć, što treba pajechać ź imi ŭ Tbilisi na sumoŭje».
«Adrazu sadziać mianie ŭ mašynu. Ja tolki paśpieŭ adpravić [pravaabaroncu] Ramanu [Kiślaku] karotkaje paviedamleńnie, jak u mianie zabrali telefon. Praktyčna ja z hetaha momantu znachodziŭsia ŭ stanie aryštanta», — padkreśliŭ biełarus.
Jon adznačyŭ, što ŭ Tbilisi jaho trymali ŭ kabiniecie kala dvuch hadzinaŭ: čakali pierakładčyka. «Źjaviŭsia kiejs-mieniedžar pa maim pytańni i skazaŭ, što ja nielehał, što moj dakumient, maja ajdziška, termin dziejańnia jakoj jašče nie skončyŭsia, uvohule nie maje nijakaha značeńnia», — apisaŭ situacyju aktyvist.
Michiejevu prapanavali dva varyjanty: «vykinuć u kajdankach z Hruzii» abo dobraachvotna jaje pakinuć, samomu abraŭšy, kudy jechać, navat u Biełaruś. Ad viartańnia na radzimu jon admoviŭsia, tamu što «prasiŭ prytułku mienavita praz toje, što jaho pieraśledavali na radzimie». Aktyvist paprasiŭ trochi času, chacia b da kanca dziejańnia časovaha paśviedčańnia asoby (9 kastryčnika), ale hruzinskija siłaviki admovili.
«Mianie haniali z kabinieta ŭ kabiniet. Pryjšoŭ urač, raspranuŭ da majtkoŭ — žach niejki. Potym pajechali dadomu, ja sabraŭ siakija-takija rečy, pajechali ŭ departamient. Potym užo ŭ aŭtazaku mianie siudy (na miažu) pryvieźli i vykinuli», — raspavioŭ biełarus.
Pavodle słoŭ Michiejeva, jon sam abraŭ Armieniju. Sudu pa vysyłcy nie było, jaho «prymusili padpisać šmat papieraŭ» na hruzinskaj movie, sensu jakich jon nie razumieŭ.
«Ja zrazumieŭ, što jany tut prosta šalonyja. Ź imi spračacca nakont čahości składana. Niachaj budzie Armienija. I praces zakruciŭsia, zaviarcieŭsia», — patłumačyŭ Michiejeŭ.
Na armianskaj miažy jon byŭ zatrymany, bo znachodzicca ŭ bazie miždziaržaŭnaha vyšuku krain SND na zapyt Minska. Jerevan, jaki ŭziaŭ kurs na zbližeńnie ź Jeŭrasajuzam, nie vydaje asob, jakija pieraśledujucca z palityčnych matyvaŭ.
Biełaruski pravaabaronca Raman Kiślak, jaki pražyvaje ŭ Hruzii i sam niekalki hadoŭ sprabuje atrymać mižnarodnuju abaronu, paviedamiŭ «Pozirku», što ceły dzień sprabavaŭ atrymać infarmacyju pra miescaznachodžańnie Michiejeva ŭ hruzinskich uładaŭ. Dla hetaha jon źviartaŭsia ŭ Departamient mihracyi, a kali jamu admovili ŭ infarmacyi, — u palicyju.
«Ja patelefanavaŭ u słužbu 112, heta ahulnaja ekstranaja słužba, i paviedamiŭ, što čałaviek źnik. Mnie patelefanavali z kryminalnaj palicyi, paprasili jaho dakumienty, pačali šukać. Mahčyma, heta navat paskoryła praces jaho departacyi, tamu što jakraz u hety čas jaho pačali pierakidvać z kamiery ŭ kamieru. My hetaha nie viedali», — adznačyŭ Kiślak.
«Pakul my šukali Lva, jaho trymali inkamunikada, biez suviazi sa źniešnim śvietam. Heta było faktyčna hvałtoŭnaje źniknieńnie. Jano nie było praciahłym, ale jon byŭ absalutna biaspraŭnym. Jamu nie dali mahčymaści ni źviazacca ź jurystami, ni atrymać abaronu zakona i prava, jaho prymusova departavali», — padkreśliŭ pravaabaronca.
Pavodle jaho infarmacyi, tolki zaraz vyśvietliłasia, što jašče ŭ lipieni apielacyjny sud pryniaŭ niejkaje rašeńnie pa spravie Michiejeva, mahčyma — ab departacyi.
«My nie bačyli rašeńniaŭ i budziem usio heta, viadoma, vyśviatlać. Hruzija stanovicca dziaržavaj jašče bolš biaspraŭnaj, čym była raniej, na žal», — zajaviŭ Kiślak.
Hruzija, jakoj z 2012 hoda kiruje partyja «Hruzinskaja mara» prarasijskaha aliharcha Bidziny Ivanišvili, nie zadavoliła nivodnaha chadajnictva hramadzian Biełarusi ab nadańni prytułku. U pieršaj pałovie 2026 hoda z krainy było vysłana 24 biełarusy. Mierkavanyja pryčyny: pieravyšeńnie terminu znachodžańnia (nie bolš za 365 dzion zapar), praterminavany pašpart (niemahčyma abmianiać u ambasadzie z-za dyskryminacyjnaha ŭkaza Alaksandra Łukašenki ad 4 vieraśnia 2023 hoda), ździajśnieńnie złačynstva.
Sioleta ŭ červieni biełarus — były palitviazień (imia nie nazyvajecca) byŭ upieršyniu departavany z Hruzii ŭ Armieniju.
Ciapier čytajuć
Biełarus-vachtavik na Jamale stvaraje pieśni na biełaruskaj movie z dapamohaj ŠI. «Raniej muzyka była zakrytym kłubam. Niejrasietki adčynili hetyja dźviery z nahi»1919
Kamientary
Polšča ŭsio jašče bolš mienš pravierany varyjant, astatnija ci horš ci našmat horš. Pravaabaroncam udałosia navat raz uhavaryć polskaha konsuła pastavić vizu ŭ praterminavany pašpart. Tut kali admaŭlajuć u abaronie možna realna sudzicca biez departacyi, ale admovaŭ ahułam usio jašče mienšaść