Ciapier dakładna. U Minsku pačałosia budaŭnictva doŭhačakanaha panelnaha ŽK
Heta miesca, viadomaje jak Płaniernaja hara, daŭno znachodziłasia ŭ čakańni vialikaha budaŭnictva. Sprava ŭ tym, što mienavita tut musić źjavicca žyły kompleks, paraŭnalny pa ŭzroŭni z Novaj Baravoj.
Budaŭnictva na vulicy Hareckaha MAPID abiacaŭ pačać jašče niekalki hadoŭ tamu, ale pracy kožny raz adkładvalisia. Niadaŭna na abjekcie znoŭ zaŭvažyli ruch, i na hety raz — heta dakładna aktyŭnaje budaŭnictva. Pieršym budynkam budučaha žyłoha kvartała stanie parkinh z ubudavanymi kramami. U haziecie «Źviazda» ŭžo źjaviłasia pieršaja prajektnaja dekłaracyja. Praŭda, pakul nie na kvatery, a na kamiercyjnyja pamiaškańni, piša Realt.
U pieršaj čarzie budaŭnictva ŭ žyłym kvartale ŭ miežach vulic Jankoŭskaha i Hareckaha budzie ŭźviedzieny asobny parkinh. Jon raźmieścicca ŭ abjomie šmatkvaternych panelnych damoŭ typovaj sieryi M-464-U1-M.
Haraž budzie mieć składanuju formu i składacca z šmathrańnika-styłabata z ubudavanymi pamiaškańniami i parkoŭki adkrytaha typu. Piaciŭzroŭnievy parkinh pačali budavać viasnoj hetaha hoda, a zaviaršyć płanujuć u druhim kvartale 2028 hoda.
Akramia parkovačnych miescaŭ, u parkinhu źjaviacca dźvie kramy, kafe na 60 miescaŭ i raźlikova-kasavy centr.
Zaraz na prodaž vystaŭleny dva łoty:
— kramy pramysłovych i praduktovych tavaraŭ, raźlikova-kasavy centr i pamiaškańni ahulnaha karystańnia ahulnaj płoščaj 2114 kvadratnych mietraŭ pa canie 4860 rubloŭ za kvadratny mietr;
— kafe ahulnaj płoščaj 960 kvadratnych mietraŭ pa canie 4860 rubloŭ za kvadratny mietr.
Prodažy pamiaškańniaŭ adkryjucca 10 vieraśnia ŭ ofisie «MAPID».
Usiaho na Płaniernaj hary ŭ Sucharavie płanujecca ŭźvieści 15 panelnych damoŭ.
Raniej zabudoŭščyk abiacaŭ, što ŭ novym kvartale buduć jak kvatery dla tych, chto maje patrebu ŭ palapšeńni žyllovych umoŭ, tak i kamiercyjnaje žytło dla ŭsich achvočych.
Akramia dziesiacipaviarchovych damoŭ, prajektam praduhledžany škoła na 780 miescaŭ, dziciačy sadok na 230 miescaŭ, asobnaja ambułatoryja i niekalki parkinhaŭ.
Ciapier čytajuć
26‑hadovaha supracoŭnika elitnaha padraździaleńnia mytni asudzili na 16 hadoŭ pa nabory palitartykułaŭ. Siarod ich i «zdrada dziaržavie»6
Kamientary
U horadzie amal ŭsia ziamla, pad i kala budynkaŭ, na vulicach, u parkach zabrudžana budaŭničym śmiećciem. Kali ryjuć katłavany, ziamlu pieravoziać u inšaje miesca. Tut jana naźbirałasia.
Budavać na takoj hary niebiaśpiečna: ščylnaść hleby nieadnarodnaja, z pustotami. Ad vahi pačnie prasiadać.
Adkaznyja ludzi pra heta pavinny viedać, adnak usio roŭna budujecca pa pryncypu "niachaj". Pačnuć dumać, tolki kali "źnianacku" sutyknucca z prablemaj užo pabudavanych damoŭ.