Na pachavańnie čakajuć dziasiatki tysiač ludziej.
Cieła byłoha kamandujučaha vojskam baśnijskich sierbaŭ Ratki Mładziča, asudžanaha na pažyćciovaje źniavoleńnie za hienacyd i inšyja vajennyja złačynstvy, dastavili z Haahi ŭ Białhrad.
Niahledziačy na prysud mižnarodnaha trybunała, mnohija sierby pa-raniejšamu ličać jaho nacyjanalnym hierojem.
Mładzič pamior na minułym tydni ŭ śledčym izalatary AAN u Haazie va ŭzroście 84 hadoŭ. Jon adbyvaŭ pažyćciovaje pakarańnie za złačynstvy, učynienyja padčas vajny ŭ Bośnii ŭ 1992—1995 hadach.
Truna, nakrytaja sierbskim ściaham, prybyła ŭ Białhrad na ŭradavym samalocie. Razam ź ciełam prylacieli syn i ŭnučka Mładziča, a taksama ministr justycyi Sierbii Nienad Vuič, paviedamlaje Reuters.
U aeraporcie trunu pieranieśli sierbskija vajskoŭcy. Jaje dastavili ŭ vajskovy špital, dzie ŭ vychadnyja pavinna adbycca ŭskryćcio.
Raźvitańnie z Mładzičam płanujuć pravieści ŭ subotu ŭ budynku sierbskaj armii ŭ centry Białhrada. U paniadziełak adbudziecca adpiavańnie ŭ carkvie ŭ pryharadzie stalicy, paśla čaho jaho pachavajuć pobač z dačkoj.
Prezident Sierbii Alaksandar Vučyč zajaviŭ, što na pachavańnie mohuć pryjści dziasiatki tysiač ludziej. Pavodle jaho, harantavać biaśpieku padčas cyrymonii budzie składana.
Adzin ź sierbskich ministraŭ raniej anansavaŭ pachavańnie ź dziaržaŭnymi ŭšanavańniami. Adnak paśla rezkaj reakcyi jeŭrapiejskich palitykaŭ urad Sierbii hetaha nie paćvierdziŭ.
Jeŭrakamisarka pa pytańniach pašyreńnia Marta Kos zajaviła, što «hieraizacyja Ratki Mładziča jak vajennaha złačyncy supiarečyć fundamientalnym jeŭrapiejskim kaštoŭnaściam». Premjer-ministr Charvatyi Andrej Plenkavič papiaredziŭ, što dziaržaŭnaje pachavańnie Mładziča «začyniła b dla Sierbii dźviery ŭ Jeŭrapiejski sajuz».
Mižnarodny trybunał AAN pryznaŭ Mładziča vinavatym u hienacydzie za jaho rolu ŭ raźni ŭ Srebranicy ŭ 1995 hodzie. Paśla zachopu ankłava, jaki znachodziŭsia pad abaronaj AAN, siły baśnijskich sierbaŭ zabili kala vaśmi tysiač baśnijskich musulman — mužčyn i chłopčykaŭ.
Mładziča taksama asudzili za 43‑miesiačnuju abłohu Sarajeva, padčas jakoj zahinuli kala 10 tysiač čałaviek.
Niahledziačy na heta, jon zastajecca papularnaj fihuraj siarod častki nasielnictva Sierbii i Respubliki Sierbskaj u składzie Bośnii i Hiercahaviny.
Kamientary