Kala ŭźbiarežža Arhienciny sotniami hinuć maładyja kity. U čym pryčyna?
Kala ŭźbiarežža Arhienciny za apošnija niekalki miesiacaŭ zahinuli sotni dzicianiat paŭdniovaha hładkaha kita. Pavodle papiarednich źviestak, pryčynaj masavaj hibieli mahła stać bakteryjalnaja infiekcyja, piša francuzskaje infarmacyjnaje ahienctva AFP.
Tryvožnaja situacyja nazirajecca z červienia, a na hetym tydni na ŭźbiarežža paŭdniovaj častki krainy vyniesła dziasiatki miortvych kicianiat. Daśledčyk Łabaratoryi marskich sysunoŭ pry Nacyjanalnaj radzie navukovych daśledavańniaŭ Maryjana Kaskareła adznačyŭ, što sioleta ŭzrovień śmiarotnaści siarod maładych kitoŭ asabliva vysoki.
Navukoŭcy miarkujuć, što žyvioły mahli zahinuć u vyniku ŭspyški rožy — surjoznaha zachvorvańnia, vyklikanaha bakteryjami, jakija žyvuć na skury kitoŭ. Pry hetym śpiecyjalisty ličać, što pryčyna, vierahodna, maje naturalny charaktar, choć całkam vyklučyć upłyŭ čałaviečaj dziejnaści pakul nielha.
Pavodle Kaskareły, ciapierašniaja hibiel kitoŭ nie pavinna stvaryć pahrozy dla papulacyi ŭ rehijonie ŭ siarednieterminovaj pierśpiektyvie. Śpiecyjalisty praciahvajuć daśledavać pryčyny śmierci žyvioł.
Arhiencinski horad Puerta-Madryn i raźmieščany pobač paŭvostraŭ Valdes źjaŭlajucca važnymi miescami razmnažeńnia paŭdniovych hładkich kitoŭ. Darosłyja žyvioły mohuć dasiahać 17 mietraŭ u daŭžyniu i važyć u siarednim kala 40 ton — prykładna stolki ž, kolki čatyry słany. Siaredniaja praciahłaść ich žyćcia składaje kala 60 hadoŭ.
U 2025 hodzie ŭ hetym rajonie zafiksavali rekordnuju kolkaść paŭdniovych hładkich kitoŭ — 2110 asobin, siarod jakich było kala 800 dzicianiat. Sioleta, pavodle padlikaŭ miascovych uładaŭ, u tutejšych vodach naličvajecca kala 1375 kitoŭ, u tym liku amal 400 dzicianiat.
Ciapier čytajuć
Pamiatajecie varjackuju honku ŭ Breście, padčas jakoj zahinuła troje? Na VIDEA z ekšn-kamiery matacyklista vidać, što jon razahnaŭsia da 186 km/h4
Kamientary