Paŭdniovaja Kareja pahražaje pryniać miery, kali Ukraina nie vybačycca za razhałašeńnie pieradačy vajennapałonnych

Prezident Paŭdniovaj Karei Li Dže Mion zajaviŭ u piatnicu, što Sieuł prymie «dalejšyja miery», kali Ukraina admovicca publična paprasić prabačeńnia za, jak jon vykazaŭsia, adnabakovaje raskryćcio infarmacyi pra adpraŭku paŭnočnakarejskich vajennapałonnych u Paŭdniovuju Kareju, piša «Jeŭrańjus».

Sieuł zaniaŭ ćviorduju pazicyju ŭ suviazi z tym, što Kijeŭ apublikavaŭ fakt pieradačy dvuch vajennasłužačych, zachoplenych u bai na baku Rasii, papiaredziŭšy, što ich siemji mohuć stać mišeńniu dla Pchieńjana.

Viadoma, što Paŭnočnaja Kareja pomścić pierabiežčykam i členam ich siemjaŭ.

Asoby abodvuch vajennapałonnych možna vyznačyć: ich fatahrafavali paŭdniovakarejskija ŚMI jašče da prybyćcia ŭ krainu.

Ukrainskija vojski zachapili ich u pałon u pačatku minułaha hoda, paśla taho jak jany byli nakiravanyja razam z tysiačami paŭnočnakarejskich vajennasłužačych dla padtrymki vajny Rasii suprać Ukrainy ŭ abmien na ekanamičnuju i vajennuju dapamohu Pchieńjanu.

Praź niekalki hadzin paśla taho, jak prezident Ukrainy Uładzimir Zialenski na minułym tydni paviedamiŭ pra pieradaču vajennapałonnych, vystupajučy ŭ AAN, Li vykazaŭ abureńnie. Sieuł nastojvaje, što režym sakretnaści byŭ nieabchodny dla abarony svajakoŭ vajennapałonnych.

Paśla Sieuł zapatrabavaŭ ad Ukrainy aficyjnych prabačeńniaŭ, zajaviŭšy, što padčas kansultacyj baki pryjšli da «vyraznaj damoŭlenaści» zachavać fakt pieradačy ŭ tajamnicy.

«Kali Ukraina i dalej budzie admaŭlacca pryznać fakty i publična paprasić prabačeńnia, my prymiem dalejšyja miery», — zajaviŭ u piatnicu paŭdniovakarejski prezident, abvinavaciŭšy Kijeŭ u tym, što toj vystaŭlaje jaho «chłusam».

«Heta pytańnie, jakoje tyčycca hodnaści Respubliki Kareja i jaje naroda, i jano nie moža być pakinuta biez uvahi», — napisaŭ Li ŭ sietcy X.

Sibiha zajaviŭ, što «nie chacieŭ by nazyvać heta incydentam», acharaktaryzavaŭšy situacyju jak «dypłamatyčnaje nieparazumieńnie».

Jak paviedamiŭ u sieradu adzin z deputataŭ, paŭdniovakarejskaja raźviedsłužba miarkuje, što Zialenski moh raskryć fakt pieradačy paŭnočnakarejskich sałdat, kab uzmacnić padtrymku ŭ paŭdniovakarejskim hramadstvie idei pastavak uzbrajeńniaŭ Ukrainie.

Za apošnija hady Paŭdniovaja Kareja pieratvaryłasia ŭ bujnoha eksparciora ŭzbrajeńniaŭ, asabliva paśla paŭnamaštabnaha ŭvarvańnia Rasii va Ukrainu ŭ pačatku 2022 hoda, u tym liku dziakujučy šmatmiljardnamu abaronnamu kantraktu z Polščaj.

Adnak Sieuł pa-raniejšamu ŭstrymlivajecca ad pastavak śmiarotnaj zbroi Kijevu, spasyłajučysia na daŭniuju palityku nie ŭzbrojvać krainy, uciahnutyja ŭ aktyŭnyja kanflikty.

• 1
• 0
• 0
• 3
• 0
• 0
• 0
• 0