Prezidentam FIDE staŭ były rasijanin z kazachstanskim pašpartam. Jon znachodzicca pad ukrainskimi sankcyjami
Prezidentam Mižnarodnaj šachmatnaj fiederacyi (FIDE) abrali 38‑hadovaha Cimura Turłova, uradženca Maskvy i zasnavalnika finansavaj kampanii Freedom Holding Corp. U 2022 hodzie jon admoviŭsia ad hramadzianstva Rasii i atrymaŭ hramadzianstva Kazachstana. Z 2023 hoda Turłoŭ taksama ŭznačalvaje Šachmatnuju fiederacyju Kazachstana.
Vybary adbylisia 26 vieraśnia na Hienieralnaj asamblei FIDE ŭ Samarkandzie va Uźbiekistanie. U pieršym tury razam z Turłovym na pasadu prezidenta pretendavali niemcy Jan Chienryk Biutnier i Vadzim Rozienštajn. Nivodzin z kandydataŭ nie nabraŭ nieabchodnaj kolkaści hałasoŭ, tamu praź dźvie hadziny praviali druhi tur pamiž dvuma ŭdzielnikami, jakija atrymali najbolšuju padtrymku.
U vyniku Turłoŭ atrymaŭ 110 hałasoŭ, a Rozienštajn — 85. Rozienštajn naradziŭsia na terytoryi sučasnaj Ukrainy, a ŭ dzieviać hadoŭ razam z baćkami pierajechaŭ u Hiermaniju.
Ź pieramohaj Turłova pavinšavaŭ były prezident FIDE Arkadź Dvarkovič, jaki pakinuŭ pasadu ŭ kancy lipienia 2026 hoda paśla ŭklučeńnia ŭ sankcyjny śpis Jeŭrapiejskaha sajuza. Pavodle jaho słoŭ, Turłoŭ užo šmat zrabiŭ dla šachmat, a ciapier na pasadzie kiraŭnika FIDE zmoža zrabić jašče bolš. Dvarkovič adznačyŭ, što ŭ novaha prezidenta i jaho kamandy jość enierhija, vyrazny płan i resursy dla vykanańnia pastaŭlenych zadač, a vyniki vybaraŭ śviedčać pra značnuju padtrymku Turłova.
U kastryčniku 2022 hoda Turłoŭ i ŭkrainskaja kampanija mižnarodnaha brokiera Freedom Finance, jakaja jamu naležyć, trapili pad sankcyi Rady nacyjanalnaj biaśpieki i abarony Ukrainy. Aficyjnyja pryčyny hetaha rašeńnia nie paviedamlalisia, ale vykazvalisia mierkavańni, što sankcyi mahli być źviazanyja z rasijskim biznesam Turłova.
Sam Turłoŭ jašče ŭ listapadzie 2022 hoda nazvaŭ uklučeńnie jaho i kampanii ŭ sankcyjny śpis «miechaničnaj pamyłkaj» i zajaviŭ, što faktyčnych pryčyn dla sankcyj suprać kampanii niama. Kiraŭnictva ŭkrainskaj Freedom Finance tady paviedamlała, što pracuje nad abskardžańniem sankcyj.
Hrosmajstar Dzianis Łazavik: «Biełaruskaja mova vymiraje. Ja na joj zusim nie razmaŭlaju, dy i z kim?»
Ź biełaruskich šachmatystaŭ źniali ŭsie abmiežavańni
Judzit Połhar admoviłasia ad prapanovy stać prezidentam Vienhryi
Rasijski hrosmajstar Uładzimir Kramnik atrymaŭ hod dyskvalifikacyi — z-za abvinavačvańniaŭ u čycinhu pamierłaha hrosmajstara Naradzickaha
Uźbiekistan niečakana staŭ adnym z suśvietnych lidaraŭ u šachmatach
Kamientary