U Šviejcaryi prachodzić refierendum ab niejtralitecie. Na konie — padtrymka sankcyj suprać Rasii i supracoŭnictva z NATA

Jak adznačajuć žurnalisty, kali šviejcarcy padtrymajuć prapanavanyja normy, kraina pavinna budzie admianić svaje sankcyi suprać Rasii, uviedzienyja paśla poŭnamaštabnaha ŭvarvańnia va Ukrainu. Maskva maje ŭ Radzie Biaśpieki AAN prava vieta i moža zabłakavać lubyja nakiravanyja suprać jaje miery.

Prapanavanyja Šviejcarskaj narodnaj partyjaj papraŭki taksama praduhledžvajuć admovu ad ciesnaha supracoŭnictva ź jakimi-niebudź vajskovymi sajuzami — kali kraina nie sutykajecca ź niepasrednaj pahrozaj napadu.

Šviejcaryja ŭ asnoŭnym dałučyłasia da sankcyj Jeŭrapiejskaha sajuza suprać Rasii, jakija byli ŭviedzienyja paśla lutaha 2022 hoda. Kraina nie ŭvachodzić u NATA, ale padtrymlivaje z aljansam davoli ciesnyja adnosiny i ŭdzielničaje ŭ niekatorych jaho prahramach.

Šviejcaryja abviaściła siabie niejtralnaj krainaj jašče ŭ 1815 hodzie, a ŭ 1848‑m zamacavała taki status u kanstytucyi. Adnak ciapier ułady mohuć traktavać paniaćcie niejtralnaści davoli šyroka.

Jak adznačaje VVS, u vyniku niejtralnaść dziaržavy maje svaje miežy: kraina paličyła rasijskaje ŭvarvańnie va Ukrainu parušeńniem mižnarodnaha prava i dałučyłasia da sankcyj ES suprać Maskvy.

Uletku aficyjnaja pradstaŭnica MZS Rasii Maryja Zacharava vystupiła ŭ padtrymku ŭzmacnieńnia patrabavańniaŭ da niejtralitetu Šviejcaryi. U svaim dopisie ŭ telehramie jana adznačała, što «Šviejcaryja dałučyłasia da dvuch dziasiatkaŭ pakietaŭ sankcyj Jeŭrapiejskaha sajuza suprać Rasii» i «pad zamarozkaj aktyvaŭ u krainie znachodziacca kala 2600 fizičnych i jurydyčnych asob».

Miarkujučy pa apytańniach hramadskaj dumki, apublikavanych u siaredzinie vieraśnia, značnaja bolšaść vybarščykaŭ Šviejcaryi vystupaje suprać uniasieńnia papravak.

Roznyja sacyjałahičnyja daśledavańni pakazvajuć, što suprać mieli namier hałasavać ad 63% da 68% vybarščykaŭ, a za — ad 31% da 34%.

Jak adznačaje ahienctva Reuters sa spasyłkaj na źviestki kampanii Tamedia, prychilniki ŭzmacnieńnia niejtralitetu ličać, što takaja miera nie dazvolić uładam razmyvać heta paniaćcie i dapamoža zabiaśpiečyć rolu Šviejcaryi jak pasiarednika va ŭrehulavańni kanfliktaŭ.

Adnak praciŭniki papravak nastojvajuć, što jany abmiažujuć mahčymaść Šviejcaryi reahavać na mižnarodnyja kryzisy i asłabiać jaje abaronu.

Kala 25% apytanych taksama zajavili, što admova ad uviadzieńnia sankcyj za parušeńni mižnarodnaha prava budzie razhladacca jak padtrymka dziejańniaŭ krain-ahresaraŭ, što naškodzić reputacyi Šviejcaryi.

• 1
• 1
• 0
• 6
• 1
• 0
• 0
• 0