Jak časta treba zajmacca seksam, kab chutčej zaciažaryć? Navukoŭcy nazvali aptymalnuju častatu

Bolšaść par, jakija płanujuć papaŭnieńnie ŭ siamji, zvyčajna zasiarodžvajucca na tak zvanym aknie fiertylnaści — karotkim šaścidzionnym pramiežku vakoł avulacyi, kali šancy začać najbolšyja. Adnak, jak piša FitBook.de, navukoŭcy z Narviežskaha instytuta hramadskaha zdaroŭja, univiersiteta Bierhiena i špitala Telemark vyrašyli vyśvietlić, ci adyhryvaje rolu ahulnaja častata seksu ciaham usiaho miesiaca.

Kab atrymać nadziejnyja vysnovy, daśledčyki praanalizavali danyja bolš jak 64 tysiač žančyn, jakija zaciažaryli naturalnym šlacham i ŭdzielničali ŭ maštabnym narviežskim daśledavańni «Maci, baćka i dzicia» (Den norske mor, far og barn-undersøkelsen, MoBa).

Udzielnicy padrabiazna apisvali svajo intymnaje žyćcio čatyry tydni pierad začaćciem. Adpaviedna z atrymanymi źviestkami respandentak padzialili na čatyry hrupy: mienš za adzin raz na tydzień, adzin-dva razy, try-čatyry razy i bolš za čatyry razy.

Najbolš prykmietnaja roźnica vyjaviłasia ŭ apošniaj hrupie. Žančyny, jakija zajmalisia kachańniem bolš za čatyry razy na tydzień, mieli na 16% vyšejšuju imaviernaść zaciažaryć ciaham adnaho cykła ŭ paraŭnańni z tymi, chto praktykavaŭ heta adzin abo dva razy.

Pry hetym pamiž astatnimi hrupami vyraznaj roźnicy nie vyjavili. U tych, chto mieŭ blizkaść try-čatyry razy abo radziej za adzin raz, šancy na ciažarnaść za adzin cykł istotna nie adroźnivalisia ad pakazčykaŭ hrupy z adnym-dvuma razami.

Adroźnivaŭsia i čas, nieabchodny dla pačaćcia. U siarednim udzielnicam daśledavańnia spatrebiłasia 4,5 miesiaca. Siarod žančyn, jakija zajmalisia seksam radziej za adzin raz na tydzień, hety termin składaŭ 4,8 miesiaca, a siarod tych, chto rabiŭ heta bolš za čatyry razy, — 3,7 miesiaca.

Čamu časty seks moža dapamahać

Adno z mahčymych tłumačeńniaŭ vynikaŭ — karotki pieryjad, kali začaćcie ŭvohule mahčyma. U adnym z raniejšych daśledavańniaŭ navukoŭcy nazirali za 221 žančynaj i vyznačali avulacyju pavodle ŭzroŭniu harmonaŭ u mačy.

Začaćcie adbyvałasia tolki ŭ tych vypadkach, kali seks byŭ na praciahu šaści dzion da avulacyi ŭklučna. U dzień avulacyi imaviernaść začaćcia składała kala 33%, a za piać dzion da jaje kala 10%.

U narviežskim daśledavańni suviaź pamiž častym seksam i chutčejšym začaćciem była asabliva prykmietnaj siarod žančyn, jakija čakali pieršaje dzicia. Aŭtary miarkujuć, što pary biez papiaredniaha dośviedu ciažarnaści radziej zajmajucca metanakiravanym adsočvańniem cykłu. Tamu časty seks pavialičvaje šancy prosta trapić u patrebny pieryjad.

Pry hetym daśledavańnie nie pakazała, što vielmi časty seks źnižaje šancy na začaćcie. Naadvarot, u žančyn, jakija zajmalisia seksam bolš za čatyry razy na tydzień, imaviernaść zaciažaryć na praciahu adnaho cykła była vyšejšaj.

Heta ŭzhadniajecca i z mietaanalizam 2025 hoda, jaki abjadnaŭ vyniki 22 daśledavańniaŭ. Jon pakazaŭ, što paśla karotkaha ŭstrymańnia praciahłaściu nie bolš za dva dni ŭ ejakulacie było krychu mienš śpiermatazoidaŭ, zatoje jany byli bolš ruchomymi, a paškodžańni ich DNK sustrakalisia radziej. Praŭda, hetyja daśledavańni aceńvali jakaść śpiermy, a nie imaviernaść nastupleńnia ciažarnaści.

Niuansy i abmiežavańni daśledavańnia 

Aŭtary narviežskaha daśledavańnia adznačajuć niekalki abmiežavańniaŭ. U jaho ŭklučyli tolki žančyn, jakija płanavali ciažarnaść i ŭ vyniku zaciažaryli naturalnym šlacham. Tamu atrymanyja vyniki nielha aŭtamatyčna pieranosić na ŭsich, chto sprabuje začać dzicia, asabliva na pary, jakija majuć z hetym ciažkaści.

Akramia taho, źviestki pra častatu seksu i čas, jaki spatrebiŭsia dla začaćcia, hruntavalisia na ŭspaminach udzielnic. Daśledčyki taksama nie viedali, u jakija mienavita dni mienstrualnaha cykła adbyvalisia pałavyja akty, i nie mieli infarmacyi pra jakaść śpiermy partnioraŭ.

• 3
• 0
• 1
• 4
• 0
• 1
• 0
• 1