Amierykanskija daktary ŭpieršyniu pierasadzili čałavieku stvałavyja kletki, zdolnyja vyrablać śpiermatazoidy

Jak paviedamlaje Daily Mail, u ZŠA ŭpieršyniu ŭ śviecie praviali pierasadku stvałavych kletak, zdolnych utvarać śpiermatazoidy, čałavieku ź biaspłodnaściu.

Havorka idzie pra mužčynu va ŭzroście kala 20 hadoŭ, jaki straciŭ zdolnaść da naturalnaha začaćcia z-za chimijaterapii, jakuju prachodziŭ u dziacinstvie pry lačeńni raku kostak. U jaho dyjahnastavali aśpiermiju — stan, kali ŭ ejakulacie zusim adsutničajuć śpiermatazoidy. Jon moža taksama raźvicca pa šerahu inšych pryčyn, siarod jakich harmanalnaja dysfunkcyja, zakuporka pałavych šlachoŭ i peŭnyja hienietyčnyja zachvorvańni.

Da hetaha praceduru teściravali tolki na žyviołach — myšach i małpach, jakija paśla pierasadki mahli davać naščadkaŭ. Ciapier ža ŭpieršyniu takuju techniku prymianili da čałavieka.

Asablivaść vypadku ŭ tym, što daktary zahadzia — jašče da pačatku chimijaterapii — uziali i zamarozili śpiermatahonnyja stvałavyja kletki pacyjenta, jakija prysutničajuć u jaječkach pry naradžeńni i paźniej vyśpiavajuć u śpiermatazoidy ŭ pieryjad pałavoha daśpiavańnia.

Ciapier jany byli pierasadžanyja ŭ jaho repraduktyŭnuju sistemu, u śpiecyjalnyja kanalcy jaječkaŭ (rete testis) z dapamohaj ihołki pad kantrolem ultrahuku. Takija kletki, kali ŭsio projdzie paśpiachova, pavinny pastupova pieratvarycca ŭ śpiermatazoidy — pa sutnaści, u pacyjenta moža pačacca «druhoje pałavoje daśpiavańnie».

Pakul što śpiermatazoidaŭ u jaho śpiermie nie vyjavili, ale analiz kryvi i UHD paćviardžajuć, što harmanalny fon u normie i tkanki jaječak nie byli paškodžanyja.

Daśledčyki padkreślivajuć, što mietad jašče nie dakazaŭ svajoj efiektyŭnaści i biaśpieki: jość ryzyka, što kletki tak i nie pačnuć vyrablać śpiermatazoidy, bo ich abjom byŭ vielmi małym (pry zabory staralisia nie naškodzić tkankam).

Taksama isnuje tearetyčnaja ryzyka, što ŭ zamarožanych kletkach mahli zastavacca mutacyi, źviazanyja z ankałohijaj, i jany mohuć spravakavać rost novaj puchliny. U tym liku z-za hetaha vučonyja zaklikajuć da vielmi aściarožnaha padychodu i žorstkaha kantrolu.

Adnak kali mietad paćvierdzić svaju efiektyŭnaść, heta moža stać sapraŭdnym praryvam u lačeńni biaspłodnaści. U pierśpiektyvie technałohija dazvolić maładym mužčynam, jakim pahražaje aśpiermija, zahadzia zachoŭvać svaje śpiermatahonnyja stvałavyja kletki dla budučaha vykarystańnia.

I navat kali paśla pierasadki kolkaść śpiermatazoidaŭ budzie niedastatkovaj, daktary zmohuć sprabavać zdabyć ich chirurhičnym šlacham dla ekstrakarparalnaha apładnieńnia.

• 0
• 0
• 0
• 0
• 1
• 0
• 0
• 0