Anthropic dadała vadzianyja znaki ŭ Claude — raspracoŭščyki adrazu vypuścili «ścirki»

Business Insider paviedamlaje, što cikavaść da zapytu AI watermark remover u Google Trends u ZŠA za tydzień vyrasła na 60%. Adnačasova źjavilisia niekalki prajektaŭ, jakija abiacajuć vydalać abo asłablać markiroŭku ŭ tekstach i fajłach.

Adzin ź ich — adkryty Watermarks Remover, jaki zapuściŭ francuzski pradprymalnik Hijom Mejer. Pavodle jaho słoŭ, pieršuju viersiju jon sabraŭ prykładna za piać hadzin. Prajekt užo atrymaŭ bolš za 14 tysiač zorak na GitHub.

Instrumient vydalaje schavanyja simvały i mietadanyja, a potym pierapisvaje tekst, kab parušyć statystyčny šabłon vybaru słovaŭ, na jakim zasnavany vadziany znak Anthropic. Pry hetym raspracoŭščyk nie harantuje, što markiroŭka budzie vydalenaja całkam.

«Ja całkam za paznačeńnie pachodžańnia kantentu. Ja suprać mienavita hetaj technałohii vadzianych znakaŭ, i heta važnaje adroźnieńnie», — zajaviŭ Mejer.

Pavodle jaho mierkavańnia, taki padychod zanadta spraščaje pytańnie aŭtarstva, bo adzin i toj ža vadziany znak moža źjaŭlacca jak u całkam zhienieravanym tekście, tak i paśla redahavańnia čałaviekam napisanaha materyjału.

Anthropic raniej padkreślivała, što jaje markiroŭka nie pryznačanaja dla vyznačeńnia aŭtarstva. Jana tolki dazvalaje acanić vierahodnaść taho, što Claude udzielničaŭ u stvareńni tekstu.

Inšy raspracoŭščyk, Anš Anieža, vypuściŭ ułasny instrumient dla vydaleńnia vadzianych znakaŭ Claude u dzień anonsu funkcyi. Paźniej jon apublikavaŭ łakalnuju adkrytuju viersiju pad nazvaj MarkScrub. Pavodle jaho, za pieršyja sutki z pasłuh servisa skarystalisia 8,5 tysiačy čałaviek.

Efiektyŭnaść hetych rašeńniaŭ pakul nie paćvierdžanaja niezaležnymi testami. Daśledčyk ETH Zurich Tybo Hłaahien adznačaje, što ŭ vadzianych znakaŭ u pryncypie jość fundamientalnaje abmiežavańnie: kali dastatkova mocna pierapisać tekst, statystyčny patern možna razburyć.

Jurydyčny status takich instrumientaŭ u ES pakul zastajecca niavyznačanym. Zakon ab ŠI patrabuje ad pastaŭščykoŭ madelaŭ rabić markiroŭku ŭstojlivaj da vydaleńnia i źmianieńniaŭ, ale napramuju nie zabaraniaje trecim asobam stvarać instrumienty dla jaje vydaleńnia.

Pry hetym vykarystańnie takich servisaŭ dla taho, kab vydavać zhienieravany ŠI tekst za čałaviečy, moža parušać praviły Anthropic. Palityka kampanii zabaraniaje pradstaŭlać vyniki pracy madeli jak stvoranyja čałaviekam.

• 0
• 0
• 1
• 4
• 0
• 0
• 0
• 0