Paćvierdžana śmierć 282 tysiač rasijskich vajskoŭcaŭ va Ukrainie

Bi-bi-si sumiesna z «Miedyjazonaj» i kamandaj vałancioraŭ, jakija pracujuć z adkrytymi danymi, vyznačyli imiony 281 753 rasijskich vajskoŭcaŭ, jakija zahinuli padčas poŭnamaštabnaha ŭvarvańnia va Ukrainu. Siarod padraździaleńniaŭ, jakija panieśli najbolšyja straty, adrazu try častki, jakija tradycyjna ličacca elitaj rasijskaha vojska.

Na vajskoŭcaŭ PDV i marskoj piachoty razam prypadaje tolki 10% ustanoŭlenych strat siarod tych, čyjo miesca słužby viadoma. Adnak adrazu try złučeńni ŭvajšli ŭ dziasiatku vajskovych častak, jakija panieśli najbolšyja straty padčas uvarvańnia va Ukrainu za čatyry z pałovaj hady vajny. Heta 810‑ia i 155‑ia bryhady marskoj piachoty, a taksama 76‑ia desantna-šturmavaja dyvizija.

Rasijskaje kamandavańnie časta vykarystoŭvaje mienavita desantnyja złučeńni i marskuju piachotu dla vyrašeńnia najbolš vostrych prablem na frantach, adznačajuć ekśpierty.

«Hienieralny štab paśladoŭna vykarystoŭvaŭ pavietrana-desantnyja vojski i złučeńni marskoj piachoty ŭ jakaści šturmavoj siły i vojskaŭ chutkaha reahavańnia», — adznačajuć amierykanskija vajennyja analityki Majkł Kofman i Hreh Uisłar.

Pakolki składanych učastkaŭ na froncie šmat, času dla advodu hetych padraździaleńniaŭ u tył na paŭnavartasnaje adnaŭleńnie nie staje. U vyniku desantnikaŭ i marskich piachotnikaŭ tolki nienadoŭha advodziać ź pieradavoj dla papaŭnieńnia asabovaha składu, a zatym adrazu pierakidvajuć na novy pryjarytetny napramak, dadajuć ekśpierty.

Žurnalisty praanalizavali, jakija mienavita rasijskija padraździaleńni panieśli najbolšyja straty padčas vajny va Ukrainie, jakaja praciahvajecca. Z 281 753 zahinułych, imiony jakich udałosia paćvierdzić da hetaha tydnia, dla 149 701 čałavieka było viadoma padraździaleńnie, u jakim jon słužyŭ.

Analiz danych pakazaŭ, što ŭ cełym najbolšaja dola zahinułych prypadaje na vajskoŭcaŭ motastrałkovych złučeńniaŭ. Adnak u śpisie lidaraŭ pa stratach apynulisia i try častki inšych rodaŭ vojskaŭ.

Pavodle padlikaŭ, 810‑ia bryhada marskoj piachoty straciła zabitymi prynamsi 2000 čałaviek i zajmaje šostaje miesca ŭ śpisie častak z najbolšymi stratami. 155‑ia bryhada marskoj piachoty straciła 1829 čałaviek zabitymi (vośmaje miesca), a 76‑ia desantna-šturmavaja dyvizija — 1809 paćvierdžanych zahinułych (dziaviataje miesca).

Padraździaleńni PDV i marskoj piachoty tradycyjna ličacca elitaj rasijskaha vojska: ich rychtujuć da składanych desantnych apieracyj i chutkaha razhortvańnia.

Pry hetym 76‑ia dyvizija PDV vyłučałasia navat siarod hetych złučeńniaŭ. Jaje pryznavali najlepšym złučeńniem PDV pa vynikach 2008, 2013 i 2014 hadoŭ. U 2019 hodzie 810‑ia bryhada marskoj piachoty atrymała pałkavuju čaru — uznaharodu, jakuju Ministerstva abarony ŭručała najlepšym złučeńniam, častkam i karablam.

Marskija piechacincy 155‑j bryhady ŭ 2010 hodzie ŭdzielničali ŭ vyzvaleńni tankiera «Maskoŭski ŭniviersitet» ad samalijskich pirataŭ, a z 2016‑ha da 2021 hod vykonvali śpiecyjalnyja zadačy ŭ Siryi.

Padčas vajny va Ukrainie vajskoŭcaŭ usich troch złučeńniaŭ abvinavačvali ŭ vajennych złačynstvach. Rasśledavańnie The New York Times źviazała bajcoŭ 234‑ha pałka 76‑j dyvizii PDV z zabojstvami mirnych žycharoŭ u Bučy.

Ukraina abvinavačvaje niekalkich vajskoŭcaŭ 155‑j bryhady ŭ rasstrele prynamsi dzieviaci vajennapałonnych. 810‑ia bryhada fihuruje ŭ rasśledavańni Human Rights Watch pra mahčymyja vajennyja złačynstvy padčas šturmu Maryupala. Rasija admaŭlaje datyčnaść svajho vojska da vajennych złačynstvaŭ.

Adzin z zahinułych marskich piechacincaŭ — Śviatasłaŭ Hłušeń z Murmanska. Da pačatku rasijskaha ŭvarvańnia va Ukrainu jon paśpieŭ pabudavać davoli paśpiachovuju karjeru ŭ cyvilnym žyćci: kiravaŭ filijałam ahienctva nieruchomaści ŭ Sankt-Pieciarburhu. U minułym zastalisia 12 hadoŭ słužby na atamnaj padvodnaj łodcy.

«Paśla słužby jamu było ciažka adaptavacca da novaj prafiesii, ale jon uparta pracavaŭ nad saboj», — pisali jaho kalehi.

Adnak u červieni 2025 hoda ŭzbrojenyja siły znoŭ nahadali pra siabie: Hłušeniu pryjšła pozva. Jak mienavita mužčyna znoŭ trapiŭ u vojska, vyśvietlić nie ŭdałosia. Svajaki tolki napisali, što pamiž vyklikam u vajenkamat i adpraŭkaj na front prajšło mienš za miesiac. Takim čynam, na navučańnie Śviatasłava šturmavym dziejańniam adviali jašče mienš času.

Jaho raźmierkavali ŭ 155‑iu bryhadu marskoj piachoty. Niahledziačy na adsutnaść bajavoha dośviedu i navykaŭ dziejańniaŭ u piachocie, na front jon adpraviŭsia ŭžo ŭ zvańni małodšaha kamandzira.

«Praz try dni znachodžańnia tam jaho adznačyli za pośpiechi — jon staŭ kamandziram šturmavoj hrupy», — paviedamlajecca ŭ adnym ź niekrałohaŭ.

Jakija realnyja ličby strat Rasii na Ukrainie?

Realnyja straty rasijskaha boku pieravyšajuć kolkaść zahinułych, imiony jakich udajecca paćvierdzić z adkrytych krynic.

Pavodle acenak vajennych ekśpiertaŭ, naš analiz vajskovych miemaryjałaŭ, adkrytych dziaržaŭnych rejestraŭ i niekrałohaŭ dazvalaje ŭstanavić ad 45% da 55% ad realnaj kolkaści zahinułych.

Paviedamleńni pra śmierci vajskoŭcaŭ nie zaŭsiody stanoviacca publičnymi. Cieły mnohich vajskoŭcaŭ, jakija zahinuli ŭ apošnija miesiacy, zastajucca na poli boju pa paŭhoda i daŭžej.

Takim čynam, realnaja kolkaść zahinułych z rasijskaha boku moža składać ad 512 278 da 626 118 čałaviek.

Hetaja acenka pavialičvajecca, kali ŭličyć straty farmavańniaŭ samaabvieščanych DNR i ŁNR za 2022 hod, a taksama paŭnočnakarejskich padraździaleńniaŭ, jakija ŭdzielničali ŭ bajach u Kurskaj vobłaści.

Na padstavie niekrałohaŭ i paviedamleńniaŭ pra źnikłych bieź viestak žurnalisty aceńvajuć kolkaść zahinułych u farmavańniach DNR i ŁNR da kanca 2022 hoda ŭ 21 000—23 500 čałaviek.

Karejskaja słužba Bi-bi-si, vyvučyŭšy spadarožnikavyja zdymki i aficyjnyja fatahrafii novaha vajennaha miemaryjała ŭ KNDR, ustanaviła imiony 2304 paŭnočnakarejskich sałdat, jakija zahinuli ŭ 2024—2025 hadach padčas udziełu ŭ vajnie na baku Rasii.

Z ulikam hetych danych ahulnyja straty sił, jakija vajavali na rasijskim baku, mohuć składać pryblizna 535 582—651 922 zahinułych.

• 3
• 0
• 0
• 0
• 0
• 0
• 1
• 0