Navukoŭcy prasačyli, jak śmierć adnaho słana moža ŭpłyvać na ekasistemu
Navat paśla śmierci słon moža ŭpłyvać na miascovuju ekasistemu jašče jak minimum vosiem hadoŭ. Da takoj vysnovy pryjšli navukoŭcy, jakija vyvučali, jak raskładańnie słanovych tuš źmianiaje navakolnaje asiarodździe ŭ nacyjanalnym parku Kruhiera ŭ Paŭdniova-Afrykanskaj Respublicy, piša vydańnie Discover Wildlife.
Daśledavańnie pačałosia paśla hibieli vialikaha samotnaha słana pa mianušcy Alaksandr u 2009 hodzie. Jahonaja tuša lažała kala darohi, pa jakoj rehularna prajazdžaŭ daśledčyk Dejv Tompsan z Paŭdniovafrykanskaj sietki ekałahičnych nazirańniaŭ. Nazirajučy za raskładańniem pareštkaŭ žyvioły, jon zacikaviŭsia tym, jak heta ŭpłyvaje na navakolnuju pryrodu.
Navukoŭcy pačali sistematyčna vyvučać źmieny ŭ hlebie, mikraarhanizmach i raślinnaści, a taksama toje, jak pareštki słana ŭpłyvajuć na pavodziny inšych žyvioł.
Na pieršym etapie raskładańnia tuša vyklikaje hibiel raślinnaści pablizu praz rezkaje pavieličeńnie kancentracyi praduktaŭ raspadu. U pryvatnaści, utrymańnie azotu ŭ hlebie kala śviežych pareštkaŭ moža ŭ 3000 razoŭ pieravyšać normu. Takaja kolkaść złučeńniaŭ azotu pieraškadžaje rostu raślin.
Źmianiajecca i skład hlebavych bakteryj: raznastajnaść mikraarhanizmaŭ skaračajecca, ale aktyŭnaść tych, što vyžyli, rezka ŭzrastaje. Paźniej chimičny skład hleby stabilizujecca, adnak zamiest raznastajnaj raślinnaści pačynajuć pieravažać niekalki vidaŭ traŭ, jakija chutka rastuć.
Takija ŭčastki pryciahvajuć travajednych žyvioł, jakija rehularna viartajucca tudy. Ich ekskremienty dadatkova ŭzbahačajuć hlebu pažyŭnymi rečyvami, dziakujučy čamu nastupstvy hibieli słana praciahvajuć upłyvać na ekasistemu.
Pradstaŭnik nacyjanalnych parkaŭ PAR Izak Śmit adznačyŭ, što heta daśledavańnie pierakanaŭča pakazvaje, jak pryroda, jakuju my nazirajem siońnia, farmujecca pad upłyvam padziej minułaha.
Takim čynam, navat paśla źniknieńnia niepasrednaj krynicy źmienaŭ jaje ŭździejańnie na navakolnaje asiarodździe moža zachoŭvacca na praciahu mnohich hadoŭ.
Słon ź miortvym słanianiom, kajot u San-Francyska, puma na aharodžy… Voś jakija raboty stali sioletnimi pieramožcami konkursu «Fatohraf hoda dzikaj pryrody»
Słany ŭmiejuć, jak i ludzi, hatavać lekavyja sumiesi dla svaich słanianiat
Ci vykarystoŭvajuć žyvioły imiony dla znosin pamiž saboj?
Brytanskija navukoŭcy vyśvietlili, dla čaho vykarystoŭvali pryładu sa słanovaj kości 500‑tysiačahadovaj daŭniny
U minskim handlovym centry Palazzo sabrałasia daŭžeznaja čarha. Pa darmovych miadźviedzikaŭ!5
Kamientary