Prezident ZŠA Donald Tramp zabaraniŭ žurnalistam CNN supravadžać jaho na borcie prezidenckaha samalota Air Force One padčas pajezdki ŭ štat Tenesi. Telekanał pavinien byŭ pracavać u składzie televizijnaj hrupy žurnalistaŭ i aśviatlać vizit Trampa ŭ Nokśvił, dzie prezident płanavaŭ naviedać matč studenckaha futboła. Bieły dom biez tłumačeńnia pryčyn adklikaŭ akredytacyju CNN na hety rejs.
Na praciahu mnohich hadoŭ CNN uvachodziŭ u ratacyju piaci najbujniejšych amierykanskich telekanałaŭ, pradstaŭniki jakich atrymlivali mahčymaść lacieć razam z prezidentam i aśviatlać jaho pajezdki. Ciapier zamiest CNN Bieły dom uklučyŭ u žurnalisckuju hrupu kansiervatyŭny telekanał Real America's Voice.
Heta adbyłosia na fonie kanfliktu administracyi Trampa z CNN, Politico i MS NOW. Tramp abvinavačvaŭ hetyja ŚMI ŭ raspaŭsiudžvańni «fejkavych navin», a raniej rasparadziŭsia pazbavić ich pastajannaha dostupu ŭ Bieły dom. Na minułym tydni supracoŭniki Sakretnaj słužby nie dapuścili žurnalistaŭ troch vydańniaŭ na terytoryju Biełaha doma i zabrali ŭ ich pres-karty.
Paźniej fiederalny sudździa ŭ Vašynhtonie časova admianiŭ zabaronu na dostup žurnalistaŭ, adnak jaho rašeńnie tyčyłasia mienavita Biełaha doma. Juryst Eli Chonih zajaviŭ CNN, što admova ŭ dostupie da Air Force One moža supiarečyć «duchu» hetaha sudovaha rašeńnia. Pavodle jaho mierkavańnia, jurysty telekanała mohuć znoŭ źviarnucca ŭ sud.
Kamientary