Ekanamičny sud Minskaj vobłaści razhledzieŭ sprečku pamiž pradprymalnikam Juryjem Čyžom i jaho synam Siarhiejem u ramkach spravy ab bankructvie kampanii «Danprad». Jany nie syšlisia ŭ mierkavańni nakont kandydatury novaha antykryzisnaha kiraŭnika pradpryjemstva, piša Office Life.
Pryčynaj razhladu stała adchileńnie papiaredniaha likvidatara — TAA «Chvala biznesu». Kredytory «Danprada» i Siarhiej Čyž vystupili za jaho zamienu paśla taho, jak kiraŭnik dvojčy nie zmoh pradstavić płan likvidacyi, jaki zadavoliŭ by ŭsich udzielnikaŭ pracedury.
Pry vybary novaha kiraŭnika pazicyi baćki i syna razyšlisia. Asnoŭny kredytor «Danprada» — kampanija «Trajpł», na jakuju prypadaje 59,5% patrabavańniaŭ u rejestry. Jaje hienieralnym dyrektaram i ŭładalnikam 66,5% doli źjaŭlajecca Juryj Čyž. «Trajpł» prapanavaŭ pryznačyć kiraŭnikom «AlfaKryzisMieniedžmient» albo indyvidualnaha pradprymalnika Natallu Levańkovu.
Siarhiej Čyž, jaki raniej byŭ udzielnikam «Danprada», vystupiŭ suprać hetych kandydatur. Jon zajaviŭ pra ich mahčymuju afilavanaść ź intaresami baćki. Pavodle jaho słoŭ, «AlfaKryzisMieniedžmient» raniej vioŭ spravu ab bankructvie «Trajpła», a Levańkova była kiraŭnicaj u spravie ab bankructvie STAA «Haścinny majontak» — restarana ŭ kompleksie «Łahojsk». Akramia taho, jurydyčnaja kampanija «Levahus», namieśnicaj dyrektara jakoj źjaŭlajecca Levańkova, była kiraŭnicaj spravy ab bankructvie «Biarozaŭski KSI». Siarhiej Čyž ličyŭ, što takija suviazi mohuć pieraškodzić niezaležnamu viadzieńniu pracedury.
U jakaści alternatyvy jon prapanavaŭ kandydatury kampanij «Acenščyk» i «Chepi End». Pradstaŭniki Juryja Čyža sprabavali nie dapuścić hetaha varyjantu, adnak sud spyniŭsia na kandydatury «Acenščyka». Pry hetym było ŭličana, što ŭ kampanii nievialikaja kolkaść biahučych spraŭ, a taksama jość uchvaleńnie padatkovaj inśpiekcyi Vałožynskaha rajona.
«Danprad» — pradpryjemstva pa vytvorčaści biekonnaj śvininy ŭ Vałožynskim rajonie, stvoranaje kampanijami Juryja Čyža razam z dackimi inviestarami. U mai 2015 hoda pradpryjemstva vyjšła na prajektnuju mahutnaść i na toj momant stała najbujniejšym u Biełarusi śvinahadoŭčym kompleksam. U mai 2026 hoda «Danprad» pryznali bankrutam. Jaho zapazyčanaść składała amal 117 miljonaŭ rubloŭ i istotna pieravyšała košt aktyvaŭ.
Sprečka vakoł bankructva «Danprada» źjaŭlajecca adnym z epizodaŭ praciahłaha padziełu aktyvaŭ biznes-impieryi Juryja Čyža. U apošnija hady karparatyŭny kanflikt pamiž siamiejnikami nieadnarazova pierachodziŭ u sudovuju płoskaść.
Ciapier čytajuć
«Čamu my pavinny niejak uščemlivać siabie?». Dyrektarka RTBD patłumačyła, čamu pastaviła śpiektakl pavodle Puškina ŭ adnym z apošnich teatraŭ krainy, jaki pracavaŭ pa-biełarusku5959
Kamientary