U Minskim ekanamičnym sudzie 18 lipienia razhledzieli pazoŭ Juryja Čyža da jaho syna Uładzimira ab pryznańni prava ŭłasnaści na dolu ŭ statutnym fondzie TAA «TrajpłFarm» u pamiery 90%. Pasiadžeńnie zrabili zakrytym, pa jaho vynikach sud pryniaŭ rašeńnie admović u pazovie, piša Office Life.
Juryj Čyž prasiŭ sud pryznać za im prava ŭłasnaści na dźvie kampanii, zarehistravanyja na Kipry ŭ 2008 hodzie, — Welgro Services Limited i Profax Investment Limited. Hetym dźvium kampanijam, jakimi vałodajuć jaho syny, naležać tyja samyja 90% doli ŭ statutnym fondzie «TrajpłFarm».
Pazoŭnyja patrabavańni Juryja Čyža zakranali intaresy i dvaich inšych jaho dziaciej — Taćciany i Siarhieja, a taksama byłoha partniora pa biznesie Uładzimira Japryncava, jakomu naležyć 10% akcyj TAA «TrajpłFarm». Jany ŭdzielničali ŭ pracesie jak trecija asoby, ale nie zajaŭlali samastojnych patrabavańniaŭ.
U sudzie pradstaŭnik adkazčyka Uładzimira Čyža paprasiła zrabić pasiadžeńnie zakrytym, spasłaŭšysia na kamiercyjnuju tajamnicu, jakaja źmiaščajecca ŭ dakumientach ab haspadarčaj dziejnaści kampanii «TrajpłFarm», i reputacyjnuju ryzyku dla jaje, a taksama na toje, što ŭ pracesie niepaźbiežna buduć zakranutyja pytańni pryvatnaha žyćcia siamji Čyžoŭ. Chadajnictva padtrymali pradstaŭniki biełaruskaj i kiprskich kampanij, suprać vystupiła tolki pradstaŭnik Juryja Čyža.
Sud razhledzieŭ pazoŭ u zakrytym režymie. Pa vynikach pasiadžeńnia było pryniata rašeńnie admović Juryju Čyžu ŭ pazovie.
Rašeńnie nie ŭstupiła ŭ zakonnuju siłu, jano moža być abskardžana na praciahu 15-ci dzion.
Pamiatajecie Asol Śliviec? Žyćcio frystajlistki źmianiłasia da niepaznavalnaści, ciapier jana Abihal7
Kamientary