У Мінскім эканамічным судзе 18 ліпеня разгледзелі пазоў Юрыя Чыжа да яго сына Уладзіміра аб прызнанні права ўласнасці на долю ў статутным фондзе ТАА «ТрайплФарм» у памеры 90%. Пасяджэнне зрабілі закрытым, па яго выніках суд прыняў рашэнне адмовіць у пазове, піша Office Life.
Юрый Чыж прасіў суд прызнаць за ім права ўласнасці на дзве кампаніі, зарэгістраваныя на Кіпры ў 2008 годзе, — Welgro Services Limited і Profax Investment Limited. Гэтым дзвюм кампаніям, якімі валодаюць яго сыны, належаць тыя самыя 90% долі ў статутным фондзе «ТрайплФарм».
Пазоўныя патрабаванні Юрыя Чыжа закраналі інтарэсы і дваіх іншых яго дзяцей — Таццяны і Сяргея, а таксама былога партнёра па бізнэсе Уладзіміра Япрынцава, якому належыць 10% акцый ТАА «ТрайплФарм». Яны ўдзельнічалі ў працэсе як трэція асобы, але не заяўлялі самастойных патрабаванняў.
У судзе прадстаўнік адказчыка Уладзіміра Чыжа папрасіла зрабіць пасяджэнне закрытым, спаслаўшыся на камерцыйную таямніцу, якая змяшчаецца ў дакументах аб гаспадарчай дзейнасці кампаніі «ТрайплФарм», і рэпутацыйную рызыку для яе, а таксама на тое, што ў працэсе непазбежна будуць закранутыя пытанні прыватнага жыцця сям'і Чыжоў. Хадайніцтва падтрымалі прадстаўнікі беларускай і кіпрскіх кампаній, супраць выступіла толькі прадстаўнік Юрыя Чыжа.
Суд разгледзеў пазоў у закрытым рэжыме. Па выніках пасяджэння было прынята рашэнне адмовіць Юрыю Чыжу ў пазове.
Рашэнне не ўступіла ў законную сілу, яно можа быць абскарджана на працягу 15-ці дзён.
Каментары