«Nie, nie čuli». Piaskoŭ prakamientavaŭ paviedamleńni ab padrychtoŭcy mirnaha płana ES i ZŠA
U Maskvie bačyli paviedamleńnie pra padrychtoŭku ZŠA i Jeŭropaj mirnaha płana pa ŭrehulavańni kanfliktu va Ukrainie, zajaviŭ pres-sakratar prezidenta Rasii Dźmitryj Piaskoŭ na bryfinhu, paviedamlaje RBK.
Takim čynam jon prakamientavaŭ artykuł The Washington Post pra raspracoŭku mirnaha płana, jaki składajecca z čatyroch asnoŭnych kampanientaŭ. Na pytańnie, ci čuli pra heta ŭ Kramli, Piaskoŭ adkazaŭ: «Nie, nie čuli. Bačyli paviedamleńnie ŭ ŚMI, ale ničoha nie čuli».
Piaskoŭ taksama paviedamiŭ, što kantakty pa pytańni mahčymaha enierhietyčnaha pieramirja praciahvajucca. Pry hetym jon nie staŭ udakładniać, ci pahadziłasia Rasija na damoŭlenaść, pra jakuju havaryŭ prezident ZŠA Donald Tramp, i prapanavaŭ źviarnucca pa tłumačeńni da amierykanskaha lidara.
Kamientujučy rašeńnie ZŠA dazvolić pastaŭki rasijskaha dyzielnaha paliva, Piaskoŭ zajaviŭ, što nie bačyć pramoj suviazi pamiž hetym krokam i mahčymymi sastupkami Rasii na pieramovach pa Ukrainie.
Pavodle jaho słoŭ, supracoŭnictva ŭ hetaj śfiery vyhadnaje abiedźvium krainam.
«Heta adpaviadaje intaresam Złučanych Štataŭ, heta adpaviadaje intaresam suśvietnych enierhietyčnych rynkaŭ i adpaviadaje intaresam Rasijskaj Fiederacyi, tamu heta i adbyvajecca», — padkreśliŭ jon.
Pres-sakratar prezidenta taksama adznačyŭ, što novyja sankcyi Jeŭrapiejskaha sajuza mohuć pieraškodzić damoŭlenaściam Maskvy i Vašynhtona.
Kamientary