Narviežskaja palityčnaja elita apraŭdvajecca pierad parłamientam za suviazi z Džefry Epštejnam
U Narviehii 30 vieraśnia pačalisia adkrytyja parłamienckija słuchańni, pryśviečanyja suviaziam abvinavačanaha ŭ seksualnych złačynstvach amierykanskaha finansista Džefry Epštejna z pradstaŭnikami narviežskaj palityčnaj i dypłamatyčnaj elity. Dla dačy tłumačeńniaŭ vyklikali 11 dziejnych i byłych ministraŭ, u tym liku ciapierašniaha premjer-ministra Jonasa Hara Ściore, paviedamlaje Reuters.
Kamitet parłamienta pa kantroli i kanstytucyjnych pytańniach praviaraje dziejnaść Ministerstva zamiežnych spraŭ, u tym liku raźmierkavańnie srodkaŭ mižnarodnaj dapamohi, unutranyja miechanizmy kantrolu i mahčymy ŭpłyŭ asabistych suviaziaŭ na dziaržaŭnyja rašeńni. Słuchańni raźličanyja na dva dni — 30 vieraśnia i 1 kastryčnika.
Ściore, jaki ŭ 2005—2012 hadach uznačalvaŭ Ministerstva zamiežnych spraŭ, zajaviŭ, što nikoli nie mieŭ adnosin z Epštejnam. Pavodle jaho słoŭ, vyjaŭlenyja prablemy źviazanyja ź dziejańniami asobnych ludziej, a nie ź sistemnym pravałam ministerstva. Jon taksama zajaviŭ, što niekatoryja ludzi, jakija siabravali z Epštejnam, prademanstravali vielmi niapravilnyja pavodziny.
Adnym z hałoŭnych pytańniaŭ słuchańniaŭ stała finansavańnie Mižnarodnaha instytuta miru ŭ Ńju-Jorku (IPI), jakim na praciahu mnohich hadoŭ kiravaŭ narviežski dypłamat Terje Red-Łarsen. Paśla publikacyi dakumientaŭ pra Epštejna deputataŭ zacikavili jak suviazi kiraŭnika instytuta ź finansistam, tak i toje, jakim čynam arhanizacyja atrymlivała dziaržaŭnyja srodki Narviehii.
Pieršymi na słuchańniach vystupili byłyja ministry mižnarodnaha raźvićcia Eryk Sulchiejm i Chiejki Ejdsvoł Chołmus. Abodva pryznali, što ŭ Ministerstvie zamiežnych spraŭ było praściej vydzialać srodki, jakija možna było adnieści da dapamohi raźvićciu. Chołmus patłumačyŭ padtrymku amierykanskich analityčnych centraŭ žadańniem upłyvać na źniešniuju palityku ZŠA.
Sulchiejm adkinuŭ mierkavańnie, što IPI karystaŭsia asablivym staŭleńniem dziakujučy asabistym znajomstvam. Jon taksama zajaviŭ, što, nakolki jamu viadoma, nikoli nie sustrakaŭsia z Epštejnam.
Siarod vyklikanych na słuchańni — były ministr zamiežnych spraŭ Biorhie Brende, jaki ŭ lutym pakinuŭ pasadu kiraŭnika Suśvietnaha ekanamičnaha forumu paśla raskryćcia jaho kantaktaŭ z Epštejnam. Pavodle źviestak vydańnia Dagbladet, jany sustrakalisia jak minimum trojčy. Brende śćviardžaŭ, što nie viedaŭ pra złačynnaje minułaje finansista. Paźniej jon paprasiŭ prabačeńnia za toje, što spačatku nie raskazaŭ žurnalistam pra sumiesnyja viačery, pierapisku i elektronnyja listy.
Byłoha premjer-ministra Turbjorna Jahłanda na słuchańni nie vyklikali. U dačynieńni da jaho viadziecca asobnaje rasśledavańnie pa padazreńni ŭ karupcyi pry abciažarvajučych abstavinach. Staršynia parłamienckaha kamiteta Pier-Vili Amundsen patłumačyŭ, što deputaty nie majuć namieru ŭmiešvacca ŭ pracu śledstva.
Paralelna pracuje niezaležnaja kamisija ź siami čałaviek, stvoranaja parłamientam viasnoj. Jana pavinna pravieryć, ci zrabili asabistyja suviazi, kiraŭnickija praktyki i dziaržaŭnyja miechanizmy Narviehii ŭładu ŭraźlivaj dla niepravamiernaha ŭpłyvu.
Rasśledavańnie kamisii achoplivaje bolš za 30 hadoŭ — pačynajučy z pahadnieńniaŭ u Osła 1993 hoda pamiž Izrailem i Paleścinaj. Kančatkovy dakład jana pavinna pradstavić da 31 studzienia 2028 hoda. Kiraŭnik kamisii Amund Djuve padkreśliŭ, što vysnovy buduć zroblenyja paśla vyvučeńnia dakumientaŭ i apytańnia ŭdzielnikaŭ padziej.
Były narviežski premjer Jahłand zrabiŭ sprobu samahubstva na fonie abvinavačańnia ŭ suviaziach z Epštejnam
U Narviehii surjozna ŭzialisia za byłoha premjera, jaki siabravaŭ z Epštejnam i spryjaŭ Pucinu
U Narviehii syna kronpryncesy zatrymali pierad sudom pa spravie ab seksualnym hvałcie. A sama pryncesa siabravała z Epštejnam
Kamientary