Biełaruś vydała ZŠA amierykanskaha buchhałtara, jaki amal 10 hadoŭ chavaŭsia ŭ Rasii ad padatkovaj spravy
Brajana Bukiera aryštavali ŭ Biełarusi pa prośbie amierykancaŭ u mai 2025 hoda. Hod patrymali ŭ siabie, a ŭrešcie departavali ŭ Majami — u ruki amierykanskaj palicyi.
Biełaruś vysłała ŭ ZŠA buchhałtara Brajana Nielsana Bukiera. Jaho abvinavačvajuć u padatkovych złačynstvach i ŭ tym, što davaŭ uładam iłžyvyja źviestki.
Pavodle Ministerstva justycyi ZŠA, Bukier źjechaŭ z ZŠA ŭ 2016 hodzie, kali daviedaŭsia, što suprać jaho viadziecca kryminalnaje rasśledavańnie.
Jon žyŭ u Rasii, jakaja tak i nie vydała jaho amierykanskim uładam. U mai 2025 hoda Bukiera zatrymali ŭ Biełarusi. Jon znachodziŭsia pad vartaj amal hod, pakul nie było pryniataje rašeńnie ab jaho vysyłcy. 24 lipienia 2026 hoda buchhałtar viarnuŭsia ŭ ZŠA i byŭ zatrymany ŭ aeraporcie Majami.
Pavodle abvinavačańnia, Bukier, vałodaŭ panamskaj kampanijaj, što handlavała kakavaj. Jon kiravaŭ joju ź Vieniesueły, Panamy i sa svajho doma ŭ Fłarydzie. Śledstva śćviardžaje, što ŭ 2011—2013 hadach jon nie zadekłaravaŭ rachunki ŭ Šviejcaryi, Sinhapury i Panamie, choć abaviazany byŭ padavać pa ich štohadovyja spravazdačy. Akramia taho, u padatkovych dekłaracyjach za 2010—2012 hady jon, pavodle abvinavačańnia, pakazaŭ nie ŭsie svaje zamiežnyja rachunki.
Bukiera taksama abvinavačvajuć u tym, što jon skarystaŭsia amierykanskaj prahramaj dobraachvotnaha raskryćcia zamiežnych aktyvaŭ i pry hetym padaŭ iłžyvuju zajavu. U joj jon śćviardžaŭ, što nie dekłaravaŭ dachody i rachunki nienaŭmysna.
Bolšaje, druhoje ŭdakładnienaje abvinavaŭčaje zaklučeńnie suprać Bukiera fiederalnaje vialikaje žury zaćvierdziła jašče ŭ lipieni 2021 hoda.
Za kožny epizod niezadekłaravanych rachunkaŭ i iłžyvych źviestak Bukieru pahražaje da piaci hadoŭ źniavoleńnia, a za kožny epizod padačy iłžyvych dakumientaŭ u Padatkovuju słužbu ZŠA (IRS) — da troch hadoŭ.
Ciapier čytajuć
Pamiatajecie varjackuju honku ŭ Breście, padčas jakoj zahinuła troje? Na VIDEA z ekšn-kamiery matacyklista vidać, što jon razahnaŭsia da 186 km/h4
Kamientary