Rasijskija treniery śćviardžajuć, što dziaržynski «Arsienał» kinuŭ ich na 40 tysiač dołaraŭ. Kłub pahražaje im kryminałkaj
Rasijanie kažuć, što spačatku im płacili ŭ kanviertach. A kali pierajšli na «bieły» zarobak, to hrošaj jany bolš nie bačyli.
Dvoje rasijskich futbolnych trenieraŭ śćviardžajuć, što dziaržynski «Arsienał» kinuŭ ich na 40 tysiač dołaraŭ. Biełaruskaja fiederacyja futboła zahadała bakam pamirycca, ale kłub pahražaje trenieram kryminalnaj spravaj.
Daniła Draśviańnikaŭ i Viačasłaŭ Vaškievič pracavali ŭ «Arsienale» ź lutaha 2024 pa śniežań 2025 hoda. Vaškievič navat vykonvaŭ abaviazki hałoŭnaha treniera. Rasijanie śćviardžajuć, što da lipienia častku zarobku im płacili ŭ kanviertach. Prablem nie było, pakul kłub nie vyrašyŭ pieravieści ich na «bieły» zarobak. Paśla hetaha vypłaty nibyta častkova spynilisia: nie było ani hrošaj, ani premij, piša Mash.
Z pačatku 2026 hoda trenieraŭ aformili na paŭstaŭki skaŭtami. «Arsienał» abiacaŭ zakryć daŭhi za minuły hod, ale nie zmoh hetaha zrabić. Tady Draśviańnikaŭ i Vaškievič źviarnulisia ŭ BFF. Pavodle ich słoŭ, kłub zavinavaciŭsia im pa 60 tysiač biełaruskich rubloŭ.
Fiederacyja dała kiraŭnictvu «Arsienała» dva tydni na toje, kab pamirycca z rasijskimi trenierami. Ale kłub staŭ pahražać im kryminalnaj spravaj.
«Kananiry» zajavili, što treniery padpisali z kamandaj kantrakty ŭ miežach supracoŭnictva «Arsienała» z maskoŭskim «Łakamatyvam». Pavodle damovy, jany pavinny byli šukać maładych hulcoŭ u Biełarusi i Rasii, ale nibyta nie vykanali zadačy i zastalisia žyć na radzimie. U «Arsienale» zajavili, što treniery nanosiać škodu imidžu kłuba. Tamu imi zojmucca biełaruskija siłaviki.
Ciapier čytajuć
Cichanoŭski: Cichanoŭskaj možna było ŭ 2020‑m nie pabajacca turmy. I, moža, u biełarusaŭ byŭ by šaniec97
Kamientary