Były ministr abarony Ukrainy Fiodaraŭ zapuskaje «Armiju robataŭ». Što viadoma
Pierazaradzić kulamiot, zamianić batareju, ustalavać datčyk, a paźniej — samastojna atakavać praciŭnika. Były ministr abarony Ukrainy Michaił Fiodaraŭ anansavaŭ novy abarončy prajekt Armija robataŭ». Kancepcyja praduhledžvaje pracu nad humanoidapadobnymi robatami, jakija zmohuć vykonvać prostyja zadačy na froncie zamiest vajskoŭcaŭ.
Novy prajekt Fiodaraŭ prezientavaŭ 26 vieraśnia na technałahičnaj kanfierencyi IT Arena 2026 u Lvovie. Jaho asnoŭnaj častkaj pavinny stać čałaviekapadobnyja robaty, prystasavanyja da pracy na poli boju.
Spačatku im płanujuć daručyć adnosna prostyja, ale niebiaśpiečnyja dla čałavieka dziejańni.
«Buduć čałaviekapadobnyja robaty, jakija buduć vykonvać prostyja zadačy: pierazaradzić kulamiot, zamianić batarejku, ustalavać sensar. Heta toje, čamu možna chutka navučyć robata, chutka zakinuć na pole boju i što jon zmoža rabić», — zajaviŭ Fiodaraŭ.
Takija mašyny pavinny dziejničać tam, dzie navat karotkaje źjaŭleńnie vajskoŭca stvaraje pahrozu jaho žyćciu: na pieradavych pazicyjach, pad nahladam varožych dronaŭ i pablizu zaminiravanych učastkaŭ.
Pieršaje źniščeńnie voraha — praz paŭhoda
Stvaralniki «Armii robataŭ» pastavili pierad saboj dźvie kankretnyja pieršapačatkovyja mety.
Pieršaja — ciaham šaści miesiacaŭ paśla pačatku prahramy damahčysia, kab čałaviekapadobny robat źniščyŭ rasijskaha vajskoŭca na poli boju.
Druhaja — na praciahu hoda pravieści pieršuju sumiesnuju apieracyju robataŭ i bieśpiłotnikaŭ. Jany pavinny abmieńvacca infarmacyjaj i kaardynavać svaje dziejańni pry dapamozie ałharytmaŭ biez pastajannych kamandaŭ apieratara.
Ideja zaklučajecca nie ŭ stvareńni adnaho «rabatyzavanaha sałdata», a ŭ pabudovie cełaj technałahičnaj sistemy. U joj čałaviekapadobnyja mašyny pavinny ŭzajemadziejničać z pavietranymi dronami, naziemnymi rabatyzavanymi kompleksami i inšymi vidami bieśpiłotnaha ŭzbrajeńnia.
Naprykład, pavietrany dron zmoža vyjavić cel abo niebiaśpieku, pieradać kaardynaty naziemnamu kompleksu, a robat — dastavić abstalavańnie, zamianić batareju, ustalavać datčyk ci vykanać bajavuju zadaču.
Na dumku kamandy Fiodarava, takija sistemy mohuć źmianić sam pryncyp viadzieńnia vajny: na najbolš niebiaśpiečnych učastkach ludzi buduć kiravać apieracyjami na adlehłaści, a niepasredna pad ahniom pracavać buduć mašyny.
Prajekt pakul znachodzicca na rańniaj stadyi. Fiodaraŭ nie pakazaŭ publicy hatovaha čałaviekapadobnaha robata i nie nazvaŭ košt prahramy.
Ciapier jaho kamanda šukaje va Ukrainie i zachodnich krainach inžynieraŭ, raspracoŭščykaŭ, śpiecyjalistaŭ pa štučnym intelekcie i rabatyzavanych sistemach. Adnačasova viaducca pieramovy ź inviestarami.
Akramia čałaviekapadobnych mašyn, u miežach prajekta płanujuć raspracoŭvać tannyja rakiety-pierachopniki i srodki paražeńnia, jakija vykarystoŭvajuć štučny intelekt.
Michaił Fiodaraŭ uznačalvaŭ Ministerstva abarony Ukrainy sa studzienia da lipienia 2026 hoda. Da hetaha, z 2019 hoda, jon byŭ ministram ličbavaj transfarmacyi i zajmaŭsia raźvićciom dziaržaŭnych elektronnych servisaŭ, «Armii dronaŭ» i ŭkrainskich abaronnych technałohij. Ciapier jon praciahvaje pracu ŭ hetaj śfiery ŭžo pa-za dziaržaŭnymi strukturami.
Kamientary
Tolko śviazka---
/Ormuzskij proliv/
/dorohaja niefť/
/enierhietičieskij krizis/
/ekonomičieskij krizis/
/ rost dieficita biudžieta bolšinstva stran i pierieraspriedielenije raschodnoj časti/
/umieńšienije socialnych tranśfierov/
/uvieličienije niedovolstva nasielenija/
/VYBORY/
/PIERIESMOTR POLITIKI PODDIERŽKI UKRAINY/
----
NIE DAST ETO RIEALIZOVAŤ