Palitviazień Vacłaŭ Areška kančatkova ŭ kałonii straciŭ zrok, ale zmoh sam napisać niekalki słoŭ svaim unukam
«Raniej bačyŭ śviet i cień, ciapier užo i hetaha niama. A pra toje, jak hetamu daje rady, ničoha nie raskazvaje, abychodzić hetuju ciažkuju temu», — kaža jahonaja svajačka.
Palitviazień, asudžany na vosiem hadoŭ aktyvist niezaležnaha prafsajuzu radyjoelektronnaj pramysłovaści Vacłaŭ Areška staŭ całkam nieviduščym. Pra heta paviedamiła svajačka palitviaźnia, piša Radyjo Svaboda.
«Raniej bačyŭ śviet i cień, ciapier užo i hetaha niama. A pra toje, jak hetamu daje rady, ničoha nie raskazvaje, abychodzić hetuju ciažkuju temu. Try dni tamu dasłaŭ list, pavinšavaŭ unukaŭ z dniami naradžeńnia. Niekalki słoŭ navat napisaŭ svajoj rukoj, praŭda, nierazborliva ŭ jaho atrymałasia, amal ničoha nie ŭdałosia pračytać, ale dobra, što namahajecca», — raspaviała pra Vacłava Arešku jahonaja svajačka.
Pavodle krynicy, administracyja kałonii № 22, dzie trymajuć palitviaźnia Arešku, prapanoŭvała jamu etapam adpravicca ŭ špital, ale jon admoviŭsia.
«Nakolki viedaju, baicca jechać u špital, bo moža nie vytrymać etapu. Toje, što raspaviadaŭ pra Vacłava žurnalist Siemčanka, — usio tak i jość», — dadała krynica.
U vieraśni pra drenny stan Vacłava Areški raspaviadaŭ na telekanale «Biełsat» žurnalist Dźmitryj Siemčanka, jaki adbyvaŭ svoj termin u toj ža ivacevickaj kałonii.
«U jaho adsłaiłasia siatčatka, i było ŭsio horš i horš. My vadzili jaho ŭžo, kab patelefanavać, my jaho vadzili da kuchni litaralna. Jon chodzić, ale jon ničoha nie bačyć. Kali jon spačatku bačyŭ, kali nie vielmi soniečny dzień, kali nie ślepić jaho sonca, to ŭ ciemry jon užo nie bačyć, jon nie moža vyjści nočču ŭ prybiralniu. Praz takija pakuty hety čałaviek prachodzić. Heta, nu, nie pieradać słovami», — raspaviadaŭ były palitviazień Dźmitryj Siemčanka.
Vacłavu Arešku 71 hod. Pavodle svajački palitviaźnia, jon taksama maje inšyja chvaroby.
«Jašče ŭ jaho cisk, śpina, prablemy z nahami. Stanovicca ŭsio horš», — paviedamiła krynica pra zdaroŭje Vacłava Areški.
Ciapier čytajuć
«Paśla pieršaha zabojstva ź im raźviałasia žonka». Što viadoma pra šmatdzietnaha Siarhieja sa Stolinskaha rajona, jaki paśla vyzvaleńnia z kałonii zabiŭ troch čałaviek44
Kamientary
bo Vacłaŭ nie skarajecca, nia budzie prasić, padpisvać i pisać nijakich prośbaŭ pra pamiłavańnie.
Pravaabaroncy ŭklučyli Vacłava Arešku ŭ śpis 170 palitviaźniaŭ, asabliva ŭraźlivych z pryčyny stanu zdaroŭja, i damahajucca jaho najchutčejšaha vyzvaleńnia.
Pavodle infarmavanych krynic, proźvišča Vacłava Areški ciaham hodu było ŭ śpisach viaźniaŭ, pra jakich z udziełam amerykanskaha boku viaducca pieramovy ab vyzvaleńni, ale ź nieviadomych pryčyn jon dahetul nia vyjšaŭ na volu, u adroźnieńnie ad inšych aktyvistaŭ niezaležnych prafsajuzaŭ, jakija prachodzili ŭ adnoj ź im spravie.