Biełaruski stendapier pieramoh u polskaj «Bitvie komikaŭ»

Biełaruski stendapier Pavieł Radzievič pachvaliŭsia ŭ Threads, što ŭdzielničaŭ u polskaj «Bitvie komikaŭ» i pieramoh: «Šou, u jakim hledačy vybirajuć samaha śmiešnaha komika viečara i jon zabiraje hrošy. I ja pieramoh! U čužoj krainie i na čužoj movie. Kali vy ŭśviedamlajecie maštaby hetaj padziei, možacie paradavacca razam sa mnoj». 

U Polščy zaraz idzie ŭžo treci siezon prajekta. Jon prachodzić u roznych haradach krainy. Pavieł udzielničaŭ u «Bitvie komikaŭ», jakaja adbyłasia ŭ Siedlcy. Najlepšaha stendapiera vybirajuć hledačy — mienavita ich hałasavańnie vyrašaje los hrašovaha pryzu. 

U kamientarach biełarusy zachaplajucca komikam — asabliva praz toje, što Pavieł zmoh pieraadoleć moŭny barjer, a šmat dla kaho ź biełarusaŭ za miažoj heta prablema.

Jon ža pryznajecca, što dla pierakładu žartaŭ na polskuju ŭsio jašče karystajecca niejrasietkami. Ale ž sprabuje pierakładać samastojna, a z dapamohaj ŠI potym znachodzić i vypraŭlaje pamyłki.

Kaža, što havoryć z mocnym akcentam, ale nie chvalujecca praz heta. I nie baicca iranizavać ź siabie: «Časam sam u šoku, kali raskazvaju žarty na inšaj movie i ludzi śmiajucca. Staju taki i dumaju: «Vy što, realna mianie razumiejecie?».

U Paŭła spytali ŭ kamientarach, jaki žart, na jaho dumku, najbolš spadabaŭsia publicy ŭ toj pieramožny viečar. Jon adkazaŭ: «Składana vybrać, dla mianie heta jak u tumanie zaraz. Lubiać jany ŭsiaki brud pra piśki, ale z žartaŭ pra mihrancki byt taksama śmiajucca».

Pavieł Radzievič pačaŭ zajmacca stendapam u 2016 hodzie. U 2019 hodzie jon byŭ siarod stvaralnikaŭ Stand Up Comedy Hall u Minsku. U intervju sajtu «Most» Pavieł zhadvaŭ, što tady biełarusy z pahardaj stavilisia da svaich komikaŭ: «Ludzi vychodzili paśla našych viečarynak i kazali: «Vielmi kruta, my dumali budzie horš». To bok, jany išli na stendap, i zahadzia dumali, što budzie nie vielmi: «Heta ž biełarusy vystupajuć, čaho ad ich čakać». Nam zaŭsiody davodziłasia spačatku pierabirać skieptycyzm ludziej, a potym užo pačynać ź imi pracavać, jak z hledačami». 

Ale ž adznačaŭ, što paśla 2022 hoda situacyja mocna źmianiłasia. Biełarusy stali bolš cikavicca mienavita svaimi komikami. U tym liku praz toje, što šmat rasijskich artystaŭ «zaškvarylisia» svaim maŭčańniem nakont vajny albo adkryta prapucinskaj pazicyjaj.

U tym ža intervju Pavieł zhadvaje, što ŭ 2020 hodzie ŭ Biełarusi možna było spakojna žartavać pra Łukašenku: «Ja pamiataju, jak u lipieni 2020 hoda nas paklikali vystupić na vulicy, kala handlovaha centra Galleria Minsk — tam było niejkaje mierapryjemstva. I my raskazvali žarty i pra Łukašenku, i pra budučyja vybary, pra ŭsio. Mima prachodzić patrul AMAP i navat nie hladzić u naš bok. Ciapier heta ŭsio ŭspaminaješ, i jak byccam nie ŭ hetym Suśviecie adbyvałasia». 

Ale paśla pratestaŭ hajki pačali zakručvacca. Čynoŭniki stali patrabavać ad komikaŭ atrymoŭvać «hastrolki», chacieli zahadzia čytać usie žarty. A z 2022 hoda žartavać možna było chiba što tolki pra chatnich hadavancaŭ.

U tym ža 2022 hodzie Pavieł vyjechaŭ u Polšču. Ciapier vystupaje ŭ roznych haradach Jeŭropy, rabiŭ i stendap na biełaruskaj movie. 

• 0
• 0
• 0
• 0
• 0
• 0
• 0
• 0