Ryžankoŭ raskazaŭ, pry jakoj umovie Łukašenka zhodny sustrecca z Trampam

Pavodle słoŭ Maksima Ryžankova, kantakty pamiž Minskam i Vašynhtonam užo adbyvajucca. Praz pasłańnikaŭ Trampa Łukašenku pieradavalisia śpiecyjalnyja pasłańni, na ich pastupali adkazy, taksama palityki praviali niekalki telefonnych razmoŭ.

Ryžankoŭ adznačyŭ, što dla asabistaj sustrečy nieabchodna zahadzia padrychtavać źmiastoŭny paradak dnia i kankretnyja damoŭlenaści, jakija baki mahli b paśla realizoŭvać. Pavodle jaho, sustreča nie pavinna adbyvacca tolki dziela samoj razmovy — jana pavinna «saśpieć».

Pry hetym Biełaruś, jak zajaviŭ ministr, adkrytaja da takoj sustrečy i prykładaje značnyja namahańni, kab jana adbyłasia. Adnak Minsk nie hatovy iści na jaje luboj canoj i nie maje namieru zajmać pazicyju taho, chto prosić.

Ryžankoŭ nie vyklučyŭ, što sustreča Łukašenki i Trampa moža adbycca ŭ bližejšaj pierśpiektyvie, ale nie nazvaŭ ni mahčymych terminaŭ, ni miesca jaje praviadzieńnia.

Jon taksama nahadaŭ, što raniej Tramp zaprašaŭ Łukašenku ŭziać udzieł u pasiadžeńni Rady miru ŭ ZŠA. Adnak, pavodle Ryžankova, pajezdcy pieraškodzili techničnyja prablemy, u tym liku źviazanyja z sankcyjnymi abmiežavańniami i mahčymaściami pieralotu.

Biełaruś taksama zacikaŭlenaja ŭ raźvićci handlova-ekanamičnych i finansavych suviaziaŭ sa Złučanymi Štatami. Siarod pytańniaŭ, jakija cikaviać amierykanski bok, Ryžankoŭ nazvaŭ nielehalnuju mihracyju, transhraničnuju złačynnaść, niezakonny abarot zbroi i narkotykaŭ, a taksama handal ludźmi.

Pry hetym kiraŭnik MZS padkreśliŭ, što Minsk nie źbirajecca raźvivać adnosiny z Vašynhtonam za košt svaich suviaziaŭ z Rasijaj i Kitajem.

Zakranuŭ Ryžankoŭ i prablemu biełaruskich palitźniavolenych. Jon zajaviŭ, što intares amierykanskaha boku da vyzvaleńnia asob, zatrymanych pa palityčnych pryčynach u Biełarusi, źviazany z tym, što jany raniej atrymlivali padtrymku na Zachadzie, raźličvajučy ŭ vypadku nieabchodnaści na jaho dapamohu i harantyi. Tamu ciapier, maŭlaŭ, zachodnim krainam i treba vyrašać hetaje pytańnie, kab zachavać svoj tvar.

Ryžankoŭ skazaŭ, što kali amierykanski i jeŭrapiejski baki hatovyja zajmacca vyzvalenymi ludźmi za miažoj, Biełaruś nie maje suprać hetaha piarečańnia. Jon taksama zajaviŭ, što źniavolenyja byli adnym z razdražnialnikaŭ u adnosinach Biełarusi z Zachadam, ale ciapier hetaja prablema nibyta pastupova hublaje vastryniu. Častka ludziej, maŭlaŭ, vychodzić na volu paśla adbyćcia pryznačanych terminaŭ, i heta nibyta dazvalaje zachodnim palitykam lahčej zachoŭvać svoj imidž i adnačasova raźvivać kantakty ź Biełaruśsiu.

• 0
• 0
• 8
• 5
• 0
• 0
• 2
• 0