42‑hadovaha Dźmitryja Bakieja asudzili za «sadziejničańnie ekstremisckaj dziejnaści»

Dźmitryju Bakieju 42 hady, jon minčuk. Paśla škoły pastupiŭ u Minski dziaržaŭny vyšejšy radyjotechničny kaledž (MHVRK), jaki skončyŭ u 2004 hodzie. Paśla hetaha Bakiej praciahnuŭ adukacyju ŭ Biełaruskim dziaržaŭnym univiersitecie infarmatyki i radyjoelektroniki. U 2007 hodzie jon atrymaŭ dypłom na kafiedry elektronnych vyličalnych srodkaŭ fakulteta kampjutarnaha prajektavańnia.

U Bakieja jość žonka i dačka.

Mužčyna zachaplajecca sportam. Na praciahu niekalkich hadoŭ jon rehularna vystupaŭ u Amatarskaj futbolnaj lizie (AŁF) pa mini-futbole. 

Minski haradski sud sudziŭ jaho pavodle častki 1 artykuła 361‑4 Kryminalnaha kodeksa — sadziejničańnie ekstremicskaj dziejnaści. Abstaviny spravy nieviadomyja.

Jamu prysudzili chatniuju chimiju.

Masavyja palityčnyja represii ŭ krainie pačalisia paśla 2020 hoda. Tady Alaksandr Łukašenka prajhraŭ Śviatłanie Cichanoŭskaj, ale nie addaŭ joj ułady, a zmusiŭ jaje vyjechać za miažu. Adbylisia masavyja narodnyja pratesty suprać dyktatury i falsifikacyi vybaraŭ. Na heta ŭłady adkazali represijami.

Pavodle padlikaŭ abjadnańnia siłavikoŭ «Biełpoł» i pravaabaroncaŭ, viadomyja imiony jak minimum 10050 čałaviek, jakija padpali pad palityčna matyvavanyja kryminalnyja spravy. Usiaho tyja ci inšyja palityčnyja represii (kryminałki, administratyŭki, zvalnieńni, pieratrusy, vymušanaja emihracyja) zakranuli sotni tysiač biełarusaŭ. 

«Ekstremizmam» ułady Biełarusi ličać patrabavańnie pravieści svabodnyja vybary z prazrystym padlikam hałasoŭ, a taksama praktyčna ŭsialakuju krytyku ŭładaŭ, prarasijskich histaryčnych naratyvaŭ, prajavy salidarnaści z Ukrainaj, antyvajennyja vystupy. 

Šmatlikija kryminalnyja spravy apošniaha času pa artykule ab «sadziejničańni ekstremizmu» byli źviazanyja sa «spravaj Hajuna».

«Biełaruski Hajun» — manitorynhavy OSINT-prajekt, jaki byŭ stvorany ŭ 2022 hodzie, kali Rasija praź Biełaruś napała na Ukrainu. Prajekt adsočvaŭ vajennuju aktyŭnaść rasijskich i biełaruskich vojskaŭ, abapirajučysia na infarmacyju ad biełarusaŭ. Kaardynavała jaho dziejnaść hrupa aktyvistaŭ na čale z Antonam Matolkam.

«Sprava Hajuna» pačałasia paśla taho, jak siłaviki zatrymali aktyvistku, jakaja niekalki hadoŭ žyła ŭ Biełarusi ŭ padpolli. U jaje mabilniku znajšli spasyłku na dałučeńnie ŭ bot Hajuna, jakuju joj dasyłali ŭ samym pačatku isnavańnia prajekta. Fatalnaja pamyłka była ŭ tym, što spasyłka była biesterminovaja. A tamu siłaviki zmahli padklučycca da bota i vypampavać adtul usiu infarmacyju. Jany atrymali paviedamleńni akaŭntaŭ, jakija pisali ŭ bot, a taksama ichnija ID i imiony karystalnikaŭ.

• 0
• 1
• 0
• 1
• 0
• 0
• 3
• 0