Asudžanaja na śmierć Krysta Pajk, jakaja pieražyła dźvie śmiarotnyja injekcyi, aprytomnieła
Žančyna znachodzicca ŭ balnicy ŭ kajdankach i kajdanach na nahach, prymacavanych da łožka, niahledziačy na paškodžańni, jakija jana atrymała padčas uviadzieńnia injekcyj.
50‑hadovaja amierykanka Krysta Pajk, asudžanaja ŭ ZŠA da śmiarotnaha pakarańnia, pieražyła dźvie śmiarotnyja injekcyi, «nasupierak usiamu, pryjšła ŭ prytomnaść i moža razmaŭlać», paviedamili jaje advakaty ŭ aŭtorak, piša Bi-bi-si.
Jak vynikaje ź ich zajavy, Pajk praciahvaje lačeńnie ŭ adździaleńni intensiŭnaj terapii balnicy štata Tenesi, kudy jana trapiła ŭ nieprytomnym stanie na minułym tydni paśla sproby vykanać prysud — joj uviali dźvie injekcyi pientabarbitału, jakija, adnak, nie pazbavili jaje žyćcia.
Uvieś hety čas daktary zajmalisia vyviadzieńniem pientabarbitału ź jaje arhanizma.
Zakanadaŭstva ZŠA praduhledžvaje, što asudžanamu da śmiarotnaha pakarańnia mohuć być zroblenyja tolki dźvie takija injekcyi.
Pajk znachodzicca ŭ balnicy ŭ kajdankach i kajdanach na nahach, prymacavanych da łožka, niahledziačy na paškodžańni, jakija jana atrymała padčas uviadzieńnia injekcyj, paviedamili advakaty.
Napiaredadni pryviadzieńnia prysudu ŭ vykanańnie abarona Pajk papiaredžvała, što asablivaści budovy jaje vien mohuć uskładnić jaje pakarańnie i prynieści joj «zališnija pakuty».
Jak zajavili advakaty Pajk, toje, što jana pryjšła ŭ prytomnaść paśla dźviuch niaŭdałych sprob vykanać śmiarotny prysud, źjaŭlajecca «biesprecedentnym ź miedycynskaha punktu hledžańnia». Niahledziačy na toje, što prahnoz pa-raniejšamu zastajecca niavyznačanym, «jak minimum my čakajem praciahłaha adnaŭleńnia», havorycca ŭ zajavie jaje abaroncaŭ.
Pajk — adziny viadomy ŭ historyi ZŠA vypadak, kali asudžanaja da śmiarotnaha pakarańnia zastałasia ŭ žyvych paśla daviedzienaj da kanca sproby pakarańnia, nahadali jany.
Što budzie dalej, zastajecca niezrazumiełym: ułady Tenesi pakul nie paviedamili, ci buduć jany jašče raz sprabavać vykanać prysud.
Adnak hubiernatar Tenesi Bił Li prypyniŭ praviadzieńnie pakarańniaŭ pa ŭsich śmiarotnych prysudach da kanca hoda, a kiraŭnik turemnaj sistemy štata zajaviŭ u minułyja vychodnyja, što płanuje pajści ŭ adstaŭku.
Adzin z advakataŭ Pajk, Styvien Fiereł, raniej zaklikaŭ hubiernatara «jak minimum» zamianić joj śmiarotny prysud na pažyćciovaje źniavoleńnie. «Jana pieražyła pakutlivuju sprobu pakarańnia, — rastłumačyŭ jon. — A da hetaha jana praviała ŭ turmie bolš za 30 hadoŭ, bolšuju častku hetaha času — u adzinočnaj kamiery. My pakul nie viedajem — i, mahčyma, nikoli nie daviedajemsia, — jakija pakuty jana źviedała za hety čas».
Pajk było 18 hadoŭ, kali jana i jaje tahačasny 17‑hadovy chłopiec Tadarył Šyp źbili, katavali i zabili 19‑hadovuju Kolin Ślemier, ź jakoj jany paznajomilisia ŭ łahiery dla prablemnych padletkaŭ. Pajk pavinna była stać pieršaj za 200 hadoŭ žančynaj, pakaranaj śmierciu ŭ Tenesi.
Pradstaŭniki pienitencyjarnaj sistemy ZŠA pakul nie rabili zajaŭ, jakija mahli b pralić śviatło na toje, čamu navat dźvie injekcyi, kožnaja ź jakich pavinna była stać śmiarotnaj, nie zmahli pazbavić Pajk žyćcia.
Aniestezijołah Džoeł Zivat, jaki kansultavaŭ kamandu abarony Krysty Pajk, zajaviŭ, što dźviuch doz pientabarbitału, jakija joj uviali, było b dastatkova, kab «jana abaviazkova pamierła», kali b rečyva trapiła ŭ kryvaciok.
Pavodle Zivata, mahčyma, injekcyi byli nienutraviennymi, a padskurnymi — heta značyć, pientabarbitał nie trapiŭ u kryvianosnuju sistemu žančyny, a raspaŭsiudziŭsia ŭ tkankach pad skuraj, što i zachavała joj žyćcio.
Advakaty Pajk raniej papiaredžvali, što jaje anamniez i anatamičnyja asablivaści — u tym liku trambacytoz (zachvorvańnie, źviazanaje sa zhusalnaściu kryvi) i małyja vieny — mohuć pryvieści da taho, što padčas śmiarotnaj injekcyi jana adčuje «niepatrebny» bol i pakuty.
Jakija nastupstvy dla Pajk buduć mieć dźvie śmiarotnyja dozy pientabarbitału, miedyki pakul nie viedajuć.
Na dumku Zivata, praz zatrymku z akazańniem Pajk miedycynskaj dapamohi paśla druhoj injekcyi ŭ jaje «całkam mahčyma» paškodžańnie mozhu, ale dla hetaha nieabchodna pravieści «jakasnaje nieŭrałahičnaje abśledavańnie».
«Navat pry vykarystańni ŭsich dastupnych mietadaŭ lačeńnia jaje šancy na vyžyvańnie zastajucca niavyznačanymi», — skazaŭ jon niekalki dzion tamu, kali Pajk jašče była biez prytomnaści. Pavodle jaho słoŭ, u Pajk, chutčej za ŭsio, buduć «surjoznyja miedycynskija prablemy, jakija mohuć istotna paŭpłyvać» na jakaść jaje žyćcia.
Debara Deno, kryminołah i prafiesar jurydyčnaha fakulteta Fordemskaha ŭniviersiteta, zajaviła Bi-bi-si, što jana «całkam šakavanaja» tym, što Pajk znachodzicca ŭ prytomnaści i razmaŭlaje, nazvaŭšy hety vypadak «biesprecedentnym».
Pavodle jaje słoŭ, Pajk — tolki vośmaja z tych, chto pieražyŭ sprobu pakarańnia śmierciu z dapamohaj śmiarotnaj injekcyi. Adnak u siami papiarednich vypadkach vykanaŭcam navat nie ŭdałosia ŭvieści što-niebudź u vieny źniavolenych.
Pajk — «adziny čałaviek, jakomu sapraŭdy ŭviali niejkaje taksičnaje rečyva», — patłumačyła Deno.
U minskim handlovym centry Palazzo sabrałasia daŭžeznaja čarha. Pa darmovych miadźviedzikaŭ!5
Kamientary