Biełaruskija komiki zapuścili jutub-šou spatkańniaŭ uślapuju
Farmat davoli cikavy: nieznajomyja chłopiec i dziaŭčyna na scenie adkazvajuć na pytańni komikaŭ, ale pry hetym nie bačać adno adnaho. Stendapiery abiacajuć, što dapamohuć pabudavać adnosiny — ci kančatkova rasčaravacca ŭ ich. Što atrymałasia?
Viadučyja šou — Saša Kalinkin i Maks Kanavał. Pieršy vypusk užo apublikavany na YouTube-kanale varšaŭskaha stendap-kłubu Local.
Šou, jakija dapamahajuć ludziam paznajomicca, chapaje ŭ roznych krainach, ale ŭ «Šou spatkańniaŭ uślapuju» jość svaje fiški. I hałoŭnaja ź ich — heta komiki, jakija sprabujuć zrabić praces znajomstva hierojaŭ adno z adnym i aŭdytoryjaj u zale śmiešnym i nienapružanym.
Pieršaj udzielnicaj stała biełaruska Volha, jakaja da zapaŭnieńnia ankiety padyšła maksimalna adkazna. Dziaŭčyna žartavała, što kolkaść krain, pa jakich jana vandravała, mienšaja za kolkaść spatkańniaŭ u jaje žyćci.
Komiki raspytvali jaje pra čakańni ad chłopca, a taksama pra toje, jakim jana bačyć idealnaha partniora. U paru Volzie dastaŭsia ŭkrainski chłopiec Andrej. Abaim udzielnikam na vočy nadzieli čornyja maski dla snu. Z dapamohaj viadučych jany abmiarkoŭvali roznyja pytańni — naprykład, stereatypy pra biełarusaŭ i ŭkraincaŭ u adnosinach.
— Maje siabroŭki-ŭkrainki raspaviadali šmat charošaha pra chłopcaŭ-ukraincaŭ, a potym zakančvali frazaj: «A ciapier jany ŭ čornym śpisie», — pryznałasia Volha.
Andrej ža raspavioŭ, što čuŭ, byccam biełaruski dobryja ŭ seksie. Biełarusy ŭ zale z tezisam spračacca nie stali.
— Pajšła chimija, — žartavali stendapiery. — Takaja chimija, kali ty niešta nie toje źmiašaŭ.
Paśla adkazaŭ na pytańni blicu pary treba pastavić adno adnamu łajk ci dyzłajk — i tolki paśla hetaha dazvalajuć źniać maski. Hierojam prapanoŭvajuć abmianiacca kantaktami — ale ci buduć jany rabić heta, zastajecca na ich sumleńni.
U takich ramantyčnych pieradačach zvyčajna historyja zakančvajecca na pazityvie. U hledačoŭ jość prastora dla fantazii, bo nieviadoma, što adbyvajecca dalej z hierojami.
Tut ža hieroi zapisvajuć kružočki z raspoviedam, jak raźvivalisia padziei paśla šou.
— Usio było jak u lepšych kazkach, — kaža Volha. — Jany žyli doŭha i ščaśliva, ale paasobku. Nam chapiła paŭdnia mlavaj pierapiski, kab stała vidavočna, što nijakaha praciahu hetaj historyi być nie moža. My razyšlisia jak u mory karabli i z taho momantu nikoli bolš nie razmaŭlali.
Andrej pasprabavaŭ dać bolš vietlivy adkaz:
— Vielmi pryjemna pahutaryli z Volaj, mnie vielmi spadabałasia. Na žal, znosiny nie praciahnulisia, tym nie mienš heta było kłasna.
Druhoj paraj pieršaha vypusku stali ŭkraincy Elizabet i Vasil. Ščyra kažučy, jany vyhladali bolš harmanična razam, čym ich papiaredniki. Zdavałasia, što chłopiec i dziaŭčyna adrazu znajšli ahulny vajb i navat žartavali ŭ adnym styli. Ni ŭ viadučych, ni ŭ hledačoŭ nie było sumnievaŭ, što Elizabet i Vasil pastaviać adno adnamu łajk — tak i atrymałasia.
Ale skončyłasia historyja horš, čym u pieršym vypadku. Aburanaja dziaŭčyna paviedamiła, što chłopiec adrazu ŭ zali pačaŭ flirtavać ź inšaj — i Elizabet padałosia, što ŭ ich užo byli «šury-mury» raniej. U jaje ž Vasil spytaŭ instahram, ale tak i nie padpisaŭsia. Tak što ŭsio skončyłasia, ledź pačaŭšysia. Adnak Elizabet śćviardžaje, što z radaściu paŭdzielničała b jašče ŭ adnym vypusku šou, bo sam farmat joj spadabaŭsia.
Žarty brazilca pra Biełaruś razyšlisia pa sacsietkach. Jabaćki ŭžo nazyvajuć jaho bečebešnikam
«Dałaś tiebie vot eta Polša, v RB zarpłata bolšie». Štučny intelekt napisaŭ prapahandyscki chit
«Erkiuli Puaro ź Pieršamajskaha RUUS»: anhłamoŭny stendapier ź Biełarusi trolić milicyju, dapamahajučy šukać samoha siabie
Kamientary