U Kijevie ŭčora z-za rasijskich atak spyniałasia praca mietro, byli prablemy z vadoj i elektryčnaściu

Z-za źnižeńnia napružańnia ŭ źniešnich centrach elektrazabieśpiačeńnia ŭ Kijeŭskim mietrapalitenie časova prypynili ruch ciahnikoŭ i pracu eskałataraŭ, piša Bi-bi-si — Ukraina.

Siońnia taksama ŭ Kijevie častkova spynili ruch hramadskaha transpartu. Pryčyna spynieńnia — adsutnaść napružańnia ŭ enierhasistemie. Zaraz prablema nazirajecca ŭ Abałonskim, Padolskim i Śviatošynskim rajonach ukrainskaj stalicy.

Učora kala 18:40 było paviedamlena, što na «siniaj» i «zialonaj» linijach mietro pastupova adnaŭlajecca ruch ciahnikoŭ, ale z pavialičanymi intervałami. Ruch ciahnikoŭ na «čyrvonaj» linii — najbolš zahružanaj — byŭ prypynieny.

U 19:24 haradskija ŭłady paviedamili pra adnaŭleńnie ruchu na ŭsich linijach staličnaha mietrapalitena.

Akramia taho, u niekalkich rajonach horada ŭčora nazirałasia źnižeńnie cisku ŭ vodapravodnych sietkach. U niekatorych damach było časovaje spynieńnie vodazabieśpiačeńnia.

Z-za składanaj situacyi ŭ elektrasietkach, vyklikanaj rasijskimi abstrełami, Kijeŭ i inšyja rehijony apošnija niekalki dzion žyvuć va ŭmovach praciahłych adklučeńniaŭ elektryčnaści.

Paśla avaryjnaj situacyi ŭ mietro pieršy vice-premjer-ministr i ministr enierhietyki Dzianis Šmyhal napisaŭ, što była atakavanaja adna z važnych dla Kijeva enierhietyčnych infrastrukturnych placovak.

Ministerstva enierhietyki Ukrainy zajaviła, što ŭ apošnija tydni Rasija «istotna» ŭzmacniła ataki na ŭkrainskuju enierhietyčnuju infrastrukturu.

«Vorah metanakiravana bje pa linijach elektrapieradačy i transfarmatarach, što robić niemahčymaj pieradaču elektraenierhii spažyŭcam», — havorycca ŭ zajavie ministerstva.

Ministr enierhietyki Dzianis Šmyhal paviedamiŭ, što ŭviečary 8 kastryčnika Rasija atakavała «adzin z važnych dla Kijeva enierhietyčnych abjektaŭ».

Dyrektar enierhietyčnych prahram Centra Razumkova Uładzimir Amielčanka adznačaje, što adklučeńni elektryčnaści ŭ Kijevie źviazanyja najpierš z «sietkavymi abmiežavańniami», heta značyć z mahčymaściami sistemy pieradavać elektraenierhiju.

«Važna adroźnivać deficyt hienieryrujučych mahutnaściaŭ i abmiežavańni na pieradaču elektraenierhii. Navat kali ŭ cełym u krainie chapaje hienieracyi, paškodžanyja sietki mohuć nie prapuskać nieabchodnuju mahutnaść u asobny rehijon. Na maju dumku, mienavita sietkavyja abmiežavańni adyhryvajuć klučavuju rolu ŭ ciapierašnich prablemach z elektrazabieśpiačeńniem Kijeva», — ličyć ekśpiert.

Pavodle jaho słoŭ, razbureńni i paškodžańni bujnych krynic hienieracyi ŭ Kijevie i vobłaści — Darnickaj CEC, CEC-5, CEC-6 i Trypolskaj CES — uzmacniajuć zaležnaść rehijona ad źniešnich krynic elektrazabieśpiačeńnia.

Udary pa vysakavoltnych padstancyjach dadatkova abmiažoŭvajuć pastupleńnie elektraenierhii z Abjadnanaj enierhietyčnaj sistemy Ukrainy.

«Spałučeńnie hetych udaraŭ stvaraje pahrozu enierhietyčnaj izalacyi staličnaha rehijona: ułasnaj dastupnaj hienieracyi nie chapaje, a mahčymaści atrymlivać elektraenierhiju zvonku zvužajucca», — adznačaje Amielčanka.

I ŭsio heta adbyvajecca navat pry spryjalnym ciopłym nadvorji.

Pavodle jaho słoŭ, mienavita tamu abarona klučavych vuzłoŭ źniešniaha elektrazabieśpiačeńnia pavinna być adnym z pryjarytetaŭ Ukrainy. Dla hetaha nieabchodnyja ŭzmacnieńnie supraćpavietranaj abarony, inžyniernaja abarona abjektaŭ, reziervovyja maršruty elektrazabieśpiačeńnia i dastatkovyja zapasy abstalavańnia dla avaryjnaha adnaŭleńnia.

• 0
• 0
• 0
• 0
• 0
• 0
• 0
• 0