Mužčyna zarabiŭ bolš za $8 miljonaŭ na ŠI-muzycy, jakuju sam ža kruciŭ miljardy razoŭ praz fejkavyja akaŭnty

Muzyčnyja stryminhi daŭno zmahajucca z nakrutkaj prasłuchoŭvańniaŭ. Ale schiema 54‑hadovaha Majkła Śmita z Paŭnočnaj Karaliny vyłučałasia maštabam: jon vykarystaŭ štučny intelekt dla masavaha stvareńnia piesień, a botaŭ — dla nakrutki ich prasłuchoŭvańniaŭ.

Pavodle materyjałaŭ spravy, na jakija spasyłajecca Music Business Worldwide, z 2017 pa 2024 hod Śmit kantralavaŭ tysiačy falšyvych akaŭntaŭ na Spotify, Apple Music, Amazon Music i YouTube Music. Jany aŭtamatyčna prajhravali muzyku, za prasłuchoŭvańni jakoj jon atrymlivaŭ rojałci.

Adnak krucić niekalki adnych i tych ža piesień miljony razoŭ było ryzykoŭna: płatformy mahli zaŭvažyć nienaturalnuju aktyŭnaść i vyjavić nakrutku. Tamu Śmit raźmiarkoŭvaŭ falšyvyja prasłuchoŭvańni pamiž vialikaj kolkaściu trekaŭ.

Dla hetaha jamu spatrebiŭsia vielizarny katałoh. Pavodle prakuratury, Śmit vykarystaŭ štučny intelekt, kab atrymać sotni tysiač piesień. U vyniku tysiačy jaho bot-akaŭntaŭ prasłuchali ich miljardy razoŭ. Čym bolš było trekaŭ, tym mienš padazrona vyhladała statystyka kožnaha ź ich.

U kastryčniku 2018 hoda Śmit sam apisaŭ łohiku schiemy ŭ elektronnym liście: kab nie vyklikać padazreńniaŭ, patrebna było «vielmi šmat kantentu ź nievialikaj kolkaściu prasłuchoŭvańniaŭ».

Na rańnim etapie jon adpraviŭ samomu sabie pa elektronnaj pošcie raźlik, pavodle jakoha 1040 bot-akaŭntaŭ mahli stvarać kala 661 tysiačy prasłuchoŭvańniaŭ u dzień. Paźniej, pavodle prakuratury, u asobnyja pieryjady adnačasova pracavała ŭžo da 10 tysiač takich akaŭntaŭ.

Maštab nakrutki dobra pakazvaje adzin z prykładaŭ, jaki pryvodzić prakuratura. U krasaviku 2023 hoda ŭvieś katałoh Tejłar Śvift atrymaŭ na YouTube Music kala 9,3 miljona prasłuchoŭvańniaŭ praź siamiejnyja taryfy. Za toj ža miesiac bot-akaŭnty Śmita praz takija ž taryfy prasłuchali jaho muzyku 80,9 miljona raza — amal u dzieviać razoŭ bolš.

Śmita aryštavali ŭ vieraśni 2024 hoda. Pavodle prakuratury, za čas pracy schiemy jon atrymaŭ ad arhanizacyj, jakija vypłačvali rojałci, bolš za 14 miljonaŭ dalaraŭ. Ale nie ŭsie hetyja hrošy paličyli škodaj: pry jaje raźliku adniali vypłaty za sapraŭdnyja prasłuchoŭvańni jaho muzyki, a taksama hrošy, jakija jon sam płaciŭ za akaŭnty, što vykarystoŭvali boty. U vyniku baki pahadzilisia na sumie krychu bolš za 8,09 miljona dalaraŭ.

Abarona padkreślivała, što samo pa sabie stvareńnie muzyki z dapamohaj štučnaha intelektu i jaje publikacyja na stryminhavych płatformach nie źjaŭlajucca niezakonnymi. Sprava tyčyłasia taho, što Śmit vykarystoŭvaŭ tysiačy falšyvych akaŭntaŭ dla nakrutki prasłuchoŭvańniaŭ i atrymlivaŭ za ich realnyja hrošy.

U sakaviku 2026 hoda Śmit pryznaŭ siabie vinavatym u zmovie z metaj machlarstva z vykarystańniem elektronnych srodkaŭ suviazi. Prakuratura prasiła prysudzić jamu nie mienš za 46 miesiacaŭ turmy, a abarona — abyścisia bieź źniavoleńnia.

6 kastryčnika sud prysudziŭ Śmitu 18 miesiacaŭ turmy i jašče dva hady nahladu paśla vyzvaleńnia. Sud taksama pastanaviŭ spahnać ź jaho raniej vyznačanuju sumu ŭ paradku kanfiskacyi.

I abvinavačańnie, i abarona nazyvali hetuju spravu pieršym u ZŠA kryminalnym pieraśledam takoha typu. U joj złučylisia dźvie častki adnoj schiemy: štučny intelekt dazvoliŭ atrymać sotni tysiač piesień, a boty — stvaryć dla ich miljardy falšyvych prasłuchoŭvańniaŭ.

• 7
• 0
• 8
• 2
• 3
• 0
• 1
• 1