«Erkiuli Puaro ź Pieršamajskaha RUUS»: anhłamoŭny stendapier ź Biełarusi trolić milicyju, dapamahajučy šukać samoha siabie
«Ja supracoŭničaju ź biełaruskaj milicyjaj u pytańniach majho vyšuku», — raspaviadaje ŭ svaim tyktoku anhłamoŭny stendapier ź Biełarusi Ciarencij Marynič. Jon raskazaŭ «Našaj Nivie» ab tym, jak padśmiejvajecca ź biełaruskich siłavikoŭ, dapamahajučy šukać samoha siabie.
U 2021 hodzie minski stendapier Ciarencij Marynič zapisaŭ znakamitaje videa ź jabaćkami, jakija vitali čyrvona-zialonymi ściahami siłavikoŭ. Kaniečnie, taja razmova nie zastałasia biez uvahi ŭładaŭ: mužčyna adsiadzieŭ 45 sutak, a paśla źjechaŭ ź Biełarusi. I ŭvieś hety čas supracoŭniki Pieršamajskaha RUUS sprabujuć znajści Ciarencija, a toj zapisvaje im žartaŭlivyja videapadkazki.
— Kali mianie abjaŭlajuć u vyšuk, siłaviki telefanujuć mnie i pytajucca, dzie ja. Ja nikoli nie adkazvaju im prosta. Ja taki: «Nu vy ŭsio ž pracujecie ŭ kampietentnych orhanach, vy pavinny ŭmieć razhadvać zahadki». Ja im zvyčajna dasyłaju videa paśla takich zvankoŭ, ale starajusia nie mocna ŭskładniać im žyćcio. Naprykład, apošniaje videa ja źniaŭ u Varšavie na fonie stalinskaha šmatpaviarchovika, tak, kab u kadr traplaŭ vialiki nadpis «Varšava Centralnaja». Mient pahladzieŭ hetaje videa i taki: «Ja razhadaŭ hetuju zahadku. Jedziem da jaho maci rabić pieratrus». Mianie nikoli nie znojduć, — žartuje komik u tyktoku.
«Našaj Nivie» Ciarencij raspavioŭ, što jašče z časoŭ svajho pieršaha zatrymańnia zapomniŭ šmat imionaŭ supracoŭnikaŭ Pieršamajskaha RUUS — u jaho navat zachavalisia ich numary telefonaŭ.
— Jość tam adzin piersanaž, jaki mnie spačatku paśmichaŭsia, a potym u sudzie abyłhaŭ — skazaŭ, byccam by ja hrukaŭ nahami ŭ dźviery. Tady mianie pasadzili na pieršyja 15 sutak. Raniej, kali byŭ nastroj, pierapisvaŭsia ź im. Tam zaŭsiody taki naratyŭ: «Viartajsia ŭ turmu». Plus u biełaruskich siłavikoŭ niejki ŭchił u homaseksualnaść. Lubiać raskazvać pra «na pałku nasadzić» ci niešta takoje. Pytajuć: «Nu što ty tam u Hiejropie?». Mabyć, jość u ich łatentnaja homaseksualnaść.
Šmat chto z «Erkiulej Puaro ź Pieršamajskaha RUUS» u vyniku zabaniŭ Ciarencija. Mužčyna kaža, što prykładna raz na paŭhoda jaho pačynaje šukać niejki novy milicyjanier.
— Jon pačynaje pytać u majoj maci, kudy ja padzieŭsia. Jana kidaje mnie jaho numar. I ja ci ŭ vajbiery, ci ź biełaruskaj simki telefanuju siłaviku. Kali heta milicyjanier adukavany, ja bolš-mienš narmalna ź im starajusia razmaŭlać. Ale kali jon pačynaje byčyć, dyk i ja nie strymlivajusia. U 90% vypadkaŭ milicyjanier pačynaje kazać: «A čamu ty ŭ Biełarusi maŭčaŭ?!» — dyk a ja nikoli nie maŭčaŭ! (sapraŭdy, navat znachodziačysia na radzimie, u svaich pastach u sacsietkach Ciarencij nie vielmi padbiraŭ słovy, havoračy pra siłavikoŭ, jabaciek i ŭłady. — «NN»).
Pieršapačatkova stendapier ź Minska źjechaŭ u Kijeŭ. Tudy jamu taksama telefanavali siłaviki i patrabavali viarnucca «na prafiłaktyčnuju hutarku», pahražali, što kali mužčyna nie pryjedzie sam, dyk za im pryjeduć. Ciarencij zaśmiajaŭsia, nazvaŭ adras, pa jakim znachodzicca, i skazaŭ, što budzie čakać.
— Ja nikoli nie chavaju, dzie ja. Ja zajmajusia stendapam i čas ad času kidaju siłavikam afišy svaich vystupaŭ i zaprašaju ich pryjści. Trolu ich, tak. Kali pryjechaŭ u Varšavu, zapisaŭ videa «Nikoli mianie nie znojdziecie, zdahadajciesia, dzie ja» na fonie vialikaha hrafici «Varšava Centralnaja».
Anałahičnaje videa stendapier zapisvaŭ u Hruzii, dzie žyŭ paŭhoda. Roliki jon vykładaje ŭ tyktok. Kaža, adrazu ŭ kamientaryi prybiahajuć jabaćki.
− Raniej pisali «Viartajsia», ciapier, zdajecca, novyja mietadyčki vydali, bo stali pisać niešta kštałtu «Słužy polskim panam, pakul u nas tut stabilnaść i vialiki Łukašenka». Prychodziać i narmalnyja biełarusy, pačynajuć niešta tłumačyć jabaćkam. Pryjemnaje pačućcio, kali adkryvaješ tyktok, a tam 80 kamientaryjaŭ novych — čytaješ ich jak mini-knižku.
Na minułym tydni Ciarencija znoŭ šukali. A jon narešcie daviedaŭsia, u čym jaho abvinavačvajuć: 369 artykuł Kryminalnaha kodeksa Biełarusi — abraza pradstaŭnika ŭłady.
— Siłaviki prapanavali zdać bijamateryjał majoj mamie. Skazali: «A što, kali jon u Jeŭropie zahinie, treba ž budzie cieła apaznać». Ja tak i nie zrazumieŭ, što heta było. Ale voś takoje žyćcio.
Stendapier kaža, što ŭ pravavoj dziaržavie byŭ by hatovy pajści ŭ sud.
— Kali ŭ Biełarusi buduć narmalnyja sudy, dyk ja hatovy adkazać za svaje tyktoki — navat materyjalna.
Kamientary