Siadzibu Hrabnickich pad Ušačami kuplali ŭžo dvojčy — i voś jana znoŭ na aŭkcyjonie za adnu bazavuju

Kamitet «Viciebskabłmajomaść» pravodzić elektronnyja tarhi pa prodažy histaryčnaha majontka XIX stahodździa ŭ Arechaŭnie. Aŭkcyjon pryznačany na vierasień 2026 hoda. Pavodle dakumientacyi, acenačny košt adnapaviarchovaha cahlanaha budynka płoščaj 510 kvadratnych mietraŭ składaje 350 tysiač rubloŭ. Pačatkovaja staŭka źnižana da adnoj bazavaj vieličyni — 45 rubloŭ.

U apisańni łota pomnik architektury prysutničaje jak «budynak siadzibnaha doma XIX stahodździa», tak i hod pabudovy — 1920 hod. Heta čarhovyja dzivosy spravavodstva časoŭ savieckaj nacyjanalizacyi.

Muravany siadzibny dom u Arechaŭnie pabudavany pradstaŭnikami rodu Hrabnickich u 1840‑ia hady ŭ styli poźniaha kłasicyzmu. U skład majontka ŭvachodzili pałatnianaja fabryka, paravy młyn, brovar, kuźnia, koniezavod i parkavy kompleks.

U 1917 hodzie ŭłaśniki, syny navukoŭca Adama Hrabnickaha-Daktaroviča, pakinuli krainu. U 1943—1944 hadach u budynku raźmiaščaŭsia špital partyzanskaj bryhady imia Panamarenki. U paślavajenny čas tam pracavała škoła. Z 1998 hoda budynak nie ekspłuatujecca. Terytoryja i interjery za hety čas byli razrabavanyja.

Kupiec abaviazany na praciahu 30 kalandarnych dzion paśla padpisańnia damovy aformić achoŭnaje abaviazacielstva na historyka-kulturnuju kaštoŭnaść 3‑j katehoryi. Zhodna z umovami, novamu ŭłaśniku dajecca adzin hod na raspracoŭku prajektna-kaštarysnaj dakumientacyi i maksimum piać hadoŭ na vykanańnie ramontna-restaŭracyjnych prac.

Papiarednija sproby prodažu

U lipieni 2020 hoda siadzibu nabyło minskaje sielhaspradpryjemstva «Aziory-Ahra» za 28 rubloŭ. Jak my pisali raniej, inviestar płanavaŭ adkryć tam muziej i kaviarniu. U 2021 hodzie Tavarystva achovy pomnikaŭ historyi i kultury nakiravała zvarot u Hienieralnuju prakuraturu z-za taho, što ziamielnyja i budaŭničyja pracy vialisia biez zaćvierdžanaha prajekta zon achovy i navukovaj dakumientacyi. Uletku 2024 hoda adviedzieny čatyrochhadovy termin na adnaŭleńnie skončyŭsia, paśla čaho abjekt viarnuli dziaržavie.

U lutym 2025 hoda majontak paŭtorna pradali za adnu bazavuju vieličyniu, jakaja tady składała 40 rubloŭ. Vydańnie «SB. Biełaruś siehodnia» paviedamlała, što ŭłaśnicaj stała žycharka Minska. Pa ŭmovach ździełki jana pavinna była adnavić abjekt za try hady, adnak u vieraśni 2026 hoda siadziba znoŭ źjaviłasia ŭ śpisach nievykarystoŭvanaj majomaści.

• 0
• 0
• 0
• 1
• 0
• 0
• 0
• 0