Rasijskija strymiery iduć pieššu z Maskvy ŭ Minsk, kab pacisnuć ruku Łukašenku

Rasijskija strymiery Daniił Košal i Ivan Skrypka pačali svoj pachod z Maskvy ŭ siaredzinie žniŭnia, fiksujučy kožny etap na płatformie Twitch i ŭ sacyjalnych sietkach. 

Pieršyja 50 kiłamietraŭ da Kubinki junaki pieraadoleli da 15 žniŭnia, a ŭžo praź dzień dasiahnuli Mažajska. Temp chady składaje kala 35—40 kiłamietraŭ na dzień: naprykład, 19 žniŭnia na padychodach da rasijskaha horada Haharyn prahrama zafiksavała bolš za 41 tysiaču krokaŭ. 

Paśla nievialikaha adpačynku ŭ Viaźmie, što za 250 kiłamietraŭ ad Maskvy, vandroŭniki paskorylisia i da 25 žniŭnia pierasiekli miažu ŭ 300 kiłamietraŭ kala Safonava, robiačy ŭ asobnyja dni bolš za 57 tysiač krokaŭ.

Pałovu maršrutu (400 kiłamietraŭ) rasijanie prajšli ŭ kancy žniŭnia pierad Smalenskam, paśla čaho pierasiekli biełaruskuju miažu. Heta adbyłosia na 17‑y dzień pachodu i ŭ dzień narodzinaŭ Łukašenki, ź jakim rasijskija strymiery jaho i pavinšavali ŭ adnym sa svaich videa.

U pieršyja dni vieraśnia błohiery adznačylisia ŭ Oršy i Tałačynie.

Pavialičyć

Rašeńnie adpravicca ŭ doŭhi šlach było spantannym. Błohiery pryznajucca, što natchnilisia niaŭdačaj kalehi Asłana Šukašy, jaki sprabavaŭ prajści anałahičny maršrut, ale zdaŭsia na druhi dzień. Rasijanie navat nie viedali pra papiaredni prajekt biełaruskich strymieraŭ, jakija hodam raniej paśpiachova prajšli ź Minska ŭ Maskvu.

Adsutnaść turystyčnaha vopytu i papiaredniaha płanavańnia pryviała da fizičnych prablem užo na starcie. Praź niazvykłuju nahruzku stupni daviałosia štodnia ablaplać dziasiatkami płastyraŭ i prymać abiazbolvalnyja preparaty.

Pavialičyć

U pačatku vieraśnia, kali rasijanie dasiahnuli Barysaŭskaha rajona, ich pierachapili biełaruskija prapahandysty. Supracoŭniki «Minskaj praŭdy» śpiecyjalna pryjechali nasustrač strymieram kala ahraharadka Łošnica z kavaj i prysmakami.

U intervju vydańniu Košal adznačyŭ, što biełaruskija dahledžanyja sielskahaspadarčyja pali mocna kantrastujuć z rasijskimi lasnymi masivami. Taksama junaki raskazali pra ŭvahu miascovych žycharoŭ, jakija častavali ich chatnim sałam u Krupskim rajonie, prynosili kazinaje małako ŭ Oršy i sustrakali cełymi kampanijami ŭ vioskach. Adzinym surjoznym stracham na terytoryi Biełarusi rasijanie nazvali mahčymaść sustreć miadźviedzia padčas načovak u lesie.

Hałoŭnaj matyvacyjaj svajho padarožža rasijanie nazyvajuć palityčny žest. «U nas meta — damahčysia pocisku ruki ad prezidenta Biełarusi. Ja nie viedaju, nakolki hodnyja my hetaha. My prosta idziem», — zajaviŭ Košal.

Ź Minska ŭ Maskvu

Nahadajem, što ŭ mai i červieni 2025 hoda biełaruskija videabłohiery Vital Chramcoŭ (Bulbanews) i Anton Dramaturh pieššu prajšli kala 780 kiłamietraŭ pa hetym ža maršrucie ź Minska ŭ Maskvu prykładna za miesiac.

Biełarusy taksama viali bieśpierapynnyja tranślacyi na Twitch i nie karystalisia transpartam, adnak admovilisia ad ciažkich zaplečnikaŭ z pałatkami na karyść načlehaŭ u chostełach i hatelach. Finišavali biełaruskija vandroŭniki na nulavym kiłamietry na Krasnaj płoščy, dzie adzin z udzielnikaŭ zrabiŭ prapanovu svajoj dziaŭčynie. Darečy, Vital Chramcoŭ, jaki da hetaha rabiŭ humarystyčnyja videa biez palityčnaha padtekstu, u 2024 hodzie zatrymlivaŭsia siłavikami ŭ Viciebsku.

• 1
• 6
• 5
• 30
• 1
• 0
• 5
• 0