Kala Mirskaha zamka adbudujuć źniščany pałac Śviatapołk-Mirskich. U im raźmieścicca hatel

Raźvićcio terytoryi vakoł Mirskaha zamka padzielena na čatyry čarhi. Hetyja płany ahučyŭ dyrektar muzieja Alaksandr Łojka, paviedamlaje telehram-kanał Instytuta historyi NAN Biełarusi.

Pieršaj čarhoj stała restaŭracyja samoha zamkavaha budynka. Druhi etap — adnaŭleńnie italjanskaha sadu płoščaj 5,7 hiektara. Jak my pisali raniej, hety prajekt finansujecca za košt pazabiudžetnych srodkaŭ muzieja (kala 8 miljonaŭ rubloŭ) i raspracoŭvaŭsia z aporaj na invientar 1746 hoda. Asnoŭnyja pracy ŭ sadzie zavieršanyja, jon adkryjecca dla naviedvalnikaŭ užo ŭ hetym miesiacy. Pry adnaŭleńni parkavaj struktury ŭličana nieabchodnaść zachavańnia miesca pachavańnia achviar Chałakostu, rasstralanych tut u hady Druhoj suśvietnaj vajny.

Treci etap rekanstrukcyi pačniecca ŭ 2027 hodzie i zakranie anhlijski piejzažny park płoščaj 16 hiektaraŭ. Asnoŭny front rabot na hetaj terytoryi — uźviadzieńnie novaha žalezabietonnaha mosta cieraz ručaj zamiest stračanaha draŭlanaha. Heta dazvolić zakalcavać prahułačny maršrut vakoł štučnaha voziera. Hłabalnaj vysiečki isnujučych dreŭ nie płanujecca, bo asnoŭnyja novyja pasadki byli vykanany raniej. Čaćviortaja čarha raźvićcia kompleksu — heta adnaŭleńnie pałaca Śviatapołk-Mirskich.

Pavialičyć

Muravany dvuchpaviarchovy siadzibny dom byŭ uźviedzieny ŭ formach nieakłasicyzmu pry kancy XIX stahodździa na zahad Mikałaja Śviatapołk-Mirskaha. Jon nabyŭ mirskija ŭładańni ŭ 1891 hodzie i pabudavaŭ rezidencyju z uschodniaha boku ad staroha zamka. U 1914 hodzie (pa inšych źviestkach — u 1917-m) pałac zhareŭ. Syn zasnavalnika Michaił Śviatapołk-Mirski nie staŭ adnaŭlać budynak i zasiarodziŭsia na restaŭracyi staroha zamka, pasialiŭšysia ŭ acalełaj aficynie. Reštki zharełaha pałaca byli kančatkova razabranyja ŭ siaredzinie XX stahodździa.

Z 2016 hoda na miescy byłoj rezidencyi pravodziacca archieałahičnyja daśledavańni pry ŭdziele śpiecyjalistaŭ Instytuta historyi NAN Biełarusi.

Padmurki pałaca adkrytyja dla ahladu i ŭklučanyja ŭ ekskursijnuju prahramu. Unutranaje raźmiaščeńnie pakojaŭ viadomaje dziakujučy ŭspaminam siamji byłych ułaśnikaŭ: na pieršym paviersie miaścilisia stałovaja, haścioŭnia i biblijateka-biljardnaja, na druhim — vialikaja haścioŭnia, spalni i kabiniet kniazia.

Pavialičyć

Pavodle słoŭ dyrektara muzieja, adnoŭleny budynak płanujuć addać pad haścinicu, stylizavanuju pad «mižvajenny pieryjad» (što vielmi dziŭna, uličvajučy, što pałac zhareŭ u Pieršuju suśvietnuju vajnu i bolš nie adnaŭlaŭsia). Patreba ŭ novaj haścinicy pradyktavana vostrym deficytam miescaŭ dla pražyvańnia turystaŭ: isnujučy hatel u Mirskim zamku naličvaje ŭsiaho 16 numaroŭ, i zapis u jaho idzie na paŭhoda napierad.

Maštabnaje raźvićcio infrastruktury prymierkavana da 500‑hadovaha jubileju Mirskaha zamka. Data zasnavanaja na pieršaj piśmovaj zhadcy abjekta ŭ dakumiencie ab padziele majomaści ad 8 krasavika 1527 hoda. Asnoŭnyja ŭračystyja mierapryjemstvy zapłanavanyja na 4—6 červienia 2027 hoda. U ramkach padrychtoŭki da jubileju 10—11 vieraśnia 2026 hoda ŭ Miry i Minsku prachodzić navukovaja kanfierencyja «Abarončaje dojlidstva Biełarusi: da 500‑hodździa Mirskaha zamka» z udziełam bolš za 80 daśledčykaŭ. U listapadzie 2026 hoda na Ujaznoj viežy z boku ŭnutranaha dvara pavinien źjavicca viežavy hadzińnik.

Pavialičyć

Dziela vyrašeńnia transpartnych prablem (ciapier da zamka možna dabracca tolki aŭtamabilami abo aŭtobusami) kiraŭnictva kompleksu letam ahučvała namier adnavić 12‑kiłamietrovuju vuzkakalejnuju čyhunku ad stancyi Haradzieja da Mira, jakaja isnavała padčas Pieršaj suśvietnaj vajny.

Hety prajekt pakul znachodzicca na stadyi idei i patrabuje pryciahnieńnia inviestaraŭ i adpaviednych rašeńniaŭ z boku Biełaruskaj čyhunki. Sioleta ž muziej rychtujecca dasiahnuć rekordnaha pakazčyka ŭ paŭmiljona naviedvalnikaŭ.

• 1
• 0
• 0
• 0
• 0
• 0
• 0
• 0